حمزہ بن عبد المطلب

ويکی شيعه سے
:چھلانگ بطرف رہنمائی, تلاش
حمزہ سید الشہداء
سوانح حیات
مکمل نام حَمزةُ بن عَبدالمُطَّلِب
لقب سیدالشہداء
میلاد/مولد دو یا چار سال قبل از عام الفیل؛ مکہ
مسکن مکہ اور مدینہ
مہاجر/انصار مہاجر
نسب قریشی
نامور اقرباء عبد المطلب، ابو طالب، پیغمبر اکرم(ص)، امیرالمؤمنین(ع)
وفات/شہادت 15 شوال سنہ 3ه‍ ق؛ منطقۂ احد
کیفیت وفات/شہادت جبیر بن مطعم کے غلام"وحشی" کے ہاتھوں
مدفن منطقہ احد
دینی معلومات
قبول اسلام کا وقت سنہ 2 یا 6 بعد از بعثت
قبول اسلام کی کیفیت پوری آگہی کے ساتھ مسلمان ہوئے
جنگوں میں شرکت احد میں وقت شہادت تک کی تمام جنگوں میں شریک ہوئے
ہجرت بسوئے مدینہ
کردار
شہید غزوہ احد

حَمزۃ بن عَبدالمُطَّلِب، الملقب بہ "اسد اللہ"، "اسد رسول الله(ص)" اور سید الشہداء، پیغمبر اکرم(ص) کے چچا اور اُحُد کے شہداء میں سے ہیں۔ حمزہ رسول اکرم(ص) کی دعوت رسالت کے اہم حامیوں میں سے ہیں۔ اور مروی ہے کہ ابھی انھوں نے قبول اسلام کا اعلان نہیں کیا تھا لیکن مشرکین کے مقابلے میں رسول خدا(ص) کی حمایت کرتے تھے۔ وہ خود قریش کے ز‏عماء میں سے تھے اسی وجہ سے ان کی طرف سے قبول اسلام کے اظہار کے بعد قریش کی طرف سے رسول اللہ(ص) پر ظلم و جور اور آزار اذيت میں کمی آگئی۔

حمزہ نے اسلام قبول کرنے کے بعد صدر اول کی جنگوں میں شرکت کی اور جنگ احد میں جام شہادت نوش کیا اور قریشی مشرکین نے ان کے جسم کا مثلہ کردیا [اور جسم مبارک کے ٹکڑے ٹکڑے کردیئے]۔ رسول اللہ(ص) نے اپنے چچا کو اس حال میں دیکھا تو روئے۔ بعدازاں انصار کی عورتیں اپنے مرحومین کے لئے گریہ کرنے سے قبل حضرت حمزہ کے لئے گریہ کیا کرتی تھیں۔

رسول اکرم(ص) نے حمزہ کو بنو ہاشم کے 7 بہترین افراد اور بہترین شہداء کے زمرے میں شمار کیا ہے۔

نام، کنیت اور لقب

رسول اللہ(ص) کے چچا اور غزوہ احد کے شہید بزرگوار حمزہ بن عبدالمطلب کی کنیتیں ابوعُمارہ اور ابو یعْلی ہیں[1]۔[2] ان کی والدہ [[ہالب بنت اہیب|ہالہ بنت اُہَیب (وُہَیب) بن عبد مَناف بن زُہرہ تھیں۔[3]۔[4]

انہیں "اسد اللہ" اور "اسدُ رسولِ اللہ" جیسے القاب دیئے گئے ہیں۔[5]۔[6] رسول خدا(ص) سے منقولہ ایک حدیث کے مطابق حمزہ کو شہادت کے بعد بھی اللہ کی تائید حاصل ہوئی اور سید الشہداء کے عنوان سے مشہور ہوئے۔[7]۔[8]

حمزہ کے معنی "شیر"[9] یا تیز فہمی[10] کے ہیں۔

قبل از اسلام

حمزہ جنگ فِجار اور حلف الفضول میں شریک تھے۔ وہ ابو طالب اور دیگر اعمام کے ہمراہ حضرت خدیجہ کا رشتہ مانگنے کی رسم میں حاضر تھے؛ حتی کہ بعض مآخذ میں ہے کہ گو کہ حمزء رسول اللہ(ص) کے ساتھ عمر کے لحاظ سے تھوڑا سا فرق رکھتے تھے اور ابھی نوجوان تھے اور خطبۂ نکاح حضرت ابو طالب نے پڑھا لیکن خدیجہ کبری کا رشتہ مانگنے کی رسم میں حمزہ کا نام بھی مذکور ہے۔[11]۔[12]۔[13]۔[14]۔[15]

ایک سال مکہ میں قحط پڑا اور لوگوں کو شدید خشک سالی کا سامنا کرنا پڑا، تو رسول اللہ(ص) نے اپنے کثیر العیال چچا ابو طالب(ع) کی مدد کی تجویز دی تو حمزہ نے جعفر کی سرپرستی قبول کی اور انہیں گھر لے گئے۔[16] (طبری کا کہنا ہے کہ جعفر کی سرپرستی عباس نے قبول کی تھی)۔[17]

