مسودہ:چشمے کا پانی
| یہ مقالہ ایک فقہی موضوع کے بارے میں توصیفی تحریر ہے اور دینی اعمال کے لئے معیار نہیں بن سکتا۔ دینی اعمال کے لئے دیگر مصادر کی طرف رجوع کریں۔ |
| بعض عملی اور فقہی احکام |
|---|
چشمے کا پانی ایسے پانی کو کہا جاتا ہے جو قدرتی طور پر زمین سے ابل کر نکلتا ہے اور اس کے نکلنے کی جگہ کو چشمہ کہتے ہیں۔[1] اس کے احکام کا ذکر طہارت، نماز اور احیائے موات کے ابواب میں کیا گیا ہے۔[2]
فقہا کے مطابق، اگر چشمے کا پانی بہتا ہو تو اس پر آبِ جاری کے احکام لاگو ہوتے ہیں؛ یعنی نجاست پہنچنے کی صورت میں صرف پانی کا وہ حصہ نجس ہوتا ہے جس کا رنگ، بو یا ذائقہ تبدیل ہو جائے، جبکہ چشمے کے منبع سے متصل حصہ پاک رہتا ہے، خواہ اس کی مقدار آبِ کُر سے کم ہی کیوں نہ ہو۔ البتہ ایسے چشمے کے بارے میں فقہا کے درمیان اختلاف ہے جس کا پانی کم ہو اور بہتا بھی نہ ہو۔ تاہم مشہور قول کے مطابق ایسے پانی پر آبِ جاری کے احکام لاگو نہیں ہوتے۔[3] اس کے باوجود، اگر چشمے کا پانی بظاہر جاری نہ ہو، لیکن اس کی کیفیت ایسی ہو کہ پانی نکالنے کے بعد دوبارہ منبع سے ابلنے لگے تو اس پر بھی آبِ جاری کے احکام لاگو ہوں گے اور جب تک اس کے اوصاف نجاست کے باعث تبدیل نہ ہوں، وہ پاک رہے گا۔ اسی طرح موسمی چشموں پر بھی صرف اسی وقت آبِ جاری کے احکام لاگو ہوتے ہیں جب ان سے حقیقتاً پانی جاری ہو رہا ہو۔[4]
جو چشمہ غیر آباد زمین میں بنایا جاتا ہے، اس کا دو طرح کا حریم ہوتا ہے۔ ایک چشمے کے قریب کا وہ علاقہ جو عام استعمال، پانی نکالنے اور چشمے کی صفائی کے لیے ضروری ہوتا ہے۔ اس علاقے میں مالک کی اجازت کے بغیر تصرف کرنا جائز نہیں ہے۔[5] دوسرا اس سے وسیع تر علاقہ ہے جس میں نیا چشمہ بنانا ممنوع ہے۔ مشہور فقہا کے مطابق، اس حریم کی حد نرم زمین میں ایک ہزار ذراع اور سخت زمین میں پانچ سو ذراع ہے۔[6] تاہم، بعض فقہا کے نزدیک اس کا معیار صرف یہ ہے کہ نئے چشمے کی تعمیر سے پہلے سے موجود چشمے کو نقصان نہ پہنچے؛ یعنی اگر کم فاصلے پر نیا چشمہ بنانے سے نقصان نہ ہو تو ایسا کرنا جائز ہے، لیکن اگر زیادہ فاصلے پر بھی نقصان پہنچنے کا اندیشہ ہو تو اس کی تعمیر جائز نہیں ہوگی۔[7]
چشموں کا خشک ہو جانا یا ان کے پانی میں کمی واقع ہونا نمازِ استسقا (بارش طلب کرنے کی نماز) کے جواز کے اسباب میں شمار ہوتا ہے۔[8] گرم پانی کے چشموں سے شفا طلب کرنا مکروہ قرار دیا گیا ہے، البتہ اس کراہت کے دائرے کے بارے میں فقہا کے درمیان اختلاف ہے۔ بعض فقہا نے ایسے پانی سے وضو یا غسل کرنے کو مکروہ قرار دیا ہے، جبکہ بعض نے اس کے ہر طرح کے استعمال کو مکروہ سمجھا ہے۔[9] تاہم، بہت سے فقہا کے نزدیک اس کی کراہت صرف علاج کی غرض سے استعمال کرنے تک محدود ہے۔[10]
جس چشمے کا کوئی مخصوص مالک نہ ہو، وہ مشترکہ املاک میں شمار ہوتا ہے اور سب لوگوں کو اس سے فائدہ اٹھانے کا یکساں حق حاصل ہے۔ تاہم، اگر کوئی شخص اس کا پانی حاصل کرکے اپنے قبضے میں لے لے تو وہ پانی کی اسی مقدار کا مالک بن جاتا ہے۔[11] اسی طرح، جو شخص کوئی چشمہ بناتا ہے، وہ اس کا مالک ہوتا ہے اور دوسرے لوگ اس کی اجازت کے بغیر اس میں تصرف کرنے کا حق نہیں رکھتے۔[12]
