لقطہ

لُقَطہ یعنی وہ چیز جو راستے وغیرہ میں پڑی مِل جائے اور اس کا مالک نامعلوم ہو۔ فقہا ایسی چیز کو اٹھانے سے منع فرماتے ہیں لیکن اگر کسی نے کوئی قیمتی چیز کو پا لیا تو ضروری ہے کہ عمومی جگہوں پر اس کے ملنے کا اعلان کرے تاکہ اس کا مالک مل جائے اور اگر مالک نہ ملے تو اس شخص کو چاہئے کہ مالک کی طرف سے اس مال کا صدقہ دے۔

مفہوم‌شناسی

لقطہ ایسی چیز کو کہتے ہیں جو راستے وغیرہ میں پڑی مِل جائے اور اس کا مالک نامعلوم ہو۔ اہل لغت نے اس کا یہ معنی کیا ہے کہ ہر وہ چیز جو زمین سے اٹھائی جائے وہ لقطہ ہے۔

علم فقہ میں لقطہ کے عنوان سے باقاعدہ ایک بخش موجود ہے۔

لقطہ کو اٹھانے سے ممانعت

فقہا نے لقطہ کو اٹھانے کو مکروہ شمار کیا ہے اور اس حکم کو حدیث سے اخذ شدہ سمجھتے ہیں۔ امام صادقؑ نے فرمایا: جو بھی چیز تمہیں پڑی مل جائے اسے نہ اٹھاؤ اس لئے کہ اگر لوگوں نے اسے نہیں اٹھایا تو اس کا مالک آکر اسے لے لیگا۔ دوسری روایت میں امامؑ سے ملے ہوئے سامان کے بارے میں سوال کیا گیا تو فرمایا: «اسے مت اٹھاؤ»

لقطہ کا حکم شرعی

مراجع تقلید روایات کی بنیاد پر اس بات کے معتقد ہیں کہ اگر کسی کو کوئی چیز مل جائے اور اسے کسی علامت کے ذریعہ مالک تک نہ پہنچا سکے تو اسے چاہئے کہ اس کے مالک کی طرف سے صدقہ دیدے۔ لیکن اس چیز میں کوئی ایسی علامت مل جائے جس سے اس کے مالک تک پہنچایا جا سکے تو اگر:

1. اس کی قیمت ایک درہم شرعی(تقریبا ۲۔۵ گرام چاندی) سے کم ہو تو اٹھانے والا اسے اپنے پاس رکھ سکتا ہے۔
2. اس کی قیمت ایک درہم شرعی سے زیادہ ہو تو اس کے مالک تک پہنچانے کے لئے اسے عمومی جگہوں پر اعلان کرنا چاہئے۔

اگر مالک نہ مل پائے تو اسے تین چیزوں میں اختیار ہے:

• اسے اپنے لئے رکھ لے۔
• اس چیز کو اس کے مالک کے لئے اپنے پاس رکھ لے کہ جب بھی وہ مل جائے اسے دیدے۔
• اس چیز کو مالک کی طرف سے صدقہ دیدے۔

لقطہ کے اعلان کا طریقہ

فقہا فرماتے ہیں کہ اگر کسی کو کوئی چیز مل جائے اور وہ اس کے مالک کی تلاش میں ہو تو اگر وہ اسی دن سے ایک ہفتہ تک روزانہ ایک مرتبہ اور اس کے بعد سے ایک سال تک ہر ہفتہ ایک مرتبہ عمومی جگہوں پر اعلان کرے تو یہ کافی ہے۔ البتہ اگر سال کے درمیان اس بات سے مایوس ہو جائے کہ اس کا مالک اب نہ ملے گا تو اسے چاہئے کہ اس مال کا صدقہ دیدے۔

خراب ہو جانے والا لقطہ

رسالہ مراجع تقلید میں اس طرح بیان ہوا ہے کہ اگر لقطہ ایسی چیز ہو جو جلدی خراب ہو جائے جیسے کھانا اور پھل وغیرہ، ایسی صورت میں اگر اس کی قیمت بہت کم ہو اور انسان یہ سمجھے کہ اس کا مالک اس چیز کے لئے بہت پریشان نہ ہوگا اور اسے خاص دلچسپی نہ ہوگی تو وہ اسے استفادہ کر سکتا ہے؛ لیکن اگر ایسا نہ ہو تو اسے چاہئے کہ جب تک وہ چیز خراب نہ ہو اس کی حفاظت کرے اور اگر مالک نہ مل پائے تو وہ اسے بیچ دے یا خود استعمال کر لے۔ پھر اس کے مالک کو قیمت ادا کرے اور اگر مالک نہ ملے تو اس کی طرف سے صدقہ دیدے۔

لقطہ حیوان

لقطہ اگر حیوان ہو تو اسے «ضالّہ» کہا جاتا ہے۔ اگر کسی کو گمشدہ جانور مل جائے تو اسے رکھنا جائز نہیں ہے اور اگر اسے رکھ لیا اور مالک کو بھی تلاش نہیں کیا تو ضروری ہے کہ خود حیوان یا اس کی قیمت کو صدقہ دے۔ البتہ، اگر جانور غیر آباد علاقے میں پایا جائے اور جانور - جیسے بھیڑ - اپنی حفاظت کرنے کے قابل نہیں ہے، اسے پکڑنا اور اس کی حفاظت کرنا جائز ہے چنانچہ اگر جسے جانور ملا ہے وہ مالک کو تلاش کرے اور وہ نہ ملے تو وہ اس کا مالک ہو سکتا ہے۔

متعلقہ صفحات

• مجہول المالک