حمزہ شکاری تھے اور شکار کیا کرتے تھے۔[18] دوران جاہلیت وہ عبد المطلب کے فرزندوں میں سے ایک تھے جنہوں نے قریش میں زعامت پائی اور اس قدر بلند مرتبہ تھے کہ بعض لوگ ان کے ساتھ معاہدے منعقد کرتے تھے۔[19]۔[20]۔[21]

بعد از اسلام

'مفصل مضمون: دعوت ذوالعشیرہ

جس دن رسول اللہ(ص) نے اپنے اقرباء اور اہل خاندان کو دعوت اسلام کی غرض سے چچا ابو طالب کے گھر آنے کی دعوت دی، حمزہ بھی موجود تھے۔[22]۔[23]

حمزہ حتی کہ اظہار اسلام سے قبل ابوطالب کی طرح مشرکین کے آزار و اذیت سے آپ(ص) کی حمایت کرتے تھے۔ بعض تاریخی روایات کے مطابق رسول اللہ(ص) کی شان میں ابو لہب اور دوسرے مشرکین کی توہین اور گستاخی کا جواب دیا کرتے تھے۔[24]۔[25]

قبول اسلام

ایک دن ابو جہل کوہ صفا کے قریب رسول اللہ(ص) کے سامنے آيا اور نازیبا الفاظ کہہ کر آپ(ص) کی شان میں اہانت کی۔ رسول اللہ(ص) نے ابو جہل کو جواب نہیں دیا۔ ایک کنیز بھی اس واقعے کی گواہ تھی۔ تھوڑی دیر بعد حمزہ شکار سے واپس مکہ پلٹ آئے۔ حمزہ کا معمول یہ تھا کہ شکار سے واپسی پر کعبہ کا طواف کرتے تھے اور اس کے بعد قریش کے اجتماعات میں چلے جاتے تھے اور ان سے بات چیت کرتے تھے۔ قریش حمزہ کی جوانمردیوں کے باعث ان سے محبت کرتے تھے۔ اس بار واپسی پر حمزہ اپنے معمول کے مطابق جانے پہچانے افراد کے ساتھ دیدار میں مصروف تھے کہ وہ کنیز ان کے قریب آئی اور کہا: "آپ نہیں یہاں موجود نہ تھے کہ دیکھ لیتے کہ ابو جہل نے محمد(ص) سے کیا کہا!" حمزہ فوری طور ابو جہل کے قریب پہنچے جو مسجد الحرام میں لوگوں کے درمیان بیٹھا تھا اور اپنی کمان اس کے سر پر دے ماری اور ابو جہل شدید زخمی ہوا۔ حمزہ نے کہا: "تو محمد کو گالیاں دیتا ہے؟ کیا تو نہیں جانتا کہ میں نے آپ(ص) کا دین اختیار کیا ہے؛ وہ جو بھی کہیں میں بھی وہی کہتا ہوں"۔ بنو مخزوم نے ابو جہل کی مدد کا ارادہ کیا لیکن اس نے کہا: حمزہ کو جانے دو کیونکہ میں نے ان کے بھتیجے کو ناخوشایند گالی دی ہے۔ اس واقعے کے نتیجے میں حمزہ مسلمانوں کے زمرے میں شامل ہوئے۔ قریش نے دیکھا کہ محمد(ص) کو حمزہ جیسے جوانمرد کی حمایت بھی حاصل ہوئی ہے اور کسی بھی منصوبے کے مقابلے میں آپ(ص) کی حفاظت کرے گا، تو ان کی ریشہ دوانیوں میں کافی حد تک کمی آئی۔[26]۔[27]۔[28]

بایں حال امام سجاد(ع) سے منقولہ حدیث کے مطابق مشرکین نے رسول اللہ(ص) کے سر پر اونٹنی کی بچہ دانی پھینک دی تو اس واقعے میں حمزہ کی غیرت ان کے اسلام لانے کا سبب بنی۔[29] تاہم بعض محققین نے مستند اور مدلل انداز سے لکھا ہے کہ حمزہ کا اسلام ابتداء سے ہی آگہی اور شناخت پر استوار تھا۔[30]

محدثین اور مؤرخین کا کہنا ہے کہ حمزہ بن عبدالمطلب بعثت کے دوسرے یا چھٹے سال میں ابو ذر کے اسلام لانے سے قبل مسلمان ہوئے۔[31]۔[32]۔[33]

حمزہ کا قبول اسلام ان کے اعزاء و اقارب کے قبول اسلام میں مؤثر تھا۔[34]

حمزہ کے قبول اسلام سے لے کر ہجرت تک کے حالات زندگی کے حوالے سے بہت کم معلومات تاریخ میں دستیاب ہیں؛ بس اتنا معلوم ہے کہ رسول اللہ(ص) نے اعلانیہ دعوت کا آغاز کیا تو حمزہ نے بھی اعلانیہ دعوت و تبلیغ کا آغاز کیا۔[35] وہ رسول اللہ(ص) کے ساتھ رہے اور حبشہ کی طرف ہجرت نہیں کی۔[36]

