فکری پسماندہ

فکری پسماندہ یا مستضعف اور ذہنی کمزور وہ شخص ہے جو حق کو باطل سے پہچانےکی صلاحیت نہیں رکھتا ہے یا دین اسلام تک اس کی رسائی نہیں ہے لیکن اگر حق اس کے سامنے پیش کیا جائے تو وہ اسے قبول کرتا ہے۔ فکری پسماندگی کے مقابلے میں عملی پسماندگی ہے جس کا مطلب ایک شخص اسلام سے تو واقف ہو چکا ہے لیکن ماحول اسے عمل کرنے کی اجازت نہیں دیتا ہے۔

قرآن میں مستضعف شخص کے بارے میں ایسے بیانات ہیں جن کے بارے میں مفسرین کا کہنا ہے کہ ان سے مراد فکری اور عقلی پسماندہ افراد ہیں۔ احادیث میں بھی فکری پسماندگی کا ذکر آیا ہے اور اس کے شرائط بیان کیے گئے ہیں۔ بعض کا خیال ہے کہ فکری طور پر پسماندہ شخص وہی جاہل قاصر ہے۔

فکری طور پر پسماندہ شخص کے لئے آخرت میں سزا کے حوالے سے تین نظریات پائے جاتے ہیں: 1۔جہنم میں داخل ہونگے، 2۔عذاب نہیں ہوگا، اور 3۔ ثواب کے مستحق ہونگے۔

فکری پسماندگی کے موضوع پر کوئی مقالہ یا کتاب نہیں لکھی گئی ہے؛ لیکن اس مسئلے کو بعض تفسیری کتابوں اور بعض مقالوں میں بیان کیا گیا ہے۔

تعریف

دینی ادبیات مین فکری پسماندہ اس شخص کو کہا جاتا ہے جو فکری کمزوری کی وجہ سے، یا اسلام تک رسائی نہ ہونے کی وجہ سے، حق کو باطل سے پہچاننے اور دینی تعلیمات کو جاننے کی صلاحیت نہیں رکھتا ہے؛ لیکن اگر اس کے سامنے حقیقت پیش کی جائے تو اسے قبول کرنے سے انکاری نہیں ہے۔

فکری پسماندگی عملی پسماندگی کے متضاد ہے؛ یعنی جس شخص نے حق کو پہچان لیا ہے لیکن ماحول کی گھٹن اسے اس پر عمل کرنے کی اجازت نہیں دیتی ہے۔ بعض محققین کے نزدیک بعض اوقات عقلی طور پر پسماندہ شخص اور جاہل قاصر ایک ہی معنی میں استعمال ہوتے ہیں۔

اہمیت

قرآن مجید کی بعض آیات میں "مستضعف" (پسماندہ) کا ذکر آیا ہے اور مفسرین نے اس کے بعض استعمالات کو عقلی پسماندہ کے معنی میں لیا ہے۔ احادیث میں زیادہ تر فکری مستضعف اور پسماندہ کی طرف اشارہ ہوا ہے۔ مثال کے طور پر امام کاظمؑ کی ایک روایت میں ہے کہ مستضعف وہ شخص ہے جس کے لئے دلائل و شواہد فراہم نہ کیے گئے ہوں اور اسے دینی اختلافات سے کوئی آشنائی نہ ہو؛ لیکن جب وہ اختلافات کے وجود سے آگاہ ہو جاتا ہے تو وہ مستضعف نہیں رہتا ہے۔ علامہ مجلسی نے اپنی کتاب بِحارُ الاَنوار میں «المستضعفین و المُرْجَونَ لِأمرِ اللہ» کے باب میں مستضعف کے بارے میں 37 احادیث نقل کیا ہے۔

فکری کمزور کون لوگ ہیں؟

شیخ صدوق نے تین قسم کے لوگوں کو فکری مستضعف اور پسماندہ قرار دیا ہے:

1. کچھ لوگ جو پیدائشی طور پر عقل کی نعمت سے محروم ہیں اور اسی حالت میں زندگی کرتے ہیں۔
2. وہ بچے جن کے پاس عقل تو ہے، لیکن وہ حق کو باطل سے تشخیص اور تمیز دینے سے پہلے ہی مر جاتے ہیں۔
3. وہ لوگ جن کے پاس عقل کی نعمت تو تھی، لیکن نبی اکرمؐ کی آمد یا کسی اور کا اللہ کی طرف دعوت کے وقت بڑھاپے کی وجہ سے تشخیص کی صلاحت کھو بیٹھے ہیں۔

