طلاق بائن

طلاق بائِنْ، اس طلاق کو کہا جاتا ہے جس میں طلاق کے بعد مرد اپنی بیوی کی طرف رجوع نہیں کر سکتا یعنی دوبارہ نکاح پڑھے بغیر اپنی بیوی نہیں بنا سکتا ہے۔ طلاق بائن کے مقابلے میں طلاق رِجعی آتا ہے جس میں عِدّت کے دوران مرد اپنی بیوی کی طرف رجوع کرسکتا ہے: یعنی دوبارہ عقد نکاح پڑھے بغیر اپنی مطلقہ عورت کو پھر سے اپنی زوجیت میں لے سکتا ہے۔ طلاق بائن کی چھ اقسام ہیں جن میں وہ عورت جس کے ساتھ عقد کے بعد ہمبستری سے پہلے طلاق ہوئی ہے، یائسہ عورت کی طلاق، طلاق خلع اور طلاق مبارات شامل ہیں۔ طلاق بائن کی عدت کے دوران عورت اور مرد ایک دوسرے کے مَحرم نہیں ہیں۔

طلاق

مقالهٔ اصلی: طلاق

شادی کے بندھن کے خاتمے کو طلاق کہا جاتا ہے۔ طلاق میں شادی کی طرح مخصوص صیغہ پڑھنا ضروری ہے؛ لیکن شادی کے برخلاف طلاق ایقاعات میں سے ہے؛ یعنی ایک طرفی ہے اور صرف مرد کی جانب سے واقع ہوتی ہے۔(یعنی بیوی کی طرف سے قبول کرنا ضروری نہیں) اسلام میں طلاق ایک جائز امر ہے؛ لیکن احادیث کے مطابق حلال چیزوں میں سے خدا کے نزدیک سب سے منفور امر ہے۔

تعریف

طلاق بائن اس طلاق کو کہا جاتا ہے جس میں مرد کو اپنی بیوی کی طرف رجوع کا حق نہیں ہے۔ طلاق بائن میں چاہے عورت کے لئے عدت ہو یا نہ ہو مرد کے لئے رجوع جائز نہیں ہے۔ طلاق بائن کے مقابلے میں طلاق رِجعی ہے جس میں مرد عدت کے دوران اپنی بیوی کی طرف رجوع کر سکتا ہے۔

اقسام

درج ذیل طلاقیں طلاق بائن شمار ہوتی ہیں:

• اس عورت کی طلاق جس کے ساتھ عقد کے بعد ہمبستری نہیں ہوئی ہے۔
• اس لڑکی کی طلاق جس کی عمر 9 سال مکمل نہیں ہوئی ہے۔
• یائسہ عورت کی طلاق
• طلاق خُلع
• طلاق مُبارات
• تیسری طلاق
• بعض مراجع کے توضیح المسائل میں طلاق بائن کی ایک اور قسم بیان ہوئی ہے وہ حاکم شرع کی طرف سے دی گئی طلاق ہے۔ طلاق کی اس قسم میں حاکم شرع کسی ایسے شخص کی بیوی کو طلاق دیتا ہے جو اپنی بیوی کو نہ نفقہ(خرچہ) دیتا ہے اور نہ ہی اسے طلاق دیتا ہے۔

احکام

طلاق بائن میں عدت کے دوران بھی مرد اور عورت ایک دوسرے کے مَحرم نہیں ہیں۔ اسی طرح زوجیت کے احکام جیسے شوہر کی اطاعت کا واجب ہونا، میاں بیوی کا ایک دوسرے سے ارث لینا، شوہر کی اجازت کے بغیر گھر سے خارج ہونا حرام ہونا اور مرد پر بیوی کا نفقہ یعنی خرجہ کا واجب ہونا وغیرہ بھی جاری نہیں ہوتے ہیں۔ البتہ اگر مطلقہ عورت حاملہ ہو تو وضع حمل تک اس کا نفقہ مرد پر واجب ہے۔