مشرکین نے شعب ابی طالب میں بنو ہاشم اور بنو المطلب کی ناکہ بندی کی تو مسلمین کے ساتھ تھے شعب میں تھے۔[37]

بعثت کے بارہویں سال دوسری بیعت عقبہ میں مدینہ کے بعض افراد نے رسول خدا(ص) کے ساتھ بیعت کی تو حمزہ اور علی(ع) موجود تھے اور نگرانی کررہے تھے کہ کہیں مشرکین قریب نہ آئیں۔[38]

ہجرت مدینہ

اصل مضمون: ہجرت مدینہ

حمزہ مکہ میں مواخات کے دوران زید بن حارثہ کے بھائی بنے اور یوم احد بھی ان ہی کو اپنا وصی قرار دے چکے،[39]۔[40] مدینہ میں مسلمانوں کے درمیان عہد اخوت کے دوران کلثوم بن ہدم کے بھائی بنے۔[41]

پیغمبر اکرم(ص) نے سب سے رمضان سنہ 1 ہجری میں جنگ کا سب سے پہلا پرچم حمزہ کے لئے باندھ لیا تاکہ وہ شام سے پلٹنے والے قریش کے کاروان تجارت کا راستہ روکنے کے لئے سریے کی قیادت کریں۔ حمزہ مہاجرین کے 30 سواروں کے ہمراہ ساحل سمندر پر واقع "عیص" نامی علاقے تک آگے بڑھے اور وہاں انہیں ابو جہل کی سرکردگی میں 300 سواروں کا سامنا کرنا پڑا۔ مجدی بن عمرو جہنی نامی شخص ـ جس نے دونوں فریقوں کے ساتھ امن کا معاہدہ منعقد کیا تھا ـ کی وساطت سے کوئی جھڑپ نہیں ہوئی اور فریقین لڑے بغیر واپس چلے گئے۔[42]۔[43]۔[44]

حمزہ مختلف غزوات ـ جیسے غزوہ ابواء، غزوہ ذوالعشیرہ اور غزوہ بنی قینقاع میں رسول خدا(ص) کے لشکر کے علم بردار تھے۔[45]

غزوہ بدر میں حمزہ سپاہ اسلام کی صف اول میں تعینات تھے،[46] اور رسول خدا(ص) نے انہیں اور علی(ع) اور عبیدہ بن حارث بن عبدالمطلب کو مشرکین کے چند سرغنوں کا مقابلہ کرنے کے لئے بھیجا۔ مختلف روایات کے مطابق عتبہ بن ربیعہ یا شیبہ حمزہ کے ساتھ دو بدو لڑائی میں مارے گئے۔[47]۔[48]

سد ابواب کے واقعے میں حمزہ کی طرف بھی اشارہ ہوا ہے۔ گویا حمزہ ان افراد میں سے تھے جن کے گھروں کے دروازے مسجد کی طرف کھلتے تھے۔ رسول خدا(ص) نے حکم دیا کہ علی(ع) کے گھر کے سوا دوسرے تمام گھروں کے دروازے بند کئے جائیں تو حمزہ بھی اس کا سبب پوچھا اور رسول خدا(ص) نے اس عمل کو اللہ کے ایک حکم کا نتیجہ قرار دیا۔[49] اگرچہ بعض روایات سے معلوم ہوتا کہ گویا سد ابواب کا واقعہ]] فتح مکہ کے بعد رونما ہوا لیکن اول الذکر قول کو ترجیح حاصل ہے۔[50]

سنہ 3 ہجری میں غزوہ احد سے قبل، حمزہ ان لوگوں میں شامل تھے جو مدینہ سے باہر دشمن کا سامنا کرنے کے حق میں تھے؛ یہاں تک کہ انھوں نے قسم اٹھائی کہ جب تک مدینہ سے باہر دشمن کے ساتھ دو دو ہاتھ نہ کریں گے کچھ بھی نہیں کھائیں گے۔ وہ سپاہ اسلام کے قلب کے امیر تھے اور دو تلواروں سے لڑرہے تھے اور اس جنگ میں انھوں نے عدیم المثال شجاعت کے جوہر دکھائے۔[51]۔[52]۔[53]۔[54]

شہادت

اصل مضمون: غزوہ احد

غزوہ احد 15 شوال سنہ 3 ہجری میں واقع ہوا اور اس جنگ میں حمزہ حارث بن عامر بن نوفل کی بیٹی کے غلام یا جبیر بن مطعم کے غلام "وحشی بن حرب" کے ہاتھوں شہید ہوئے۔[55]۔[56]۔[57]

ایک روایت کے مطابق حارث کی بیٹی نے وحشی کو آزادی کا وعدہ دیا اور اس کے عوض اس کو حکم دیا کہ اس کے باپ کے بدلے کے طور پر ـ جو جنگ بدر میں مارا گیا تھا ـ محمد(ص)، یا حمزہ یا علی(ع) کو قتل کرے۔[58]

