حدیث من مات

پیغمبر اسلامؐ کا ارشاد ہے:
مَنْ ماتَ وَ لَمْ يَعْرِفْ إمامَ زَمانِہِ فَقَدْ مَاتَ مِيتَۃً جَاہِلِيَّۃ؛ جو شخص اپنے زمانے کے امام کی معرفت کے بغیر مرجائے، تو یقینا وہ جاہلیت کی موت اس دنیا سے چلا جائے گا۔

مناقب ابن شہرآشوب، ۱۳۷۹ھ،ج۱، ص۲۴۶؛

حدیث مَنْ ماتَ، رسول اللہ کی ایک معروف حدیث ہے، جس کے مطابق اپنے زمانے کے امام کی شناخت اور معرفت کے بغیر مرنے والا گویا جاہلیت کی موت اس دنیا سے چلا گیا ہے ۔یہ حدیث مختلف الفاط کے ساتھ شیعہ اور اہل سنت مآخذ میں نقل ہوئی ہے اسی بنا پر اسے شیعہ اور اہل سنت کا مورد اتفاق حدیث قرار دی جاتی ہے۔

البتہ شیعہ اور اہل سنت اس حدیث سے مختلف مفہوم اور مطلب اخذ کرتے ہیں: شیعہ اس حدیث کو امامت کے مسئلے سے مختص قرار دیتے ہوئے اس حدیث سے امام کی شناخت اور اطاعت کا واجب اور ضروری ہونا استنباط کرتے ہیں ۔ لیکن اہل سنت اس حدیث کو عام مسلم حکمرانوں سے مربوط قرار دیتے ہوئے مسلمانوں پر ان حکمرانوں کی اطاعت اور پیروی کو ضروری قرار دیتے ہیں۔

اہمیت

اسلامی منابع میں «من ماتَ» کی تعبیر کے ساتھ مختلف احادیث نقل ہوئی ہیں؛ لیکن معروف "حدیث من مات" سے مراد پیغمبر اکرمؐ کا یہ کلام ہے: «مَنْ ماتَ وَ لَمْ یعْرِفْ إمامَ زَمانِہِ مَاتَ مِیتَۃً جَاہِلِیۃ؛ جو شخص اپنے زمانے کے امام کی معرفت کے بغیر مرجائے، تو یقینا وہ جاہلیت کی موت اس دنیا سے چلا جائے گا۔

یہ حدیث مختلف تعابیر کے ساتھ نقل ہوئی ہے جو ایک دوسرے سے قدرے مختلف ہیں۔ مثال کے طور پر کتاب کافی میں یہ حدیث امام صادقؑ سے یوں نقل ہوئی ہے کہ پیغمبر اکرمؐ نے فرمایا: «مَنْ مَاتَ وَ لَیسَ لَہُ إِمَامٌ فَمِیتَتُہُ مِیتَۃٌ جَاہِلِیۃٌ؛ جو بھی دنیا سے اس حالت میں چلا جائے کہ اس کا کوئی امام نہ ہو تو گویا اس کی موت جاہلیت کی موت ہے۔» اسی طرح اہل‌ سنت کے بعض منابع میں یہ حدیث پیغمبر اسلامؐ سے یوں نقل ہوئی ہے: «مَنْ مَاتَ بِغَیرِ إِمَامٍ مَاتَ مِیتَۃً جَاہِلِیۃً؛ جو شخص بغیر امام کے مرجائے اس کی موت جاہلیت کی موت ہے۔»

علامہ مجلسی اس حدیث کو شیعہ اور اہل‌ سنت کے یہاں متواتر قرار دیتے ہیں۔ شیخ بہایی بھی کہتے ہیں کہ یہ حدیث شیعہ اور اہل‌ سنت کے یہاں مورد اتفاق ہے۔

جاہلیت کی موت سے مراد

پیغمبر اسلامؐ:
مَنْ مَاتَ بِغَیرِ إِمَامٍ مَاتَ مِیتَۃً جَاہِلِیۃً؛ جو شخص بغیر امام کے مرجائے اس کی موت جاہلیت کی موت ہے۔

