قصیدہ میمیہ

قصیدہ میمیہ امام سجاد علیہ السلام کی مدحت میں پڑھا گیا ایک قصیدہ ہے جسے فرزدق نے مکہ میں ہشام بن عبد الملک کے سامنے کعبہ کے طواف کے دوران پڑھا تھا۔ اس قصیدے میں امام سجاد علیہ السلام کا مقام اور نسب، عصمت اور اخلاقی فضائل جیسے تقوا، ایفائے عہد، سخاوت و حلم بیان ہوئے ہیں۔ بعض تاریخی منابع میں کہا گیا ہے کہ یہ قصیدہ امام حسینؑ یا کسی اور کے لیے لکھا گیا ہے۔

فرزدق کے اس قصیدے کے اکثر مصرعے میم پر ختم ہوتے ہیں اس لئے قصیدہ میمیہ سے مشہور ہوا ہے۔ اس قصیدے کے بیت کی تعداد 2 سے 41 تک بیان ہوئی ہے۔ اس قصیدے کا ذکر قدیم شیعہ اور اہل سنت منابع میں ملتا ہے، جن میں شیخ مفید کی الاختصاص اور الارشاد، ابو الفراج اصفہانی کی اغانی، اصبہانی کی حلیۃ الاولیاء، اور مرزوقی کی شرح دیوان حماسہ قابل ذکر ہیں۔

فارسی شعرا میں سے جامی، وفا اور شاہ آبادی جیسے لوگوں نے فرزدق کے اس قصیدے کا منظوم ترجمہ کیا ہے جبکہ مرزوقی، استرآبادی اور تنکبانی نے اس کی تشریح کی ہے۔

تعارف اور اہمیت

قصیدہ میمیہ پہلی اور دوسری صدی ہجری کے شاعر فرزدق کا امام سجاد علیہ السلام کی شان میں لکھا ہوا ایک قصیدہ ہے جسے مکہ میں دسویں اموی خلیفہ ہشام بن عبد الملک کے سامنے خانہ کعبہ کا طواف کرتے ہوئے پڑھا تھا۔ اس قصیدے میں فرزدق نے امام سجاد علیہ السلام کے نسب کی عظمت کا تذکرہ کیا ہے اور آپؑ کی عصمت اور اخلاقی فضائل میں تقوی، ایفائے عہد، سخاوت اور حلم کو بیان کیا ہے۔ اس قصیدہ کے اکثر بیت چونکہ میم کے حرف پر ختم ہوتے ہیں اس لیے اسے میمیہ کے نام سے جانا جاتا ہے۔

فرزدق کے اس قصیدے نے بعض شاعروں کی توجہ اپنی طرف مبذول کرایا ہے اور بعض نے اس پر تخمیس اور تضمین لگائی ہے؛ جیسے تَخمِیس قصیدۃ الفرزدق جسے محمد بن اسماعیل حلی (متوفی: 1247ھ) نے تحریر کیا ہے۔ تخمیس یعنی کسی کے شعر سے الہام لیتے ہوئے یا اس کے ایک دو بیت اور قافیہ ردیف سے استفادہ کرتے ہوئے شعر پڑھنا۔

تیسری سے آٹھویں صدی تک کے قدیم مآخذ میں قصیدہ میمیہ کے ابیات کی تعداد 2 سے 41 تک بیان ہوئی ہے۔ مثال کے طور پر مَحاسِن و مَساوِی بیہقی میں 14 بیت، أَغانِی اصفہانی (تیسری اور چوتھی صدی ہجری) میں 21 بیت، ابن خَلَکان (ساتویں صدی ہجری) کی وَفَیات ُ الاَعیان میں 27 بیت، رجال کَشِی (پانچویں صدی ہجری) اور حافظ مُزِی (آٹھویں صدی ہجری) کی تَہذِیب ُ الکمالِ میں 28 بیت، الاِختِصاص شیخ مفید (چوتھی صدی ہجری)اور روضۃ الواعظین نیشابوری، (پانچویں صدی ہجری)میں 29 بیت اور مَناقب ابن شہر آشوب (چھٹی صدی ہجری) میں 41 بیت ذکر ہوئے ہیں۔ دیوان فَرَزدَق جو 1984ء میں منتشر ہوا اس میں ابیات کی تعداد 27 بیان ہوئی ہے۔