ایک روایت یہ بھی کہ جبیر بن مطعم نے اس کو آزادی کا وعدہ دیا اور کہا کہ اس کے چچا طعیمہ بن عدی کا انتقال نے جو جنگ بدر میں مارا گیا تھا؛[59]۔[60]

تاہم اس میں کوئی شک نہیں ہے کہ ہند بن عتبہ جو ابو سفیان کی بیوی تھی کا باپ، بھائی اور چچا غزوہ بدر میں مارے گئے تھے اور بدلہ لینے کے محرکات بنت حارث اور جیبر کی نسبت اس کے ہاں کچھ زيادہ ہی تھے۔ بعض روایات میں منقول ہے کہ ہند نے ابتداء ہی سے وحشی کو مال و دولت کا وعدہ دے کر اس کو اس جرم کے ارتکاب پر اکسایا تھا۔[61]۔[62]

ہند کا مثلہ کرنا

حمزہ اور شہدائے احد کی موجودہ قبریں

مروی ہے کہ ہند بنت عتبہ نے نذر مانی تھی کہ حمزہ کا کلیجہ چبا لے گی![63] وحشی نے ابتداء میں علی(ع) کے قتل کا وعدہ دیا لیکن میدان میں جاکر اس نے حمزہ کو شہید کردیا اور ان کا کلیجہ نکال کر ہند بنت عتبہ کے حوالے کیا۔ ہند نے اپنا لباس اور زیور وحشی کو دیا اور وعدہ دیا کہ مکہ پہنچ کر 10 دینا بطور انعام اس کو ادا کرے گی۔ بعدازاں حمزہ کے جسم بےجان کے قریب آئی اور بدن کا مثلہ[64]۔[65] کردیا اور ان کے اعضاء جسمانی سے ہار، کنگن، بالیاں اور پازیب بنالی اور انہیں حمزہ کے کلیجے کے ہمراہ مکہ لے گئی۔[66] مروی ہے کہ معاویہ بن مُغیرہ اور ابو سفیان بن حرب نے بھی حمزہ کے بدن کا مثلہ کیا یا اس پر چوٹیں لگائیں۔[67]۔[68]

حمزہ کے پیکر بےجان کی حالت دیکھ کر بعض اصحاب[69]۔[70] قسم اٹھائی کہ وہ قریش کے 30 یا اس بھی زیادہ افراد کا مثلہ کریں گے لیکن سورہ نحل کی آیت 126 نازل ہوئی جو اگرچہ مسلمانوں کو ہوبہو کاروائی کی اجازت دی گئی مگر صبر کو بہتر چارہ کار قرار دیا گیا؛ ارشاد ہوا: اور اگر تم لوگ سزا دو تو ویسی ہی جیسی تمہیں سزا دی گئی تھی اور اگر صبر کرو تو وہ صبر کرنے والوں کے لیے بہتر ہے۔[71]

حمزہ کی ستر بار نماز جنازہ

حمزہ احد کے پہلے شہید تھے جن کی نماز جنازہ رسول اللہ(ص) پڑھائی اور بعدازاں شہداء کو باری باری لایا گیا اور حمزہ کے قریب رکھا گیا اور آپ(ص) نے ان شہداء اور حمزہ کی نماز جنازہ پڑھائی۔ یوں 70 مرتبہ حمزہ کی مستقل طور پر اور دیگر شہداء کے ہمراہ نماز جنازہ پڑھائی گئی۔[72]۔[73]۔[74] حمزہ کو بہن صفیہ کے لائے ہوئے کپڑے کا کفن دیا گیا کیونکہ مشرکین نے ان کے بدن کو برہنہ کردیا تھا۔[75]۔[76]۔[77]

حمزہ پر گریہ و بکاء

رسول اللہ(ص) نے حمزہ کی وہ حالت دیکھی تو روئے[78] اور پھر انصار کے اہل خانہ کو دیکھا جو اپنے شہداء کے لئے گریہ و بکاء کررہے تھے تو فرمایا: "...لیکن حمزہ کا کوئی رونے والا نہیں ہےسعد بن معاذ نے آپ(ص) کی بات سن لی اور انصاری خواتین کو رسول خدا(ص) کے گھر کے دروازے پر لائے اور وہ انھوں نے حمزہ کے لئے گریہ کیا؛ اس دن کے بعد جب بھی کوئی انصاری خاتون اپنے کسی مرحوم کے لئے رونا چاہتی پہلے حمزہ کے لئے گریہ و بکاء کرتی تھی۔[79]۔[80] مروی ہے کہ زینب بنت ابی سلمہ نے حمزہ کے سوگ میں تین دن تک لباس عزا پہنے رکھا۔[81]

حمزہ کا مقبرہ

مروی ہے کہ سیدہ فاطمہ زہراء(س) قبر حمزہ کی زیارت پر جاتی تھیں اور آپ(س) نے قبر کے گرد پتھر رکھ کر نشان لگایا تھا۔[82]۔[83]