احمد بن حنبل، مسند احمد، ۱۴۲۱ھ، ج۲۸، ص۸۸

کلینی نے حدیث «من مات» کو امام صادقؑ نقل کی ہے جس میں «جاہلیت کی موت» کی تعریف کی گئی ہے اس حدیث کا متن کتاب کافی میں یوں ہے:

ابن‌ ابی‌ یعفور نقل کرتے ہیں کہ: امام صادقؑ سے پیغمبر اکرمؐ کے اس حدیث: «جو شخص اس حالت میں مر جائے کی اس کا کوئی امام نہ ہو تو اس کی موت جاہلیت کی موت ہے» کے بارے میں سوال کیا: «آیا اس حدیث سے مراد کفر کی حالت میں مرنا ہے؟» امام صادقؑ نے جواب دیا: «اس سے مراد گمراہی کی حالت میں مرنا ہے۔ میں نے کہا جو شخص اس وقت ہمارے دور میں بھی مرے لیکن اس کا کوئی امام یا پیشوا نہ ہو تو اس کی موت جاہلیت کی موت ہے؟» امامؑ نے فرمایا: «ہاں»۔

حدیث کے منابع

شیعہ اور اہل‌ سنت کے بعض وہ منابع جن میں حدیث «من مات» نقل ہوئی ہے، درج ذیل ہیں:

شیعہ مآخذ

• کافی، تحریر کلینی
• کمال الدین و تمام النعمۃ، تحریر شیخ صدوق
• کفایۃ الاثر فی النص علی الائمۃ الاثنی عشر، تحریر خزاز رازی۔

اہل سنت مآخذ

• مسند احمد بن حنبل
• مسند ابوداود سلیمان بن داود طیالسی
• مسند الشامیین، ابوالقاسم طبرانی

اہل سنت مآخذ

من مات کی حدیث اہل سنت مآخذوں میں کچھ اختلاف سے نقل ہوئی ہے ۔مثلا مَنْ مَاتَ بِغَيْرِ إِمَامٍ مَاتَ مِيتَةً جَاهِلِيَّةًجو شخص امام کے بغیر مرا تو وہ جاہلیت کی موت مرا۔ بعض مآخذوں میں اس طرح نقل ہوئی ہے:مَنْ خَلَعَ يَدًا مِنْ طَاعَةٍ، لَقِيَ اللهَ يَوْمَ الْقِيَامَةِ لَا حُجَّةَ لَهُ، وَمَنْ مَاتَ وَ لَيْسَ فِي عُنُقِهِ بَيْعَةٌ، مَاتَ مِيتَةً جَاهِلِيَّةً جو شخص اپنا ہاتھ بیعت سے کھینچ لے وہ روز قیامت اس حال میں خدا کا سامنا کرے گا کہ جس کے پاس اپنے اس عمل پر کوئی دلیل نہیں ہو گی اور جس شخص کی گردن میں کسی کی بیعت نہیں ہو گی اور وہ مر جائے تو وہ جاہلیت کی موت مرا ہے ۔

علمائے اہل سنت مذکورہ حدیث کو صحیح اور حسن سمجھتے ہیں ۔

معنائے حدیث

شیعہ اور سنی علما نے اپنے اپنے کلامی عقائد کے مطابق اس حدیث سے استفادہ کیا اور اپنے نظریات کیلئے اس حدیث سے استناد کیا ہے۔

شیعہ

شیعیان بحث امامت میں اس حدیث کو تمام زمانوں میں امام کے ضروری ہونے پر دلیل کے طور پر ذکر کرتے ہیں اورامام کی پیروی اور اس کی پہچان کو ضروری سمجھتے ہیں۔ پس اس بنا بر اس روایت کی روشنی میں شیعہ اعتقادات کے مطابق اس روایت میں امام سے مراد اہل بیت اور امام معصوم ہے اور موجودہ دور میں امام مہدی پر اعتقاد رکھنا ضروری ہے ۔

