مسودہ:مرض الموت

مرض الموت یا موت کے قریب پہنچا دینے والی بیماری ایسی بیماری کو کہتے ہیں جس میں مریض کی موت واقع ہونے کا قوی اندیشہ ہو۔ فقہ میں اس بیماری کے دوران مالی تصرفات، اقرار، نکاح اور طلاق سے متعلق خصوصی احکام بیان ہوئے ہیں۔ مریض کے مالی تصرفات، خصوصاً ایک تہائی سے زیادہ مال میں تصرف کے بارے میں فقہاء کے درمیان اختلافِ رائے پایا جاتا ہے۔ مریض کا اقرار، اگر اس پر کسی قسم کی تہمت نہ ہو، تو پورے مال کے بارے میں معتبر ہے؛ لیکن اگر تہمت موجود ہو تو مشہور قول کے مطابق صرف ایک تہائی مال کی حد تک اس کا اقرار نافذ ہوگا۔ اس بیماری میں مرد کا نکاح، اگر دخول سے پہلے اس کی موت واقع ہو جائے، تو بعض شرائط کے تحت باطل قرار پاتا ہے۔ اسی طرح موت کے قریب پہنچانے والی بیماری میں بیوی کو طلاق دینا بھی بعض شرائط کے تحت ایسا سبب بن سکتا ہے کہ بیوی شوہر کے ترکے میں وارث بن جائے۔

تعریف

مرض الموت کی تعریف کے بارے میں فقہی منابع میں مختلف آراء بیان ہوئی ہیں۔ بعض تعاریف کے مطابق مرض الموت ایسی بیماری ہے جس میں مبتلا شخص وفات تک بسترِ بیماری سے اٹھ نہ سکے۔ علامہ حلی نے اسے ایسی بیماری قرار دیا ہے جس کے ظاہر ہونے کے ساتھ مریض کی موت یقینی ہو۔ صاحب جواہر کے نزدیک بھی ایسی بیماری جو عرفاً جان لیوا سمجھی جاتی ہو، اگرچہ اس کی مدت طویل ہوجائے، مرض الموت کہلاتی ہے۔ خوف و اضطراب، صحت یابی سے مایوسی اور موت کا انتظار کرنا اس بیماری کی خصوصیات میں شامل ہیں۔ اسی وجہ سے بعض فقہی منابع میں اسے «امراضِ مخوف» یعنی خوفناک اور جان لیوا بیماریوں کے عنوان سے یاد کیا گیا ہے۔

فقہی احکام

قریب المرگ مریض کے لیے فقہ میں بعض خصوصی احکام بیان ہوئے ہیں۔ فقہ کے مختلف ابواب، جیسے وصیت، اقرار، نکاح و طلاق اور معاملات میں اس بیماری سے متعلق احکام پر بحث کی گئی ہے۔

قریب المرگ مریض کے مالی تصرفات کا حکم

قریب المرگ مریض کے مالی تصرفات کی حدود کے بارے میں فقہاء کے درمیان اختلافِ رائے پایا جاتا ہے۔بعض فقہاء ایسے مریض کو اس کے ایک تہائی سے زیادہ مال میں تصرف کرنے کے معاملے میں محجور (ممنوع التصرف) قرار دیتے ہیں اور ان کے نزدیک ایک تہائی سے زیادہ مال میں اس کا تصرف ورثاء کی اجازت پر موقوف ہے۔ اس کے مقابلے میں بعض فقہاء، جن میں شیخ مفید بھی شامل ہیں، ایسے مریض کے مالی تصرفات کو صحت مند شخص کے تصرفات کی طرح نافذ اور معتبر سمجھتے ہیں۔ امام خمینی کے نزدیک ایسے مالی تصرفات جن کے مقابل میں کوئی عوض موجود ہو، خواہ وہ ایک تہائی سے زیادہ مال ہی میں کیوں نہ ہوں، نافذ اور معتبر ہیں۔

بلا عوض مالی معاملات، مثلاً ہبہ، وقف اور صدقہ کے بارے میں بھی فقہاء کے درمیان اختلاف پایا جاتا ہے۔ بعض فقہاء کے نزدیک اگر قریب المرگ مریض اپنے مال کے ایک تہائی سے زیادہ حصے میں اس قسم کا تصرف کرے تو اس کے لیے ورثاء کی اجازت ضروری ہے؛اس کے برعکس بعض فقہاء، جن میں امام خمینی بھی شامل ہیں، ایسے تصرفات کو ایک تہائی کی اس پابندی کے بغیر بھی صحیح قرار دیتے ہیں۔ ایسے مالی تصرفات جن کا نفاذ مریض کی وفات کے بعد ہونا ہو، وہ وصیت کے حکم میں شمار ہوتے ہیں اور ان پر وصیت سے متعلق احکام نافذ ہوں گے۔

اقرار

قریب المرگ مریض کے اقرار کے بارے میں بھی فقہاء کے درمیان اختلافِ رائے پایا جاتا ہے۔ مشہور قول کے مطابق اگر مریض کا اقرار کسی قسم کی تہمت یا مفاد کے شبہے کی زد میں نہ ہو تو اس کا اقرار پورے مال کے بارے میں معتبر اور نافذ ہے۔ لیکن اگر تہمت یا شبہ موجود ہو تو ایک تہائی سے زیادہ مال کے بارے میں کیے گئے اقرار کا نفاذ ورثاء کی اجازت پر موقوف ہوگا۔ بعض فقہاء، جن میں شیخ مفید اور شیخ طوسی شامل ہیں، اقرار کو ہر صورت میں معتبر اور نافذ قرار دیتے ہیں۔

نکاح

اگر مرض الموت میں مبتلا کوئی مرد اپنی بیماری کے دوران نکاح کرے اور اسی بیماری کے باعث مجامعت سے پہلے اس کی موت واقع ہوجائے تو فقہاء کے مطابق اس کا نکاح باطل ہوگا۔ ایسی صورت میں عورت نہ اس مرد کی وارث بنے گی، نہ اس کے لیے مہر اور عدّت ثابت ہوگی۔ لیکن اگر مجامعت انجام پائی ہو یا مرد اس بیماری سے صحت یاب ہوجائے تو نکاح صحیح ہوگا اور زوجیت کے تمام شرعی آثار، جن میں وراثت بھی شامل ہے، برقرار رہیں گے۔

طلاق

اگر مرض الموت میں مبتلا کوئی مرد اپنی بیماری کے دوران اپنی بیوی کو طلاق دے تو بعض شرائط کی صورت میں عورت اس کی وارث بن سکتی ہے۔ یعنی دی گئی طلاق، طلاق خلع یا طلاق مبارات نہ ہو؛ مرد طلاق کے ایک سال سے کم عرصے کے اندر وفات پاجائے؛ مرد نے وفات سے پہلے اس بیماری سے صحت یابی حاصل نہ کی ہو اور عورت نے اس مدت کے دوران کسی دوسرے شخص سے نکاح نہ کیا ہو۔ اس صورت میں عورت اپنے شوہر کی وارث ہوگی، اگرچہ شوہر کا انتقال اس کی عدّت ختم ہونے کے بعد ہی کیوں نہ واقع ہو۔