مسودہ:واجبات پر اجرت لینا

واجبات پر اجرت لینے کا مطلب ہے کسی شرعی واجب عمل کی ادائیگی پر اجرت وصول کرنا۔ یہ مسئلہ شروع میں بعض عبادات کے ذیل میں زیر بحث رہا، لیکن شہید ثانی کے زمانے سے یہ باقاعدہ ایک فقہی قاعدہ کے طور پر فقہاء کےمورد توجہ قرار پایا اور اسے فقہ کے مختلف ابواب میں استعمال کیا جاتا رہا ہے جیسے نماز، تجہیز میت اور قضاوت وغیرہ۔ اس مسئلے کی اہمیت یہاں سےاجاگر ہوتی ہے کہ طب اور قضاوت جیسے کچھ ضروری پیشوں سے اس مسئلے کا گہرا تعلق ہے؛ کیونکہ اگر ان معاملات میں اجرت وصول کرنا حرام ہے تو ان میں کام کرنے والوں کی معیشت کے لیے کوئی راستہ تلاش کرنا ہوگا۔

واجبات کی ادائیگی پر اجرت وصول کرنے کے جائز ہونے کے بارے میں شیعہ فقہاء کےیہاں مختلف آراء پائی جاتی ہیں؛ بعض اسے بالکل حرام سمجھتے ہیں اور اس کے ذریعے سے ملنے والی اجرت کو حرام مال سمجھتے ہیں۔ سید ابو القاسم خوئی اسے جائز سمجھتے ہیں اور قصد قربت کے ساتھ منافات نہیں سمجھتے ہیں۔ فقہاء کا ایک اور گروہ واجبات کی اقسام میں فرق کا قائل ہے۔ وہ واجب تعبدی اور واجب تعیینی کی ادائیگی پر اجرت وصول کرنے کو جائز نہیں سمجھتے ہیں، لیکن واجب توصلی اور واجب کفائی میں اسے جائز سمجھتے ہیں۔

سماجی نظم و ضبط سے متعلق امور میں جیسے تعلیم و تربیت، طب، قضاوت اور عسکری امور، جنہیں واجبات نظامیہ کے نام سے جانا جاتا ہے، بعض فقہاء اجرت وصول کرنے کی ممانعت والے قاعدے کو قابلِ اطلاق نہیں سمجھتے؛ کیونکہ ان واجبات کو انجام نہ دینا معاشرتی نظام میں خلل کا سبب بنتا ہے۔ نیز، معصومینؑ کے زمانے میں بھی قاعدہ حرمت کے باوجود، ان کاموں کو انجام دینے کے لیے اجرت وصول کرنےکا عام رواج تھا، یہاں تک کہ مطلق طور پر اجرت لینے کوحرام سمجھنے والے فقہاء کی اکثریت نے بھی ان معاملات میں اجرت وصول کرنے کو مستثنیٰ قرار دیا ہے۔

مستحب اعمال کی ادائیگی پر اجرت وصول کے بارے میں بھی اختلاف رائے پایا جاتا ہے۔ جو لوگ واجبات پر اجرت لینے کو جائز سمجھتے ہیں وہ مستحبات میں بھی اجرت وصول کرنے کو جائز سمجھتے ہیں۔ البتہ مخالفین مستحبات میں اجرت وصول کرنے کو مکروہ سمجھتے ہیں۔