لکھنے کی وجہ

اس قصیدے کو لکھنے کے مقصد کے بارے میں کہا گیا ہے کہ ہشام بن عبد الملک کچھ شامیوں کے ساتھ حجر اسود کو چھونا چاہتا تھا؛ لیکن بِھیڑ کی وجہ سے وہ کامیاب نہیں ہوسکا اور شامی اس کے گرد جمع ہوگئے۔ اس وقت امام سجاد علیہ السلام داخل ہوئے اور لوگوں نے ان کی تعظیم کے لیے راستہ کھول دیا اور امامؑ حجر اسود کو چھونے میں کامیاب ہو گئے۔ شامیوں میں سے کسی ایک شخص نے ہشام بن عبد الملک سے پوچھا کہ یہ کون ہے کہ لوگ اس کے لیے راستہ بنا رہے ہیں؟ ہشام نے اس خوف سے کہ کہیں لوگ امام سجادؑ کی طرف مائل نہ ہوں، کہا کہ میں اسے نہیں جانتا ہوں۔ فرزدق، جو وہاں موجود تھے، نے ایک قصیدہ کے ذریعے امام کا تعارف کرایا اور ہشام کے منصوبوں کو ناکام بنایا۔

فرزدق کی محرومی اور گرفتاری

فرزدق نے جب ہشام بن عبدالملک کے سامنے امام سجاد علیہ السلام کی تعریف میں قصیدہ پڑھا تو ہشام غصے میں آ گیا اور اس کی سرزنش کی۔ کہا جاتا ہے کہ ہشام ہر سال فرزدق کو 1000 دینار دیتا تھا لیکن اس سال اس نے یہ رقم روک دی اور انہیں عسفان کے علاقے (مکہ اور مدینہ کے درمیان) میں قید کر دیا۔

امام سجادؑ کی طرف سے فرزدق کی حمایت

چوتھی اور پانچویں صدی ہجری کے شیعہ علماء میں سے شیخ مفید اور سید مرتضی کے مطابق میں جب فرزدق کی محرومی اور گرفتاری کی خبر امام سجادؑ تک پہنچی تو آپ نے بارہ ہزار دینار بھیجے اور معافی مانگی اور فرمایا کہ اگر میرے پاس اس سے زیادہ رقم ہوتی تو میں آپ کو بھیج دیتا۔

قطب راوندی کے مطابق، جب فرزدق کی قید کی مدت میں اضافہ ہوا اور ہشام نے اسے قتل کرنے کی دھمکی دی تو فرزدق نے امام سجادؑ سے ان کی رہائی کے لئے دعا کی درخواست کی۔ رہا ہونے کے بعد وہ امام علیہ السلام کے پاس گیے اور کہا کہ ہشام نے اس کا نام بیت المال کی لیسٹ سے نکال دیا ہے اور امام علیہ السلام نے اسے چالیس سال کے اخراجات کے برابر رقم دیا۔

قصیدہ کا مآخذ

مشہور روایات اور قدیم شیعہ منابع جیسے إِختِصاص اور إرشاد شیخ مفید، أمالی سیدِ مرتضی اور رجال نَجاشِی، کے مطابق، فرزدق نے یہ اشعار امام سجاد علیہ السلام کے لیے پڑھے ہیں۔ البتہ بعض قدیم منابع مثلاً ابن اعثم (دوسری اور تیسری صدی ہجری) کی الفتوح، طبرانی (چوتھی قمری صدی) کی معجم الکبیر اور اربیلی (ساتویں صدی ہجری) کی کشف الغُمّہ میں بیان ہوا ہے کہ فرزدق نے یہ اشعار امام حسینؑ کے لیے پڑھا ہے۔ اور فاکہی (تیسری صدی ہجری) کی کتاب اخبار مکہ جیسے دیگر منابع کے مطابق یہ قصیدہ علی بن عبداللہ بن جعفر بن ابی طالب کی شان میں پڑھا ہے۔

