مسودہ:توقیت ظہور
| ظہور کی نشانیاں | |
توقیتِ ظہور یا ظہور کا وقت معین کرنا سے مراد امام مہدیؑ کے ظہور کے لئے کوئی خاص وقت مقرر کرنا ہے، مثلاً ظہور کے سال، مہینے، دن یا گھنٹے کا تعین کرنا۔ شیعہ روایات میں ظہور کا وقت معین کرنے سے منع کیا گیا ہے اور ایسا کرنے والوں کو جھوٹا قرار دیا گیا ہے۔ ان روایات کے مطابق ظہور کا وقت غیبی امور میں سے ہے اور اس کا علم صرف خداوند متعال کے پاس ہے۔
شیعہ معارف میں توقیت ظہور
توقیتِ ظہور سے مراد شیعوں کے بارہویں امام حضرت امام مہدیؑ کے ظہور کے لئے کوئی معین وقت، مثلاً گھنٹہ، دن، مہینہ یا سال مقرر کرنا ہے۔[1]
شیعہ حدیثی منابع میں ایسی روایات نقل ہوئی ہیں جن میں امام مہدیؑ کے ظہور کا وقت نامعلوم قرار دیتے ہوئے اس کے لئے وقت مقرر کرنے سے ممانعت اور وقت مقرر کرنے والوں کو جھوٹا قرار دیا گیا ہے۔[2] شیخ طوسی نے ان روایات کی بنیاد پر ظہور کے وقت کو نامعلوم قرار دیا ہے اور تصریح کی ہے کہ کوئی بھی انسان امام مہدیؑ کے ظہور کے وقت سے آگاہ نہیں ہیں۔[3] بعض علماء-- نے ظہور کا وقت مقرر کرنے سے اجتناب اور وقت مقرر کرنے والوں کی تکذیب کو زمانۂ غیبت میں شیعوں کے فرائض میں شمار کیا ہے۔[4]
بعض روایات میں ظہور کے وقت کو غیبی امور میں سے قرار دیتے ہوئے اس کا علم خداوند متعال کے ساتھ مخصوص بتایا گیا ہے۔[5] ان میں سے بعض روایات میں امام مہدیؑ کے ظہور کو قیامت کے وقت سے تشبیہ دی گئی ہے، جس کے وقوع کے وقت کو خدا کے سوا کوئی نہیں جانتا۔[6]
توقیت سے ممانعت کا فلسفہ
بعض محققین نے احادیث سے استناد کرتے ہوئے،[7] مؤمنین کو پر امید اور ظہور کے لئے ہمیشہ تیار رکھنے کو وقت ظہور کے نامعلوم ہونے کی حکمتوں میں سے قرار دیا ہے۔ اس نظریے کے مطابق اگر ظہور کے لئے کوئی معین وقت مقرر کیا جائے اور اس وقت ظہور واقع نہ ہو تو بعض افراد میں مایوسی پیدا ہوسکتی ہے یا وہ عقیدۂ مہدویت کے بارے میں شک و تردید کا شکار ہوسکتے ہیں۔[8]
بعض علما نے اس مسئلے کو بداء کے ساتھ بھی مربوط قرار دیا ہے۔ اس نظرئے کے مطابق بعض امور کے وقوع پذیر ہونے کا وقت مصلحت الٰہی کے تحت تبدیل ہوسکتا ہے۔ لہٰذا، ظہور کے لئے وقت مقرر کرنے اور مقررہ وقت پر ظہور واقع نہ ہونے سے شک و تردید کی فضا پیدا ہوسکتی ہے۔[9] اسی طرح، بعض منابع میں ظہور کے وقت کو عام لوگوں کے سامنے ظاہر نہ کرنا بھی اس کے نامعلوم ہونے کی حکمتوں میں شمار کیا گیا ہے۔[10]
توقیت اور وقت ظہور سے متعلق روایات
مہدویت کے موضوع سے مربوط بعض روایات میں ظہور سے پہلے پیش آنے والے واقعات، مثلاً سفیانی کا خروج اور صیحۂ آسمانی، نیز جمعہ اور عاشورا جیسے دنوں کو ظہور کے وقت کے طور پر ذکر کیا گیا ہے۔ بعض محققین کے مطابق ان روایات سے توقیت کا مفہوم اخذ کیا گیا ہے۔[11]
اس کے برعکس، بعض علما اس استنباط کو رد کرتے ہوئے توقیت ظہور اور ظہور سے متعلق واقعات کے وقت یا ان کی خصوصیات بیان کرنے کے درمیان فرق کے قائل ہیں۔ اس نظریے کے مطابق ظہور کی بعض نشانیوں یا اس سے متعلق واقعات کے وقت کا ذکر کرنا، ظہور کی کوئی معین تاریخ مقرر کرنے کے مترادف نہیں ہے۔[12]