امویوں نے خاندان رسالت کے ساتھ دشمنی کے باعث، حضرت حمزہ اور غزوہ احد کے دوسرے شہداء کی قبروں کے ساتھ غیر شائستہ رویہ روا رکھا۔ مروی ہے کہ ابو سفیان نے عثمان بن عفان کے دور حکومت میں قبر حمزہ پر لات ماری اور کہا "اے ابا عمارہ! جس چیز کے لئے تو نے کل ہمارے خلاف تلوار سونت لی تھی آج ہمارے نوجوانوں کے ہاتھوں کا کھلونا ہے جس کے ساتھ وہ کھیل رہے ہیں!"۔[84]

معاویہ نے غزوہ احد کے 40 سال بعد احد میں ایک چشمے یا کاریز کا پانی جاری کرنے کی غرض سے ـ گویا خاندان رسالت کے ساتھ دشمنی کی بنا پر ـ حکم دیا کہ حضرت حمزہ سید الشہداء سمیت شہدائے احد کی قبریں کھول دی جائیں اور ان کو دوسرے مقام پر دفنا دیا جائے۔ اس اقدام کے بعد بعض شہداء منجملہ حمزہ کی قبروں کے مقامات تبدیل ہوگئے۔[85]۔[86]۔[87]۔[88]

حمزہ کے مزار کے اوپر قدیم الایام سے ایک مسجد اور بارگاہ تعمیر کی گئی تھی لیکن حجاز پر وہابیوں کے تسلط اور آل سعود کے بر سر اقتدار آنے کے بعد حضرت حمزہ کے مزار پر تعمیر شدہ گنبد و بارگاہ کو سنہ 1344 ہجری قمری میں منہدم کیا گیا۔[89]۔[90]

نیز مسجد حمزہ کو گرا دیا گیا اور مزار شہدائے احد کے مغرب میں ایک مسجد تعمیر کی گئی جو مسجد احد، مسجد علی اور مسجد حمزہ کے نام سے مشہور ہے۔[91]

حمزہ سید الشہداء کا مزار قدیم الایام سے مدینہ کی زيارت کا شرف حاصل کرنے والے زائرین اور حجاج ـ بالخصوص شیعہ اور ایرانیوں کی خاص توجہ کا مرکز رہا ہے۔

حمزہ کی منزلت

حمزہ کی شخصیت کی گہری تاثیر اور مقبولیت و ہر دلعزیزی کا ایک نمونہ یہ تھا کہ ان کی شہادت کے بعد بعض صحابیوں نے اپنے بچوں کو ان کے نام سے موسوم کیا۔[92]۔[93]۔[94] حضرت حمزہ اور جعفر طیار کی شہادت کو قریشیوں کے مقابلے میں بنو ہاشم کی طاقت میں کمی آنے اور رسول خدا(ص) کی طرف سے جانشینی کے واضح اعلان کے باوجود علی بن ابی طالب(ع) کی خلافت سے محروم ہونے کا سبب گردانا گیا ہے۔[95]۔[96]

حمزہ کے فضائل احادیث کی روشنی میں

امیرالمؤمنین(ع) اور دوسرے ائمہ(ع) نے مخالفین کے ساتھ بحث کے دوران حمزہ اور جعفر کے ساتھ اپنی قرابت پر فخر کا اظہار کیا ہے۔[97]۔[98]۔[99]

حمزہ کے فضائل اور کرامات کے سلسلے میں متعدد احادیث نقل ہوئی ہیں۔[100]۔[101] رسول اللہ(ص) نے حمزہ، جعفر بن ابی طالب اور علی(ع) کو لوگوں میں سب سے بہتر[102] اور بنو ہاشم کی نسل سے آنے والے 7 بہترین افراد کے زمرے میں شمار کیا[103] نیز علی(ع) جعفر اور حمزہ کو بہترین شہداء قرار دیا۔[104]

رسول اکرم(ص) فرمایا کرتے تھے کہ حمزہ نے قرابت کا حق ادا کیا اور نیک اعمال بجا لانے والے تھے۔[105]

احادیث میں حمزہ کے گھوڑے "وَرد" اور ان کی تلوار "لیاح"[106] اور دیگر ذاتی وسائل کی طرف اشارہ ہوا ہے جو ان کے معنوی عظمت کی علامت ہے جو صدیوں سے استوار ہے۔

اولاد

حمزہ سیدالشہداء کے تین بیٹے تھے: عمارۃ، یعلی اور عامر۔[107] ان کے بڑے فرزند عمارہ فتح عراق میں شریک تھے۔[108] یعلی پانچ بیٹوں کے باپ تھے۔[109] اس کے باوجود کہ بعض مآخذ نے حمزہ کی نسل منقطع ہونے پر تاکید کی ہے،[110]۔[111] دسویں صدی ہجری میں بعض افراد کو حمزہ کی اولاد کے عنوان سے متعارف کرایا گیا ہے۔[112]