اہل سنت

اہل سنت حضرات اس حدیث سے ایک اور مراد ذکر کرتے ہیں:

صحیح مسلم میں یہ حدیث اس عنوان :بَابُ الْأَمْرِ بِلُزُومِ الْجَمَاعَةِ عِنْدَ ظُهُورِ الْفِتَنِ وتحذير الدعاة إلى الكفر(فتنوں کے ظاہر ہونے کے وقت جماعت و اتفاق کے حفظ اور کفر کی دعوت دینے والوں سے اجتناب کا ضروری ہونا) کے ذیل میں مذکور ہے۔اسی سے مسلم کے نزدیک اس کے معنی کو مشخص کیا جا سکتا ہے ۔دوسرے بعض مآخذوں میں اس حدیث کو ایک دوسری حدیث :من مات مفارقًا للجماعة مات ميتة جاهلية(جماعت سے جدائی کی حالت میں مرنے والا شخص جاہلیت کی موت مرا ہے)کے ہم معنا سمجھتے ہیں۔

اہل سنت اس روایت میں امام سے مراد اسلامی حکومت کا حاکم سمجھتے ہیں کہ حفظ جماعت اور وحدت کی خاطر اس کی پیروی اور اتباع ضروری ہے

یہ حاکم اسلامی کی پیروی کا ضروری ہونا تمام مسلمان حاکموں کو شامل ہے ۔کسی حاکم کا ظالم اور گناگار ہونا اس حاکم کی پیروی میں کسی قسم کا خلل ایجاد نہیں کرتا ہے ۔ ابن تیمیہ نے اس حدیث کی وضاحت میں یزید بن معاویہ کی صحابہ اور تابعین کی بیعت کی تبعیت کو استنباط کیا ہے :

(واقعہ حرہ کے بعد مدینے کے یزید بن معاویہ کے سخت ترین مخالف عبدالله بن مطیع نے مکہ فرار کیا تو عبد اللہ بن عمر اسکی ملاقات کیلئے گیا تو انکے درمیان یہ گفگتو ہوئی :ابن مطیع: ابن عمر کے ٹیک لگانے کیلئے تکیہ رکھو۔ ابن عمر:میں تیرے پاس بیٹھنے کیلئے نہیں آیا۔میں تمہیں رسول خدا کی حدیث سنانے آیا ہوں:جس شخص نے اپنے ہاتھ کو (حاکم کی)اطاعت سے کھینچ لیا وہ قیات کے روز اس حال میں خدا کے روبرو ہوگا کہ وہ اپنے اس عمل کی کوئی دلیل نہیں رکھتا ہوگا اور اسی طرح جو شخص کسی شخص کی بیعت کے بغیر اس دنیا سے چلا جائاے گا وہ جاہلیت کی موت مرے گا ۔اس حدیث کو عبدالله بن عمر نے عبدالله بن مطیع کیلئے اسوقت بیان کی جب وہ یزید بن معاویہ کی بیعت کو توڑ چکا تھا جبکہ واقعہ حرہ میں یزید کے تحت فرمان لشکر ظلم اور ناشائستہ امور انجام دے چکا تھا ۔اس حدیث سے ہم یہ نتیجہ حاصل کرتے ہیں کہ حاکمان اسلامی کے مقابلے میں شمشیر سے قیام نہیں کرنا چاہئے اور اگر کوئی ان حاکمان کی بیعت کے بغیر اس دنیا سے چلا جاتا ہے وہ جاہلیت کی موت مرا ہے ۔

البتہ بعض اہل سنت منابع نے اس حدیث میں امام کے لفظ کو پیغمبر کے معنا میں بھی ذکر کیاہے اور وہ معتقد ہیں کہ انسان کو پیغمبر پر ایمان رکھنا چاہئے کیونکہ اس دنیا میں نبی ہی اہل زمین کا امام ہے