عدۃ من اصحابنا

عِدَّۃٌ مِنْ أَصْحَابِنَا (شیعوں کی کچھ تعداد) یا جَماعَۃٌ مِنْ أَصْحَابِنَا (شیعوں کا ایک گروہ)، علم حدیث کی ایک اصطلاح ہے، جو احادیث کی سند میں بطور اختصار استعمال ہوتی ہے۔ محدث، تمام راویوں کے نام ذکر کرنے کے بجائے، ان الفاظ کے ذریعے اس بات کی طرف اشارہ کرتا ہے کہ یہ حدیث ہمارے چند معتبر اصحاب (شاگردوں یا راویوں) سے منقول ہے۔ یہ تعبیر سب سے پہلے کلینی کی ایجاد ہے، اور انھوں نے اپنی مشہور کتاب الکافی میں چار ہزار سے زائد روایات کی سند میں یہی طریقہ اپنایا ہے۔

عبارت «عدّۃٌ من أصحابنا» راویوں کے ایک خاص گروہ کی طرف اشارہ ہے جن میں سے بعض کے اسامی مثلاً ابراہیم بن ہاشم(امام محمد باقرؑ کے اصحاب اور شیعہ محدثین میں سے تھے) وغیرہ رجالی منابع میں مذکور ہیں۔ البتہ بعض روایات میں ان راویوں کا نام معلوم نہیں، انہیں روایات مرسل (منقطع السند) کے زمرے میں شمار کی جاتی ہے۔

یہ طرزِ بیان بعد میں دیگر محدثین جیسے شیخ صدوق اور شیخ طوسی نے بھی اپنایا، اور اہل سنت کے بعض محدثین نے بھی اس کے مشابہ تعبیرات کا استعمال کیا ہے۔

اہمیت و مقام

«عدّۃٌ من أصحابنا» علمِ حدیث کی ایک مشہور اصطلاح ہے جو راویوں کے ایک خاص گروہ پر دلالت کرتی ہے جن کے نام محدثین نے طوالت سے بچنے کے لیے ذکر نہیں کیے۔ اس تعبیر کے خالق کلینی ہیں جنھوں نے اپنی کتاب الکافی میں پہلی بار اسے استعمال کیا۔ بعد ازاں، شیخ صدوق اور شیخ طوسی جیسے محدثین نے بھی اسی طریقے کی پیروی کی ہیں۔

کلینی نے راویوں میں سے ہر ایک کا نام لے کر متعدد اسانید ذکر کرنے کے بجائے «عدّۃٌ من أصحابنا» کی تعبیر استعمال کی ہے۔ چنانچہ اگر ان افراد کے اسامی کی شناخت ہو جائے تو چہ بسا کسی حدیث کی سند کم از کم چار الگ اسانید میں منقسم ہو جاتی ہے۔ «روش و شیوہ کلینی در الکافی» (کتاب الکافی میں کلینی کی طرز نگارش)، نامی مقالہ میں محقق حسن انصاری کے مطابق یہ تعبیر اس بات کی نشاندہی کرتی ہے کہ کلینی کے پاس ابتدائی طبقات کے راویوں کی احادیث تک رسائی کے مختلف اسناد اور منابع موجود تھے۔

یہ تعبیر الکافی کی چار ہزار سے زائد روایات میں پائی جاتی ہے، اور عموماً اسناد کی ابتداء میں ذکر کی گئی ہے۔ اس کے مشابہ تعبیرات مثلاً «جماعۃٌ من أصحابنا» اور «غیرُ واحدٍ من أصحابنا» بھی بعض مواقع پر دیکھنے کو ملتی ہیں۔ بعض وہابی علما نے اس تعبیر کو سند کے منقطع ہونے کی دلیل قرار دیا ہے، لیکن اہل سنت کی حدیث کتابوں میں بھی اس کے ہم معنی تعبیرات جیسے «بعض أصحابنا» اور «غیر واحدٍ من أصحابنا» موجود ہیں۔

عدّۃٌ من أصحابنا سے مراد کون ہیں؟

فقہی اور حدیثی منابع میں یہ بات زیر بحث رہی ہے کہ کلینی کے نزدیک ’’عدّۃ من أصحابنا‘‘ سے مراد کون سے راوی ہیں؟۔

شناختہ شدہ روات

کلینی نے یہ تعبیر بالعموم ان اسانید میں استعمال کی ہے جو احمد بن محمد بن عیسی، احمد بن محمد بَرْقی اور سہل بن زیاد سے منقول ہیں۔ ان میں سے بعض راویں کے نام، مثلاً ابراہیم بن ہاشم، علامہ حلی کی رجالی کتاب میں کلینی کا حوالہ دیتے ہوئے ذکر ہوئے ہیں، اور ان کی کا ذکر سند کے معتبر ہونے میں مؤثر ہے۔ البتہ آیت اللہ جعفر سبحانی نے علم رجال کے شیعہ محقق، محقق شوشتری سے نقل کیا ہے کہ اس تعبیر کے بعض اسامی جنہیں سہل بن زیاد نے نقل کیا ہے، میں تحریف ہوئی ہے۔

اسی طرح اگر کلینی نے اس تعبیر کے ساتھ راویوں کا نام بھی ذکر کیا ہو، مثلاً: «عدّۃٌ من أصحابنا، منہم محمد بن یحیی العطار» تو اس صورت میں وہ راوی شناختہ شدہ راوی شمار کیے جاتے ہیں۔

ناشناختہ روات

بعض مواقع پر تعبیر ’’عدّۃ‘‘ کے افراد کے نام معلوم نہیں ہوتے، جیسے:

• عدّۃٌ من أصحابنا عن جعفر بن محمد
• عدّۃٌ من أصحابنا عن عبداللہ بن البزاز
• عدّۃٌ من أصحابنا عن سعد بن عبداللہ
• عدّۃٌ من أصحابنا عن محمد بن عیسی

اس صورت میں بعض علمائے رجال ان احادیث کو روایات مرسلہ میں شمار کرتے ہیں، اگرچہ شیخ حرّ عاملی اس رائے سے متفق نہیں ہیں۔ علم رجال کے محقق اکبر ترابی شہرضائی کے مطابق اگر یہ تعبیر سند کے وسط یا آخر میں آئے اور کلینی کا مقصود واضح نہ ہو تو، راویوں کی وثاقت کے عدمِ احراز کی وجہ سے، روایت مرسل شمار ہوگی۔