بعض محققین کے مطابق جن لوگوں کے پاس عقل تو ہے لیکن ماحول اور پروپیگنڈے جیسے عوامل کی وجہ سے حق ان کے کانوں تک نہیں پہنچا ہے تو وہ بھی فکری طور پر مستضعف سمجھے جاتے ہیں۔

شیعہ فقیہ اور متکلم جعفر سبحانی نے فکری پسماندہ اور مستضعف افراد کے چار مصداق بیان کئے ہیں:

1. وہ شخص جو ایسی سرزمین میں پیدا ہوا ہے جہاں اس کے لیے دینی تعلیم میسر نہ ہو۔
2. وہ شخص جو ایسی سرزمین میں رہتا ہو جہاں فقیہ نہ ہونے کی وجہ سے اس کے لیے فرض ادا کرنا ممکن نہ ہو۔
3. کوئی ایسا شخص جس کی پرورش ایسے گھرانے میں ہوئی ہو جو اپنے وراثت میں ملے مذہب کو ٹھیک سمجھتا ہو۔
4. کوئی شخص جو ذہنی طور پر معذور ہو۔

قیامت میں مستضعف کی حالت

فکری پسماندہ لوگوں کے ساتھ قیامت کے دن اللہ تعالی کے سلوک اور برتاؤ کے بارے میں مفکرین کے درمیان اختلاف ہے۔ اس بارے میں تین آراء ہیں:

• بعض شیعہ متکلمین کا خیال ہے کہ فکری مستضعف لوگ قیامت کے دن جہنم میں داخل ہوں گے۔
• بعض مفسرین اور متکلمین کا کہنا ہے کہ سورہ نساء کی آیات 98 اور 99 اور ائمہؑ کی روایتوں کے مطابق فکری مستضعف لوگ نجات پائیں گے۔ وہ یہاں تک کہتے ہیں کہ اگر کوئی فکری مستضعف شخص اپنے فرائض کو خلوص نیت سے اپنے دین اور مذہب کے مطابق انجام دے تو وہ جہنم میں نہیں جاۓ گا اور ثواب کا بھی مستحق ٹھہرے گا۔
• ایک گروہ کا خیال ہے کہ اللہ تعالی ذہنی مستضعف لوگوں کو سزا نہیں دیتا، لیکن وہ انہیں اجر اور ثواب بھی نہیں دیتا ہے۔ اس لیے کہ عمل کے بدلے کاموں میں اجر و ثواب ملتا ہے اور اس گروہ کا حکم خدا کے فضل و کرم پر ہے۔

شیعہ متکلم، مرتضی مطہری نے فکری مستضعف کے حوالے سے دو انتہا پسندانہ اور تفریطی نظریات کی طرف اشارہ کیا ہے اور کہا ہے کہ یہ دونوں قرآن کے نقطہ نظر کے خلاف ہیں: تفریطی نقطہ نظر کے مطابق صرف شیعہ اعمال ہی قابل قبول ہیں اور اور فکری مستضعف کا عمل باطل ہے۔ امامت پر عقیدہ نہ ہونا ان تفریطی نظریہ کے طرفداروں کی اہم دلیل ہے جو فکری مستضعف کے اعمال قبول نہ ہونے کے لئے پیش کی گئی ہے؛ خواہ عمل انجام دینے والا مسلمان شیعہ مذہب کا ہو یا نہ ہو۔ مطہری کا کہنا ہے کہ فکری مستضعف میں انکار اور عناد و دشمنی کا عنصر نہ ہو تو اس کا عمل قبول ہوگا۔

مطالعاتی مآخذ

بعض محققین کے مطابق فکری مستضعف کے موضوع پر کوئی مضمون یا کتاب نہیں لکھی گئی ہے اور تفسیری کتابوں میں جن آیات میں "مستضعف" یا اس کے مشتقات ذکر ہوئے ہیں ان کی تفسیر میں مختلف جگہوں پر اس کے بارے میں کچھ باتیں ذکر ہوئی ہیں۔ مثال کے طور پر کتاب عدل الہی میں "غیر مسلموں کے نیک اعمال" کی بحث میں مطہری نے اس حوالے سے کچھ باتیں بیان کیا ہے۔ فارسی زبان میں اس حوالے سے مختلف مقالے لکھے گئے ہیں جن میں فکری مستضعف کے بارے میں قلم فرسائی کی گئی ہے۔ فارسی زبان پر عبور رکھنے والے قارئین ان سے استفادہ کرسکتے ہیں۔

متعلقہ مضامین

• جاہل قاصر
• جاہل مقصر