مسودہ:ضامن آہو

ضامنِ آہو کے موضوع پر مصوری کا ایک شاہکار، جسے حسن اسماعیل‌ زادہ (وفات: 2006ء) نے تخلیق کیا اور جو آستان قدسِ رضوی کے میوزیم میں محفوظ ہے

۔

ضامن آہو امام رضاؑ کے مشہور القابات میں سے ایک ہے۔ یہ لقب لوگوں میں رائج ایک معروف واقعے سے ماخوذ ہے، اگرچہ یہ واقعہ معتبر حدیثی مصادر میں موجود نہیں ہے۔ اس مشہور حکایت کے مطابق ایک ہرن شکاری کے جال میں پھنس جاتا ہے اور اپنے بچوں کو دودھ پلانے کے لیے امام رضاؑ سے مدد طلب کرتا ہے۔ امام رضاؑ اس آہو کی ضمانت دیتے ہیں تاکہ وہ اپنے بچوں کو دودھ پلا کر دوبارہ شکاری کے پاس واپس آجائے۔ اس واقعے کا قدیم ترین اشارہ چوتھی صدی ہجری کے شاعر علی بن حماد بصری سے منسوب ایک شعر میں ملتا ہے۔

بعض محققین کے نزدیک اس لقب کی اصل بعض معتبر تاریخی واقعات ہیں، مثلاً امام رضاؑ کے روضۂ اقدس میں ہرن کا پناہ لینا، یا سلطان سنجر کے بیٹے کے شفا پانے کا واقعہ، جس کے نتیجے میں امام رضاؑ کی قبر مبارک پر باقاعدہ بارگاہ تعمیر کی گئی۔ بعض روایات میں اس سے ملتے جلتے واقعات رسول اکرمؐ اور بعض دیگر ائمہؑ کے بارے میں بھی نقل ہوئے ہیں۔ ضامنِ آہو کے اس واقعے نے شیعہ ثقافت، شاعری، مصوری اور دیگر فنون پر گہرے اثرات چھوڑے ہیں اور اسی کو موضوع بنا کر متعدد فن پارے تخلیق کئے گئے ہیں، جن میں ایران کے مشہور آرٹسٹ محمود فرشچیان کا وہ فن پارہ مشہورہے جسے "حریمِ حفاظت" فن پارہ کہا جاتا ہے۔

شیعہ ثقافت میں ضامن آہو

ضامنِ آہو امام علی بن موسیٰ الرضاؑ کے مشہور القابات میں سے ایک ہے، جس کی بنیاد لوگوں میں مشہور ایک داستان پر ہے۔ محققین کے مطابق یہ داستان معتبر تاریخی و حدیثی منابع میں موجود نہیں ہے۔ حیوانات کی حمایت کے حامل مضمون والی اس معروف روایت کے مطابق، ایک ہرن شکاری کے قبضے میں تھا۔ اس نے امام رضاؑ سے عرض کی کہ اسے اپنے بچوں کو دودھ پلانے کی اجازت دلا دی۔ امامؑ نے شکاری کے سامنے اس کی ضمانت دی۔ ہرن اپنے بچوں کے پاس گیا، دودھ پلایا اور پھر وعدے کے مطابق واپس آگیا۔ شکاری نے اس وفاداری اور امامؑ کے مقام سے متاثر ہوا کہ اس ہرن کو آزاد کردیا۔

کہا جاتا ہے کہ اس داستان کا سب سے قدیم ذکر (تفصیلات کے بغیر) چوتھی صدی ہجری کے شیعہ فقیہ علی بن حماد بصری کے ایک شعر میں ملتا ہے، جسے پہلی مرتبہ کتاب المناقب میں نقل کیا گیا۔

ضامن آهوعلی بن حماد[از ]

الذي لاذَ به الظَبيةُ

و القوم جلوس‌

مَن أبوه المرتضى‌

يَزكو و يَعلو و يَروس

ترجمہ: وہ علی بن موسیٰ ہیں جن کی پناہ میں سب لوگوں کے سامنے ایک ہرن آگیا۔ وہ ہستی جن کے والد مرتضیٰ (امیر المؤمنین علیؑ) ہیں، جو عظمت، رفعت اور سربلندی کے مالک ہیں۔