توقیت ظہور کی بعض مثالیں
کہا گیا ہے کہ بعض اوقات ظہور کی نشانیوں کو معاصر شخصیات، حکومتوں یا واقعات پر منطبق کرکے ظہور کا وقت متعین کرنے کی کوشش کی گئی ہے۔ رسول جعفریان کے مطابق علامہ مجلسی کی بعض تصانیف میں[13] ظہور کی بعض نشانیوں کو صفوی حکومت پر منطبق کیا گیا ہے۔ علامہ مجلسی کے ہم عصر سید محمد میرلوحی موسوی نے اس نوعیت کے اطلاق پر تنقید کرتے ہوئے اسے توقیت کی ایک مثال قرار دیا ہے۔[14]
اسی طرح، آیت اللہ بہجت کی طرف ایک ایسا بیان منسوب کیا گیا ہے جس میں بوڑھے افراد کو امام مہدیؑ کے ظہور کی بشارت دی گئی تھی۔[15] اسے بھی توقیت کی ایک مثال کے طور پر پیش کیا گیا ہے؛ تاہم، ان کے دفتر نے اس بیان کی تردید کی ہے۔[16]
سنہ 1389 ہجری شمسی میں تیار ہونے والی دستاویزی فلم «ظہور بہت قریب ہے» میں ظہور سے متعلق بعض نشانیوں کو اس وقت کے سیاسی واقعات اور شخصیات پر منطبق کیا گیا اور امام مہدیؑ کے ظہور کو قریب قرار دیا گیا ہے۔[17] اس دستاویزی فلم پر شیعہ مراجع تقلید[18] اور مہدویت کے تخصصی مراکز[19] کی جانب سے تنقید کی گئی ہے۔
حوالہ جات
- ↑ سلیمیان، «تحلیل مفہومی توقیت ظهور حضرت مهدی(عج)...»، ص174۔
- ↑ کلینی، الکافی، ج1، ص368؛ ابن بابویہ، الإمامة و التبصرة من الحیرة، ص95؛ نعمانی، الغیبة، ص289؛ شیخ صدوق، کمال الدین و تمام النعمة، ج2، ص483۔
- ↑ طوسی، الغیبة، ص425۔
- ↑ اصفہانی، مکیال المکارم، ج2، ص387۔
- ↑ حلی، مختصر البصائر، ص434؛ شیخ حر عاملی، إثبات الهداة، ج5، ص261؛ مجلسی، بحارالانوار، ج53، ص3۔
- ↑ کلینی، الکافی، ج1، ص431۔
- ↑ کلینی، الکافی، ج1، ص369؛ نعمانی، الغیبة، ص296۔
- ↑ گودرزی، «تعیین وقت برای ظهور(توقیت)»، ص57۔
- ↑ اصفہانی، مکیال المکارم، ج2، ص390-391۔
- ↑ اصفہانی، مکیال المکارم، ج2، ص375۔
- ↑ سلیمیان، «تحلیل مفہومی توقیت ظهور حضرت مهدی(عج)...»، ص181۔
- ↑ سلیمیان، «تحلیل مفہومی توقیت ظهور حضرت مهدی(عج)...»، ص182۔
- ↑ مجلسی، کتاب رجعت، ص53-64؛ مجلسی، بحارالانوار، ج52، ص243۔
- ↑ جعفریان، «نظریه اتصال دولت صفویه با دولت صاحب الزمان علیه السلام»، ص748۔
- ↑ «دربارهی سخنان آیتالله بهجت و ناصری پیرامون ظهور»، ویب سائٹ انصاف نیوز۔
- ↑ «مطلب هشتم: تعیین وقت ظهور؛ بررسی برخی از شایعات منتسب به آیتالله بهجت قدسسره»، دفتر آیت اللہ بہجت کی ویب سائٹ۔
- ↑ «همه چیز درباره مستندی به نام ظهور بسیار نزدیک است»، ویب سائٹ پرسمان۔
- ↑ «پاسخ آیت الله مکارم شیرازی...»، حوزہ کا اطلاع رسانی مرکز؛ «نظر علما در مورد مستند ظهور بسیار نزدیک است»، مؤسسۂ ثقافتی دارالصادق کی ویب سائٹ۔
- ↑ «انتقاد مدیر مرکز تخصصی مهدویت از یک مستند جنجالی»، خبرگزاری فارس۔
مآخذ
- ابنبابویہ، علی بن حسین، الإمامة و التبصرة من الحیرة، تصحیح کنندہ: مدرسہ امام مہدی علیہ السلام، قم: مدرسہ الامام المہدی عجل اللہ تعالی فرجہ الشریف، 1404ھ۔
- اصفہانی، محمدتقی، مکیال المکارم فی فوائد الدعاء للقائم، قم: مؤسسہ الامام المہدی علیہ السلام، 1428ھ۔