حمزہ کی بیٹیوں کے متعدد اسماء متعدد مآخذ میں مذکور ہیں لیکن وہ سب ایک ہی بیٹی کی طرف لوٹتے ہیں جس کا نام مرجَّح یا امامہ ہے۔[113]۔[114]

امامہ کا نام حدیث غدیر کے راویوں کے زمرے میں درج ہوا ہے۔[115]

متعلقہ مضامین

حوالہ جات

  1. ابن سعد، الطبقات، ج3، ص8۔
  2. البلاذري، انساب الاشراف، ج3، ص282۔
  3. ابن کلبی، جمهرة النسب، ج1، ص28۔
  4. ابن هشام، السیرة النبویة، قسم 1، ص109۔
  5. رجوع کریں: الواقدی، المغازی، ج1، ص68۔
  6. ابن سعد، الطبقات، ج3، ص8۔
  7. رجوع کریں: الواقدی، المغازی، ج1، ص290۔
  8. نهج البلاغة، مکتوب شماره 28۔
  9. الزبیدی، تاج العروس، ج8، ص53۔
  10. ابن درید، الاشتقاق، ج1، ص45ـ46۔
  11. رجوع کریں: البلاذري، انساب الاشراف، ج1، ص98، 100، 103۔
  12. البلاذری، وہی ماخذ، ج2، 15۔
  13. الیعقوبی، تاریخ الیغقوبی، ج2، ص20۔
  14. ابن اسحاق، کتاب السیر والمغازی، ص82۔
  15. ابن هشام، السیرة النبویة، قسم1، ص189ـ190۔
  16. رجوع کریں: ابوالفرج اصفهانی، مقاتل الطالبیین، ص26۔
  17. الطبري، تاريخ الامم والملوک، ج2، ص313۔
  18. ابن حبیب، کتاب المُنَمَّق، ص243۔
  19. رجوع کریں: وہی مؤلف، کتاب المُحَبَّر، ص164ـ 165۔
  20. وہی مؤلف، کتاب المُنَمَّق، ص243۔
  21. الواقدی، المغازی، ج1، ص153۔
  22. ابن اسحاق، کتاب السیر والمغازی، ص145ـ146۔
  23. الطبري، تاريخ الامم والملوک، ج2، ص319ـ320۔
  24. رجوع کنید به البلاذري، انساب الاشراف، ج1، ص131۔
  25. الکلینی، الکافی، ج1، ص449۔
  26. شهیدی، تاریخ تحلیلی اسلام، ص49۔
  27. ابن اسحاق، السیر والمغازی، ص171-172۔
  28. ابن هشام، السیرة النبویة، قسم1، ص291ـ292۔
  29. الکلینی، الکافی، ج1، ص449، ج2، ص308۔
  30. العاملي، الصحیح من سیرة النبی، ج3، ص153ـ154۔
  31. ابن عبدالبرّ، الاستیعاب، ج1، ص369۔
  32. ابن سعد، الطبقات، ج3، ص9۔
  33. الکلینی، الکافی، ج8، ص298۔
  34. ابن سعد، الطبقات، ج3، ص123۔
  35. البلاذري، انساب الاشراف، ج1، ص123۔
  36. ابن هشام، السیرة النبویة، قسم 1، ص343ـ344۔
  37. ابن اسحاق،کتاب السیر والمغازی، ص160-161۔
  38. القمی، تفسیر القمی، ذیل انفال: 30۔
  39. ابن حبیب، کتاب المُحَبَّر، ص70۔
  40. ابن ہشام، السیرة النبویہ، قسم 1، ص505۔
  41. البلاذري، انساب الاشراف، ج1، ص270۔
  42. الواقدی، المغازی، ج1، ص9۔
  43. ابن هشام، السیرة النبویة، قسم 1، ص595ـ596۔
  44. ابن سعد، الطبقات، ج2، ص6۔
  45. ابن سعد، الطبقات، ج2، ص8ـ9 و ج3، ص10۔
  46. ابن سعد، الطبقات، ج3، ص12۔
  47. الواقدی، المغازی، ج1، ص68ـ69۔
  48. الطبري، تاريخ الامم والملوک، ج2، ص445۔
  49. السمهودی، وفاءالوفا، ج2، ص477-479۔
  50. العاملي، الصحیح من سیرة النبی، ج5، ص342 به بعد۔
  51. الواقدی، المغازی، ج1، ص211۔
  52. ابن سعد، الطبقات، ج3، ص12۔
  53. الواقدی، المغازی، ج1، ص226۔
  54. الواقدی، المغازی، ج1، ص76، 83، 259، 290۔
  55. ابن اسحاق، السیر والمغازی، ص323۔
  56. ابن سعد، الطبقات، ج3، ص10۔