حریم حفاظت (ضامن آہو) کے نام سے ایرانی آرٹسٹ محمود فرشچیان کا نہایت معروف شاہکار

امام رضاؑ کو ضامنِ آہو کے لقب سے خصوصاً ایران، برصغیر پاک و ہند اور دیگر بہت سے علاقوں میں یاد کیا جاتا ہے۔ بعض دینی متون میں "ضامن" ہونے کا مفہوم آہو کی ضمانت نہیں بلکہ اپنے زائرین کی شفاعت کی ضمانت دینا بیان کیا گیا ہے۔

معتبر مصادر میں موجود وہ واقعات جو ضامنِ آہو سے متعلق ہیں

احمد مہدوی دامغانی کے مطابق، امام رضاؑ کو ضامنِ آہو کہنے کی اصل وجہ ایک دوسرا واقعہ ہے، جو قدیم اور معتبر منابع میں موجود ہے۔ شیخ صدوق نے کتاب عیون اخبار الرضا میں نقل کیا ہے۔ یہ واقعہ امام رضاؑ کی شہادت کے بعد آنحضرتؑ کے حرم میں رونما ہوا ہے۔ اس واقعے کے مطابق ابومنصور بن عبد الرزاق نامی ایک شخص ایک ہرن کے شکار میں تھا۔ ہرن بھاگتے ہوئے امام رضاؑ کے مزار کی دیوار تک پہنچا اور دیوار کے ایک شگاف میں داخل ہو کر نظروں سے اوجھل ہوگیا۔ شکاری نے اسے ایک الٰہی نشانی سمجھا اور اس کے بعد ہمیشہ امام رضاؑ کے وسیلے سے اللہ تعالیٰ سے دعائیں مانگتا رہا، جو قبول ہوتی رہیں۔

علامہ مجلسی نے بحار الانوار میں اس سے ملتا جلتا ایک اور واقعہ نقل کیا ہے۔ ان کے مطابق سلطان سنجر کے زمانے میں سلطان یا اس کے ایک وزیر کا بیٹا بیمار تھا۔ وہ شکار کے دوران ایک ایسے ہرن کے پیچھے آیا جو امام رضاؑ کے حرم میں پناہ لے چکا تھا۔ شہزادہ نے یہ منظر دیکھا، قبر مبارک پر حاضر ہوا اور اللہ نے اسے شفا عطا فرما دی۔ اسی واقعے کے بعد سلطان سنجر نے امام رضاؑ کی قبر پر ایک عظیم بارگاہ تعمیر کروائی۔ بعض محققین اسی واقعے کو امام رضاؑ کے لقب "ضامنِ آہو" کی اصل بنیاد قرار دیتے ہیں۔

واقعہ رونما ہونے کا مقام

مشہور روایت کے مطابق، ہرن کی ضمانت کا واقعہ امام رضاؑ کے مرو کی جانب سفر کے دوران سمنان اور دامغان کے درمیان پیش آیا، اسی نسبت سے اس مقام کو "آہوان" کہا جانے لگا۔ البتہ اس نام کی دوسری وجوہ بھی بیان کی گئی ہیں، مثلاً؛ امام رضاؑ کا اس مقام پر چند ہرنوں سے گفتگو کرنا جنہوں نے آپؑ کو دشمنوں کی خبر دی، یا اس علاقے میں ہرن کا کثرت سے ہونا وغیرہ۔

دیگر معصومینؑ اور آہو کی ضمانت

امام رضاؑ کے علاوہ دیگر معصومینؑ کے بارے میں بھی ہرن کی ضمانت کے واقعات نقل ہوئے ہیں، اگرچہ "ضامنِ آہو" کا لقب صرف امام رضاؑ کے ساتھ مشہور ہوا۔ فضل بن حسن طبرسی نے کتاب إعلامُ الوَریٰ میں رسول اکرمؐ کے بارے میں اسی نوعیت کا واقعہ نقل کیا ہے، شیخ مفید نے کتاب الاِختصاص میں امام زین العابدینؑ کے متعلق ایک روایت بیان کی ہے اور محمد بن حسن صفّار نے کتاب بَصائر الدَرَجات میں امام جعفر صادقؑ کے بارے میں ایسا ہی واقعہ نقل کیا ہے۔ بعض محققین کا کہنا ہے کہ مختلف معصومینؑ کے بارے میں اس کے مشابہ واقعات کا پیش آنا عقلاً ناممکن نہیں، بلکہ یہ ایک ممکن امر ہے۔