- جعفریان، رسول، «نظریہ اتصال دولت صفویہ با دولت صاحب الزمان علیہ السلام (نمونہ ہائے تاریخی) بہ ضمیمہ رسالہ شرح حدیث دولتنا فی آخرالزمان»، پیام بہارستان، سال سوم، شمارہ 11، بہار 1390 ہجری شمسی۔
- حلی، حسن بن سلیمان، مختصر البصائر، تصحیح کنندہ: مظفر، مشتاق، قم: مؤسسہ النشر الاسلامی، 1421ھ۔
- سلیمیان، خدامرد، «تحلیل مفهومی توقیت ظهور حضرت مہدی(عج) و کارکرد آن در تعیین مصداق»، جامعہ مہدوی، شمارہ 11، بہار و تابستان 1404 ہجری شمسی۔
- شیخ حر عاملی، محمد بن حسن، إثبات الہداة بالنصوص و المعجزات، بیروت: اعلمی، 1425ھ۔
- شیخ صدوق، محمد بن علی، کمال الدین و تمام النعمة، تصحیح کنندہ: علی اکبر غفاری، تہران: اسلامیہ، 1395ھ۔
- طوسی، محمد بن الحسن، کتاب الغیبة للحجة، تصحیح کنندگان: تہرانی، عباد اللہ و ناصح، علی احمد، قم: دار المعارف الاسلامیہ، 1411ھ۔
- کلینی، محمد بن یعقوب، الکافی، تصحیح کنندگان: غفاری علی اکبر و آخوندی، محمد، تہران: دار الکتب الاسلامیہ، 1407ھ۔
- گودرزی، مجتبی، «تعیین وقت برای ظهور (توقیت)»، بین الاقوامی کانفرنس دکترین مہدویت، مہدویت و چیلنجز (ج1)، 1398 ہجری شمسی۔
- مجلسی، محمد باقر، کتاب رجعت، تحقیق: سید حسن موسوی، قم: دلیل ما، 1386 ہجری شمسی۔
- مجلسی، محمدباقر، بحار الأنوار الجامعة لدرر الاخبار الائمة الاطہار، بیروت: دار إحیاء التراث العربی، 1403ھ۔
- نعمانی، محمد بن ابراہیم، الغیبة، تصحیح کنندہ: علی اکبر غفاری، تہران: نشر صدوق، 1397ھ۔
- «دربارهی سخنان آیتالله بهجت و ناصری پیرامون ظهور» (آیت اللہ بہجت اور ناصری کے ظہور کے بارے میں بیانات کے متعلق)، انصاف نیوز ویب سائٹ، تاریخ درج خبر: 28 اگست 2022ء، تاریخ مشاہدہ:18 اکتوبر 2026ء۔
- «مطلب هشتم: تعیین وقت ظهور؛ بررسی برخی از شایعات منتسب به آیتالله بهجت قدسسره» (آٹھواں مطلب: ظہور کا وقت مقرر کرنا؛ آیت اللہ بہجت قدس سرہ سے منسوب بعض افواہوں کا جائزہ)، آیت اللہ بہجت کے دفتر کی ویب سائٹ، تاریخ درج خبر: 6 نومبر 2019ء، تاریخ مشاہدہ:18 اکتوبر 2026ء۔
- «همه چیز درباره مستندی به نام ظهور بسیار نزدیک است» (ظہور بہت نزدیک ہے» نامی ایک دستاویزی فلم کے بارے میں سب کچھ)، پرسمان ویب سائٹ، تاریخ درج خبر: 12 اپریل 2011ء، تاریخ مشاہدہ:18 اکتوبر 2026ء۔
- «پاسخ آیت الله مکارم شیرازی به سؤالاتی پیرامون مستند ظهور نزدیک است» (آیت اللہ مکارم شیرازی کا «ظہور نزدیک ہے» دستاویزی فلم کے بارے میں سوالات کے جوابات)، حوزہ نیوز ایجنسی، تاریخ درج خبر: 19 اپریل 2011ء، تاریخ مشاہدہ:18 اکتوبر 2026ء۔
- «نظر علما در مورد مستند ظهور بسیار نزدیک است» («ظہور بہت نزدیک ہے» دستاویزی فلم کے بارے میں علما کی رائے)، مؤسسہ ثقافتی دارالصادق کی ویب سائٹ، تاریخ مشاہدہ:18 اکتوبر 2026ء۔
- «انتقاد مدیر مرکز تخصصی مهدویت از یک مستند جنجالی» (مہدویت کے تخصصی مرکز کے مدیر کی ایک متنازع دستاویزی فلم پر تنقید)، فارس نیوز ایجنسی، تاریخ درج خبر: 8 اپریل 2011ء، تاریخ مشاہدہ:18 اکتوبر 2026ء۔