  57. الواقدی، المغازی، ج1، ص285۔
  58. الواقدی، المغازی، ج1، ص285۔
  59. ابن اسحاق، السیر والمغازی، ص323، 329۔
  60. ابن هشام، السیرة النبویة، قسم 2، ص70ـ72۔
  61. البلاذري، انساب الاشراف، ج3، ص286ـ287۔
  62. القمي، تفسیر القمی، ج1، ص116۔
  63. ابن سعد، الطبقات، ج3، ص12۔
  64. مثلہ کرنا: یعنی کان اور ناک یا اطراف جسم سے کوئی عضو کاٹنا، کسی کے اعضاء جسمانی میں سے کوئی عضو کاٹنا (یادداشت به خط مرحوم دهخدا)۔
  65. فرهنگ لغت عمید۔
  66. الواقدی، المغازی، ج1، ص285ـ286۔
  67. البلاذري، انساب الاشراف، ج1، ص338۔
  68. ابن هشام، السیرة النبویة، قسم 2، ص93۔
  69. القمي، تفسیر القمی، ذیل آیت 126 سورہ نحل۔
  70. الطوسی، التبیان، ذیل آیت 126 سورہ نحل۔
  71. ابن اسحاق، السیر والمغازی، ص335۔
  72. ابن سعد، الطبقات، ج3، ص11، مقایسه کنید با ج3، ص16۔
  73. نهج البلاغة، مکتوب شماره 28۔
  74. الکلینی، الکافی، ج3، ص186، 70 تکبیریں۔
  75. ابن سعد، الطبقات، ج3، ص15ـ16۔
  76. البلاذري، انساب الاشراف، ج3، ص288ـ289۔
  77. الکلینی، الکافی، ج3، ص211۔
  78. ابن عبدالبرّ، الاستیعاب، ج1، ص374۔
  79. الواقدی، المغازی، ج1، ص315ـ317۔
  80. ابن سعد، الطبقات، ج3، ص11، قس ج3، ص17۔
  81. ابن اثیر، النهایة، ج5، ص68۔
  82. ابن سعد، الطبقات، ج3، ص19۔
  83. ابن شبّه نمیری، کتاب تاریخ المدینة المنورة، ج1، ص132۔
  84. ابن ابی الحدید، ج16، ص136۔
  85. الواقدی، المغازی، ج1، ص267ـ268۔
  86. ابن سعد، الطبقات، ج3، ص11۔
  87. ابن شبّه نمیری، کتاب تاریخ المدینة المنورة، ج1، ص133۔
  88. محمد باقر نجفی، مدینه شناسی، ج2، ص257۔
  89. جعفر خیاط، المدینة المنورة فی المراجع الغربیة، ص254۔
  90. نجمی، حمزه سیدالشهداء، ص191، 212۔
  91. قائدان، تاریخ و آثار اسلامی مکه مکرمه و مدینه منوره، ص332۔
  92. ابن سعد، الطبقات، ج5، ص186۔
  93. الکلینی، الکافی، ج6، ص19۔
  94. حاکم نیشابوری، المستدرک علی الصحیحین، ج3، ص196۔
  95. الکلینی، الکافی، ج8، ص189ـ190۔
  96. ابن ابی الحدید، شرح نهج البلاغة، ج11، ص111، 115ـ 116۔
  97. نهج البلاغة، نامه 28۔
  98. الطبري، تاريخ الامم والملوک، ج5، ص424۔
  99. نجمی، حمزه سیدالشهداء، ص37ـ50۔
  100. ابن سعد، الطبقات، ج3، ص12۔
  101. نجمی، حمزه سیدالشهداء، ص21ـ 35۔
  102. ابوالفرج اصفهانی، مقاتل الطالبیین، ص17۔
  103. الکلینی، الکافی، ج8، ص50۔
  104. الکلینی، الکافی، ج1، ص450۔
  105. ابن سعد، الطبقات، ج3، ص13ـ14۔
  106. ابن حبیب، کتاب المُنَمَّق، ص407 و411۔
  107. ابن سعد، الطبقات، ج3، ص8۔
  108. البلاذري، انساب الاشراف، ج3، ص288ـ289۔
  109. ابن سعد، الطبقات، ج3، ص9۔
  110. ابن سعد، الطبقات، ج3، ص9۔
  111. ابن قدامه، التبیین فی انساب القرشیین، ص147۔
  112. آقابزرگ طهرانی، الذریعة، ج26، ص96۔
  113. البلاذري، انساب الاشراف، ج3، ص283۔
  114. ابن اثیر، اسدالغابة، ج6، ص21، 147، 199، 219، 378۔
  115. امینی، الغدیر، ج1، ص139۔