اس واقعے کے ثقافت اور فن پر اثرات

ضامنِ آہو کے موضوع پر مبنی اینیمیشن "آقای مہرباں" کا پوسٹر

ضامن آہو کی داستان نے ادب اور فن پر گہرے اثرات مرتب کیے ہیں۔ اس واقعے نے داستان گوئی، تصویری داستان گوئی اور فارسی شاعری پر بڑے پیمانے پر گہرے اثرات چھوڑے ہیں۔ آٹھویں صدی ہجری کے شاعر تاج الدین حسن بن سلیمان المعروف سلیمی تونی نے اس واقعے کو ایک منفرد انداز میں کربلا کے غم سے جوڑا ہے۔ ان کے مطابق، ہرن نے امام رضاؑ سے دیر سے واپس آنے کی وجہ یہ بیان کی کہ جمعہ کے دن وہ حضرت امام حسینؑ کی مجلسِ عزا میں شریک ہوگیا تھا۔

ضامن آهوسلیمی تونی[از مثنوی]

آهو نمود عرض که امروز جمعه بود

رفتم به سوی منزل و دیدم که وحشیان

جمعند جملگی به عزاداری حسین

مشغول تعزیت شدم من هم در آن مکان

دیر آمدن نداشت اماما جز این سبب

قربان خاک پای تو ای شاه انس و جان

ترجمہ: ہرن نے عرض کیا: آج جمعہ کا دن تھا۔ میں اپنے گھر کی طرف روانہ ہوا تو دیکھا کہ جنگل کے تمام جانور حضرت امام حسینؑ کی عزاداری میں اکٹھا ہیں۔ میں بھی اس مقام پر ان کی مجلس میں شریک ہوگیا۔ اے مولا! میری تاخیر کی وجہ اس کے سوا کچھ نہ تھی۔ آپؑ کے قدموں کی خاک پر قربان، اے انسانوں اور جانوں کے بادشاہ!

ضامن آہو کے موضوع پر متعدد تصویری شاہکار بھی تخلیق کیے گئے ہیں، جن میں استاد محمود فرشچیان کا مشہور فن پارہ "حریمِ حفاظت" خاص شہرت رکھتا ہے۔ تیرہویں صدی ہجری اور اس سے پہلے کے شعراء کے کلام میں بھی امام رضاؑ کو "ضامن" کہا گیا ہے، لیکن چودھویں صدی ہجری کے بعد اس موضوع پر شاعری میں نمایاں اضافہ ہوا ہے۔ ان میں سے ایک شاعر محمد یزدی نے یہ اشعار کہے ہیں:

گر آهوی چشمان تو شد دزد چه پروا

تا پادشه طوس بود ضامن آهو

ترجمہ: اگر تیری آنکھوں کا آہو دل چرا لے تو کیا غم، جب طوس کا بادشاہ خود ضامنِ آہو ہے۔

ای خفته در توسافشین علا[از غزل]

ای ضامن آه و آهو، مضمون ناب غزل‌ها

شور تو آهنگ اشعار، مضراب ضرب‌المثل‌ها

صیاد وقتی تو باشی از دام رستن نشاید

مدهوش فهمت مفاهیم، صیدت غزال غزل‌ها

پابوست ای خفته در توس، مهریه‌ی نوعروسان

دیدارت ای جان شیرین، آغاز ماه عسل‌ها

با آرزوهای بسیار سوی تو آرند زُوّار

بسیار پیران که بر دوش، بس کودکان در بغل‌ها...

ترجمہ: اے آہوں اور ہرنوں کے ضامن! آپ غزلوں کا حسین ترین مضمون ہیں۔ آپ کا عشق اشعار کی دھن ہے اور آپ کی یاد ضرب المثلوں کے ساز کی مضراب ہے۔ جب شکاری آپ جیسے ہوں تو دام سے رہائی کی آرزو بھی بے معنی ہو جاتی ہے۔ تمام معانی آپ کی معرفت پر حیران ہیں اور غزلوں کی ہرہرن آپ کے حسن و جاذبیت کی اسیر ہے۔ آپ کی بارگاہ پر حاضری نو بیاہتا دلہنوں کا سرمایۂ افتخار ہے اور آپ کی زیارت ان کی زندگی کی خوشیوں کا آغاز۔ بے شمار زائر اپنے دلوں کی آرزوئیں لے کر حاضر ہوتے ہیں؛ کوئی بوڑھا کسی کے سہارے اور کوئی بچہ اپنے والدین کی آغوش میں۔