مسودہ:نقدین
| بعض عملی اور فقہی احکام |
|---|
 |
نقدین شیعہ فقہ میں سونے اور چاندی کے سکّوں کو کہا جاتا ہے۔[1] یہ اصطلاح زیادہ تر ربا[2] اور زکوٰۃ[3] سے متعلق فقہی مباحث میں زیر بحث آتی ہے۔ ربا کی دو قسمیں ہیں: ربائے معاملاتی اور ربائے قرضی۔[4] ربائے قرضی قرض دیتے وقت اصل رقم سے زیادہ کی ادائیگی کی شرط رکھی جانے کی صورت میں وجود میں آتا ہے، جب کہ ربائے معاملاتی سے مراد ایک ہی جنس کی دو اشیا (مثلاً سونے کے بدلے سونا) کا اس طرح تبادلہ کرنا ہے کہ ان میں سے ایک کی مقدار دوسری سے زیادہ ہو۔[5] فقہا کے مطابق اگر نقدین (سکّے یا ان کے مساوی مال) میں سے ایک کا تبادلہ دوسرے نقدین سے کیا جائے اور دونوں کی مقدار برابر نہ ہو، یا تبادلے میں تاخیر کے ساتھ اضافی مقدار وصول کی جائے، تو یہ اضافی مقدار «ربا» شمار ہوگی۔[6]
سونے اور چاندی پر زکوٰۃ صرف اسی صورت میں واجب ہوتی ہے جب وہ رائج سکّوں کی شکل میں ہوں اور لین دین میں استعمال ہوتے ہوں۔[7] لہٰذا غیر مسکوک سونے اور چاندی پر خواہ ان کی شکل یا استعمال کچھ بھی ہو، زکوٰۃ واجب نہیں ہوتی۔[8]
- سونا: سونے کے دو نصاب ہیں۔ پہلا نصاب: 20 شرعی مثقال ہے، جو رائج حساب کے مطابق 15 مثقال سونے کے سکوں کے برابر ہے۔ اس پر زکوٰۃ کی مقدار چالیسواں حصہ، یعنی 2.5 فیصد ہے۔ شیعہ فقہا کے مشہور قول کے مطابق ایک شرعی مثقال تقریباً 3 گرام اور 456 ملی گرام کے برابر ہوتا ہے۔ دوسرا نصاب: 4 شرعی مثقال، یعنی 3 مثقال رائج سکے ہیں۔ اس کا مطلب یہ ہے کہ اگر پہلے نصاب میں 3 رائج مثقال کا اضافہ ہو جائے تو مجموعی طور پر 18 رائج مثقال پر زکوٰۃ واجب ہوگی۔ اس کے بعد مزید ہر 3 رائج مثقال کے اضافے پر بھی کل مقدار کی زکوٰۃ واجب ہوگی۔ تاہم، اگر اضافی مقدار 3 رائج مثقال سے کم ہو تو اس اضافے پر زکوٰۃ واجب نہیں ہوگی۔[9]
- چاندی: چاندی کے بھی دو نصاب ہیں۔ پہلا نصاب: 105 رائج مثقال ہے۔ اس پر زکوٰۃ کی مقدار چالیسواں حصہ، یعنی 2.5 فیصد ہے۔ دوسرا نصاب: 21 رائج مثقال ہے۔ یعنی اگر پہلے نصاب میں 21 مثقال کا اضافہ ہو جائے تو مجموعی طور پر 126 مثقال پر زکوٰۃ واجب ہوگی۔ اس کے بعد ہر مرتبہ مزید 21 مثقال کے اضافے پر بھی کل مقدار کی زکوٰۃ واجب ہوگی، لیکن اگر اضافہ اس مقدار سے کم ہو تو اضافی حصے پر زکوٰۃ واجب نہیں ہوگی۔[10]
| نوعیت | نصاب | زکات کی مقدار | شرط یا وضاحت |
|---|---|---|---|
| سونا | 20 مثقال شرعی (15 مثقال معمولی) | ایک چالیسواں حصہ (2.5%) | پہلا نصاب |