مآخذ

  • قرآن کریم۔
  • آقا بزرگ طهرانی، الذریعة.
  • ابن أبی الحدید، عبد الحمید بن هبة الله المعتزلی، شرح نهج البلاغة، عيسى البابي، دار احياء الكتب العربية مصر، الطبعة الثانية 1387 ه‍ / 1967 ع‍ / منشورات مكتبة آية الله العظمى المرعشي النجفي قم - ايران 1404 ه‍
  • ابن اثیر، علی بن محمد، اسدالغابة فی معرفة الصحابة، چاپ محمد ابراهیم بنا و محمد احمد عاشور، قاهره 1970ـ1973 ع‍
  • ابن اثیر، مبارک بن محمد، النهایة فی غریب الحدیث و الاثر، چاپ طاهر احمد زاوی و محمود محمد طناحی، قاهره، 1383ـ1385 ه‍ / 1963ـ1965 ع‍ چاپ افست بیروت، [بی تا]
  • ابن اسحاق، السیر والمغازی، چاپ سهیل زکار، [بی جا]: دارالفکر، 1398 ه‍ /1978 ع‍ چاپ افست قم، 1368 ه‍ ش
  • ابن حبیب، کتاب المُحَبَّر، چاپ ایلزه لیشتن اشتتر، حیدرآباد، دکن، 1361ه‍ /1942، چاپ افست بیروت، [بی تا]
  • ابن حبیب، کتاب المُنَمَّق فی اخبار قریش، چاپ خورشید احمد فارق، بیروت، 1405ه‍ /1985 ع‍
  • ابن درید، الاشتقاق، چاپ عبدالسلام محمد هارون، بغداد، 1399ه‍ /1979 ع‍
  • ابن سعد، الطبقات (بیروت)
  • النميري البصري، أبو زيد عمر بن شبه، تاريخ المدينة المنورة (أخبار المدينة النبوية)، المحقق: فهيم محمد شلتوت، دار الفكر - قم - ايران 1410 ه‍ ق/ 1386 ه‍ ش
  • ابن عبدالبرّ، الاستیعاب فی معرفة الاصحاب، چاپ علی محمد بجاوی، بیروت، 1412ه‍ /1992 ع‍
  • ابن قدامه، التبیین فی انساب القرشیین، چاپ محمد نایف دلیمی، بیروت، 1408ه‍ /1988 ع‍
  • ابن کلبی، جمهرة النسب، ج1، چاپ ناجی حسن، بیروت، 1407ه‍ /1986 ع‍
  • ابن هشام، السیرة النبویة، چاپ مصطفی سقا، ابراهیم ابیاری، و عبدالحفیظ شلبی، [بیروت]: دارابن کثیر، [بی تا]
  • ابوالفرج اصفهانی، مقاتل الطالبیین، چاپ احمد صقر، قاهره، 1368ه‍ /1949 ع‍
  • امینی، عبدالحسین، الغدیر فی الکتاب و السنة و الادب، قم، 1416ـ1422ه‍ / 1995ـ2002 ع‍
  • البلاذري، احمد بن یحیی، انساب الاشراف، ج1، چاپ محمد حمیداللّه، مصر 1959، ج2، چاپ محمدباقر محمودی، بیروت، 1394ه‍ /1974، ج3، چاپ عبدالعزیز دوری، بیروت، 1398ه‍ /1978 ع‍
  • جعفر خیاط، «‌المدینة المنورة فی المراجع الغربیة »، در موسوعة العتبات المقدسة، تألیف جعفر خلیلی، ج3، بیروت: مؤسسة الاعلمی للمطبوعات، 1407ه‍ /1987 ع‍
  • حاکم نیشابوری، محمد بن عبداللّه، المستدرک علی الصحیحین، چاپ یوسف عبدالرحمان مرعشلی، بیروت، 1406 ع‍
  • زبیدی، محمد بن محمد، تاج العروس من جواهرالقاموس، چاپ علی شیری، بیروت، 1414ه‍ /1994 ع‍
  • سمهودی، علی بن عبداللّه، وفاءالوفا باخبار دارالمصطفی، چاپ محمد محیی الدین عبدالحمید، بیروت، 1404ه‍ /1984 ع‍
  • شهیدی، جعفر، تاریخ تحلیلی اسلام تا پایان امویان، تهران: نشر مرکز دانشگاهی، 1369 ع‍
  • الطبري، تاريخ الامم والملوک (بیروت)
  • طوسی، محمد بن حسن، التبیان فی تفسیر القرآن، چاپ احمد حبیب قصیر العاملي، بیروت، [بی تا].
  • العاملي، جعفر مرتضی، الصحیح من سیرة النبی الاعظم(ص)، بیروت، 1415ه‍ /1995 ع‍
  • القمي، علی بن ابراهیم تفسیر القمی، چاپ طیب موسوی جزائری، قم، 1404ق ع‍
  • قائدان، اصغر، تاریخ و آثار اسلامی مکه مکرمه و مدینه منوره، [تهران]، 1384 ه‍ ش
  • الکلینی، الکافی
  • محمدباقر نجفی، مدینه شناسی، ج2، بن، 1375 ه‍ ش
  • محمدصادق نجمی، حمزه سیدالشهداء علیه‌السلام، تهران، 1383 ه‍ ش
  • نهج البلاغة [امام علی بن ابی طالب(ع) ]، چاپ صبحی صالح، قاهره، 1411ه‍ /1991 ع‍
  • واقدی، محمد بن عمر، کتاب المغازی، چاپ مارسدن جونز، لندن، 1966 ع‍
  • یعقوبی، تاریخ

بیرونی روابط