روزہ خوری

روزہ‌ خوری کا مطلب ہے رمضان کے مہینے میں بغیر کسی شرعی عذر کے روزہ توڑنا۔ یہ فعل اسلام میں حرام ہے اور گناہ کبیرہ سمجھا جاتا ہے۔ جو شخص جان بوجھ کر ماہ رمضان کے روزے توڑتا ہے اس پر روزوں کی قضاء کے ساتھ ساتھ کفارہ بھی واجب ہوتا ہے۔ فقہاء کے فتاوی کے مطابق پہلی اور دوسری مرتبہ روزہ توڑنے کی سزا 25 کوڑے ہیں۔ بعض فقہاء کے مطابق اگر کسی شخص کو دو مرتبہ روزہ توڑنے کی سزا دی جائے اور تیسری مرتبہ بھی روزہ توڑ دے تو اس کے لیے سزائے موت کا حکم ہے۔

شرعی جواز کی موجودگی میں بھی روزہ خوری کو فقہاء حرام سمجھتے ہیں اور ایسا کرنے والے کو سزا کا مستحق گردانتے ہیں۔ کچھ اسلامی ممالک میں اعلانیہ روزہ کھانے کو جرم سمجھا جاتا ہے اور ایسا کرنے والے کے لیے قید، کوڑے اور جرمانے جیسی سزائیں مقرر کی گئی ہیں۔

روزہ خوری کا مفہوم اور اس کا شرعی حکم

روزہ خوری کا مطلب ہے رمضان کے مہینے میں بغیر کسی شرعی عذر کے جان بوجھ کر روزہ توڑ دینا۔ روزہ خوری کو حرام عمل اور کبیرہ گناہ سمجھا جاتا ہے۔ کتاب کافی میں منقول امام جعفر صادقؑ کی ایک روایت کے مطابق جو شخص جان بوجھ کر اپنا روزہ توڑ دیتا ہے وہ دین کے دائرے سے نکل جاتا ہے۔

فقہی کتابوں میں روزے سے متعلق جوفقہی احکام بیان ہوئے ہیں ان میں سے ایک یہ ہے کہ اگر کوئی شخص جانتے بوجھتے رمضان کے روزے توڑ دے اور ایسا کرنا مباح عمل سمجھے تو وہ شخص مرتد ہوجاتا ہے؛ یہاں تک کہ اگرچہ وہ روزہ نہ توڑے، لیکن اسے حلال و مباح سمجھتا ہو، تب بھی وہ مرتد قرار پاتا ہے۔ فقہاء کے فتاوی کے مطابق روزہ خور پر روزوں کی قضا کے علاوہ ان کا کفارہ بھی واجب ہے۔

فقہاء کے نزدیک اگر کوئی شخص روزہ توڑدے لیکن اسے جائز نہیں سمجھتا تو وہ تعزیر یا شرعی سزا کا حقدار ہے۔ شرعی نقطہ نظر سے پہلی اور دوسری مرتبہ روزہ توڑنے کی سزا 25 کوڑے ہیں۔ بعض فقہاء کے فتویٰ کے مطابق اگر کوئی شخص دو مرتبہ سزا پانے کے بعد دوبارہ اس فعل کا ارتکاب کرے تو اس کی شرعی سزا پھانسی ہے۔ البتہ بعض فقہاء اس نظریے کے مخالف ہیں۔ شرعی نگاہ سے سزا کا مستحق ہونے کے علاوہ روزہ خور پر توڑے ہوئے روزوں کی قضا اور کفارہ بھی واجب ہے۔

سر عام کھانا پینا اور اس کی سزا

شیعہ اور سنی فقہاء شرعی عذر کے باوجود سرعام کھانے پینے کو جائز نہیں سمجھتے اور جو بھی جان بوجھ کر اور کھلم کھلا روزہ توڑتا ہے اسے سزا کا مستحق سمجھتے ہیں۔ کچھ مسلم ممالک میں سر عام روزہ توڑنے کو شرعی جرم سمجھا جاتا ہے اور اس جرم کے لیے قید، جلاوطنی، کوڑے، جرمانے اور بعض صورتوں میں پھانسی جیسی سزائیں مقرر کی گئی ہیں۔

اس سلسلے میں ایران کے اسلامی جرائم پرمبنی قانون میں دس دن سے دو ماہ تک قید اور 74 کوڑوں تک کی سزا مقرر کی گئی ہے۔ جمہوریہ اسلامی ایران کی سرزمین پر رہنے والے غیر مسلموں کو بھی رمضان کے مہینے میں سر عام کھانے پینے سے اجتناب کرنا چاہیے؛ کیونکہ ایران کے اندر اسلامی بنیاد پر بنائے گئے تعزیری قوانین اس ملک کے تمام باشندوں پر لاگو ہوتے ہیں۔ باقی اسلامی ممالک میں سے پاکستان میں بھی سر عام روزہ کھانے کی ممانعت کے سلسلے میں احترامِ رمضان آرڈیننس کے تحت عوامی مقامات پر کھانا پینا ممنوع قرار دیا جاتا ہے؛ احترام رمضان آرڈیننس 1981ء کل دس دفعات پر مبنی ہے۔ اس قانون میں سب سے پہلے پبلک مقامات کی وضاحت کی گئی ہے۔ آرڈینس کی دفعہ 3 کے تحت کوئی بھی ایسا فرد جس پر اسلامی قوانین کے تحت روزہ رکھنا لازم ہے اُسے روزے کے وقت کے دوران پبلک مقامات پر کھانا، پینا اور سگریٹ نوشی کی ممانعت ہے اور اگر کوئی ایسا کرتا پکڑا گیا تو اُسے تین ماہ کی قید یا پانچ سو روپے جرمانہ یا دونوں سزائیں دی جا سکتی ہیں۔