حوالہ جات
- ↑ نمونہ کے لئے ملاحظہ کیجئے: مؤسسۂ دائرۃ المعارف فقہ اسلامی، فرهنگ فقہ، ج3، ص180۔
- ↑ مثال کے طور پر ملاحظہ کیجئے: مؤسسۂ دائرۃ المعارف فقہ اسلامی، فرهنگ فقہ، ج3، ص180۔
- ↑ غروی تبریزی، التنقیح فی شرح العروة الوثقیٰ، ج1، ص112؛ حلی، دلیل العروة الوثقیٰ، ج1، ص65۔
- ↑ امام خمینی، توضیح المسائل، مسائل 30 تا 33۔
- ↑ خوئی، منہاج الصالحین، ج2، ص153۔
- ↑ شہید ثانی، الروضة البہیة، ج7، ص162-163؛ محقق سبزواری، کفایة الفقہ، مدرسۂ صدر مہدوی، ج2، ص555۔
- ↑ ابن جنید اسکافی، فتاویٰ ابن الجنید، ص223؛ علامہ حلی، مختلف الشیعہ، ج6، ص208۔
- ↑ نجفی، جواہر الکلام، ج12، ص151-152۔
- ↑ مقدس اردبیلی، مجمع الفائدة، ج11، ص288-289؛ طباطبائی کربلائی، ریاض المسائل، ج12، ص249؛ شہید ثانی، معالم الدین، ج1، ص402۔
- ↑ ابن ادریس، کتاب السرائر، ج1، ص95؛ فاضل ہندی، کشف اللثام، ج1، ص383؛ نجفی، جواہر الکلام، ج1، ص335۔
- ↑ نجفی، جواہر الکلام، ج38، ص123-124۔
- ↑ نجفی، جواہر الکلام، ج38، ص116؛ خوئی، منہاج الصالحین، ج2، ص165۔
مآخذ
- ابن شہید ثانی، حسن بن زین الدین، معالم الدین و ملاذ المجتہدین، قم، مؤسسۃ الفقہ للطباعة والنشر، 1418ھ۔
- ابن ادریس، محمد بن احمد، کتاب السرائر الحاوی لتحریر الفتاویٰ، قم، مؤسسۃ النشر الاسلامی، تابع جامعۂ مدرسین، 1410ھ۔
- ابن جنید اسکافی، محمد بن احمد، مجموعۂ فتاویٰ ابن جنید، جمع و ترتیب: علی پناہ اشہاردی، قم، مؤسسۃ النشر الاسلامی، تابع جامعۂ مدرسین، 1416ھ۔
- امام خمینی، سید روح اللہ، توضیح المسائل، المجموعۃ فقہ الشیعۃ (فتاویٰ المراجع)، تہران، ادارہ نشر و اشاعت وزارت ثقافت و تبلیغات اسلامی، 1372ہجری شمسی۔
- حلی، حسین، دلیل العروة الوثقیٰ، نجف، مطبعۃ النجف، 1379ھ۔
- خوئی، سید ابوالقاسم، منہاج الصالحین، قم، نشر مدینۃ العلم، 1410ھ۔
- شہید ثانی، زین الدین بن علی، الروضة البہیة فی شرح اللمعة الدمشقیة، قم، انتشارات داوری، 1410ھ۔
- طباطبائی کربلائی، سید علی، ریاض المسائل فی بیان الاحکام بالدلائل، قم، مؤسسۃ النشر الاسلامی، تابع جامعۂ مدرسین، 1412-1422ھ۔
- علامہ حلی، حسن بن یوسف، مختلف الشیعۃ فی احکام الشریعۃ، قم، مؤسسۃ النشر الاسلامی، تابع جامعۂ مدرسین، 1412-1419ھ۔
- غروی تبریزی، علی، التنقیح فی شرح العروة الوثقیٰ (الطہارة)، تقریر: سید ابوالقاسم خوئی، قم، دار الہادی للمطبوعات، 1410ھ۔
- فاضل ہندی، محمد بن حسن، کشف اللثام والابہام عن قواعد الاحکام، قم، مؤسسۃ النشر الاسلامی، تابع جامعۂ مدرسین، 1416-1424ھ۔
- مؤسسۂ دائرۃ المعارف فقہ اسلامی، فرهنگ فقہ مطابق مذہب اہل بیت(ع)، زیرِ نگرانی: سید محمود ہاشمی شاہرودی، قم، مؤسسۂ دائرۃ المعارف فقہ اسلامی، 1385ہجری شمسی۔
- محقق سبزواری، محمد باقر، کفایة الفقہ، اصفہان، مدرسۂ صدر مہدوی، بے تا۔
- مقدس اردبیلی، احمد بن محمد، مجمع الفائدة والبرہان فی شرح ارشاد الاذہان، قم، مؤسسۃ النشر الاسلامی، تابع جامعۂ مدرسین، 1403-1416ھ۔
- نجفی، محمد حسن، جواہر الکلام فی شرح شرائع الاسلام، تصحیح: عباس قوچانی اور علی آخوندی، بیروت، دار احیاء التراث العربی، ساتویں اشاعت، 1362-1369ہجری شمسی۔