| پہلے نصاب کے بعد ہر 4 مثقال شرعی (3 مثقال معمولی) اضافہ | کل مال کا ایک چالیسواں حصہ (2.5%) | پہلے نصاب کے بعد | |
| چاندی | 105 مثقال معمولی | ایک چالیسواں حصہ (2.5%) | پہلا نصاب |
| پہلے نصاب کے بعد ہر 21 مثقال معمولی اضافہ | کل مال کا ایک چالیسواں حصہ (2.5%) | پہلے نصاب کے بعد |
حوالہ جات
- ↑ دہخدا، لغت نامہ، مادہ «نقدین»۔
- ↑ امام خمینی، کتاب البیع، ج2، ص541-542۔
- ↑ نجفی، جواہر الکلام، ج15، ص65۔
- ↑ امام خمینی، کتاب البیع، ج2، ص541-542۔
- ↑ نمونہ کے لئے ملاحظہ کریں: محقق کرکی، جامع المقاصد، ج4، ص265؛ نجفی، جواہر الکلام، ج23، ص334؛ ابن براج، المہذب، ج1، ص362؛ ابن ادریس حلی، السرائر، ج2، ص253۔
- ↑ «معاملۀ صَرْف یا فروش طلا و نقره به طلا و نقره»، آیت اللہ سیستانی کے دفتر کی ویب سائٹ۔
- ↑ نجفی، جواہر الکلام، ج15، ص180-181۔
- ↑ امام خمینی، توضیح المسائل، ص392؛ فاضل لنکرانی، رسالۂ توضیح المسائل، ص316۔
- ↑ امام خمینی، توضیح المسائل، ص391؛ فاضل لنکرانی، رسالۂ توضیح المسائل، ص315-316؛ سیستانی، توضیح المسائل جامع، ج2، ص415-416۔
- ↑ نمونہ کے لئے ملاحظہ کیجئے: امام خمینی، توضیح المسائل، ص391؛ فاضل لنکرانی، رسالۂ توضیح المسائل، ص315-316؛ سیستانی، توضیح المسائل جامع، ج2، ص415-416۔
مآخذ
- ابنادریس، محمد بن منصور، السرائر الحاوي لتحرير الفتاوى، قم، اسلامی پبلشرز، 1410ھ۔
- ابنبراج، قاضی عبدالعزیز، المہذب، قم، اسلامی پبلشرز ، 1406ھ۔
- امام خمینی، سید روحاللہ، کتاب البیع، تہران، مؤسسۃ تنظیم و نشر آثار الإمام الخمینی، 1421ھ۔
- امام خمینی، سید روحاللّه، توضیح المسائل، محقق و مصحح: مسلم قلیپور گیلانی، بے جا، بے نا، 1426ھ۔
- دہخدا، علیاکبر، لغتنامہ، تہران، مؤسسہ تہران یونیورسٹی پبلشرز، 1377ہجری شمسی۔
- سیستانی، سید علی، توضیح المسائل جامع، مشهد، دفتر آیۃ اللہ سید علی سیستانی، 1443ھ۔
- فاضل لنکرانی، محمد، رسالہ توضیح المسائل، قم، بے نا، 1426ھ۔
- محقق کرکی، علی بن حسین، جامع المقاصد في شرح القواعد، قم، مؤسسہ آل البيت عليہم السلام، 1414ھ۔
- نجفی، محمدحسن، جَواہر الکلام فی شرحِ شرائعِ الاسلام، تصحیح عباس قوچانی و علی آخوندی، بیروت، دارُ اِحیاء التُّراثِ العربی، ساتویں اشاعت، 1404ھ۔
- «معاملۀ صَرْف یا فروش طلا و نقره به طلا و نقره» (معاملۂ صرف یا سونے اور چاندی کو سونے اور چاندی کے بدلے فروخت کرنا)، آیت اللہ سیستانی کے دفتر کی ویب سائٹ، تاریخ مشاہدہ: 29 اپریل 2026ء۔