حرام سے مخلوط مال

حرام سے مخلوط مال یا حرام سے مخلوط حلال مال اس مال کو کہا جاتا ہے کہ جس کا کچھ حصہ شرعی طریقے سے جبکہ کچھ مال غیر شرعی طریقے سے حاصل ہوا ہو۔ اس کا مشکوک مال سے فرق یہ ہے کہ مشکوک مال کا حرام سے مخلوط ہونے میں تردید اور شک ہوتا ہے جبکہ یہاں پر اس بارے میں یقین ہے۔

اسلامی فقہ میں حرام مال سے مخلوط ہونے والے حلال مال کا استعمال جائز نہیں ہے۔ شیعہ فقہا کے فتوے کے مطابق اگر حرام مال کی مقدار اور اس کا مالک معلوم ہو تو اس مال کو مالک تک پہنچانا واجب ہے۔ لیکن اگر حرام مال کی مقدار معلوم ہو لیکن مالک نامعلوم ہو تو بعض فقہا کا فتوا یہ ہے کہ اتنی مقدار میں‌ مالک کی طرف سے صدقہ دیں اور احتیاط واجب کی بنا پر حاکم شرع سے اجازت بھی لے لیں۔ اس کے مقابلے میں اگر مالک معلوم ہو لیکن مقدار نامعلوم ہو تو اس حوالے سے بعض فقہا کا کہنا ہے کہ مالک کو راضی کرنا ضروری ہے اور اگر وہ کسی طور راضی نہیں ہوا تو اتنی مقدار میں‌ اسے دیں کہ اس کے مال کی مقدار دینے کا یقین ہو جائے۔

لیکن اگر مال کی مقدار اور اس کا مالک دونوں نامعلوم ہوں تو شیعہ فقہا کے فتوے کے مطابق خمس واجب ہونے کے سات موارد میں سے ایک یہی مورد ہے اور یہ شیعہ مجتہدین کا مشہور فتوا ہے۔ لیکن کہا گیا ہے کہ اہل سنت کے ہاں حرام مال سے مخلوط شدہ مال کا خمس دینا واجب نہیں‌ ہے۔

اگر حرام مال سے مخلوط مال کا خمس دینے کے بعد مالک کا پتہ چل جائے تو امام خمینی، سید‌ علی سیستانی اور مکارم شیرازی جیسے بعض مراجع تقلید کے فتوے کے مطابق احتیاط واجب کے طور پر اس کے مال کی مقدار کے مطابق اسے دینا ہوگا۔ جبکہ سید ابوالقاسم خویی، گلپایگانی، اراکی و مرزا جواد تبریزی جیسے بعض فقہا کے مطابق مالک کو کچھ دینا واجب نہیں ہے۔