فرزدق کا قصیدہ میمیہ اہل سنت میں بھی نقل ہوا ہے؛ ان مصادر میں أَبُو الفَرَج اصفہانی (چوتھی صدی ہجری) کی أَغَانِی، اصبہانی کی حِليَۃُالأَولِياء، مرزوقی (پانچویں صدی ہجری) کی شرح دیوان حماسہ، ابن عَسَاکر کی تاریخ دمشق اور جُوزِی (چھٹی صدی ہجری) کی المُنتَظَم ، ابن ِخَلَکَان کی وَفَیَاتُ الاَعیَان، ابن ُالمَغَازِلِی (ساتویں صدی ہجری) کی مَنَاقِب اور ابن کثیر (آٹھویں صدی ہجری) کی بِدَایَہ و نہایۂ شامل ہیں۔

مضمون

فرزادق نے اپنی نظم میں امام سجاد علیہ السلام کو متعدد القابات کے ساتھ بیان کیا ہے جن میں سے کچھ یہ ہیں:

• امام سجادؑ کا نسب، ان کی فضیلت اور امام کا مقام؛
• امام کی عصمت اور پاکیزگی کی طرف توجہ؛
• امام کی جامعیت اور اسلام کا دفاع؛
• امام کی اخلاقی صفات کا تعارف کرانا، جیسے تقویٰ، سخاوت، عقلمندی، حلم، ایفائے عہد، محتاجوں کی دستگیری اور اچھے اخلاق؛
• کہ ان کی مخالفت کفر کی علامت ہے اور ان سے محبت کرنا دینداری کی علامت ہے؛
• ان کے دادا امام علیؑ کی جنگ حنین، جنگ احد، جنگ خندق، فتح مکہ اور جنگ خیبر میں شجاعت اور بہادری

قصیدہ کا متن

قصیدہ میمیہ

متن	ترجمه
یَا سَائلِی: أیْنَ حَلَّ الْجُودُ وَ الْکَرَمُ *** عِنْدِی بَیَانٌ إذَا طُلَّابُهُ قَدِمُوا	اے جود و کرم، شرافت و بزرگی کے مرکز کے بارے میں سوال کرنے والے، اس کا واضح جواب میرے پاس ہے اگر سوال کرنے والے میرے پاس آیئں۔
2 هَذَا الَّذِی تَعْرِفُ الْبَطْحَاءُ وَطْأتَهُ *** وَ الْبَیْتُ یَعْرِفُهُ وَ الْحِلُّ وَ الْحَرَمُ	یہ وہ شخصیت ہے کہ جس کے نقش قدم کو مقدس بطحا پہچانتی ہے اور بیت اللہ اور حل و حرم سب ان کو جانتے پہچانتے ہیں
3 هَذَا ابْنُ خَیْرِ عِبَادِ اللهِ کُلِّهِمُ *** هَذَا التَّقِیُّ النَّقِیُّ الطَّاهِرُ الْعَلَمُ	یہ تو اس ذات گرامی کے لخت جگر ہیں جو اللہ کے تمام بندوں میں سب سے بہتر ہیں (یعنی حضور اکرمؐ) یہ پرہیزگار، تقوی والے، پاکیزہ، صاف ستھرے اور قوم(قریش) کے سردار ہیں۔
4 هَذَا الَّذِی أحْمَدُ الْمُخْتَارُ وَالِدُهُ *** صَلَّی عَلَیْهِ إلَهِی مَا جَرَی الْقَلَمُ	وہ ہیں، خدا کے منتخب کردہ رسول احمد مختارصلی اللہ علیہ و آلہ و سلم ان کے والد ہیں، جن پر خدا ہمیشہ درود و سلام بھیجتا رہتا ہے
5 لَوْ یَعْلَمُ الرُّکْنُ مَنْ قَدْ جَاءَ یَلْثِمُهُ *** لَخَرَّ یَلْثِمُ مِنْهُ مَا وَطَی الْقَدَمُ	اگر حجر اسود کو معلوم ہو جائے کہ کون اسکا بوسہ لینے آرہا ہے تو بلا اختیار خود کو زمین پر گرا کر ان کے قدموں کا بوسہ لیتا
6 هَذَا عَلِیٌّ رَسُولُ اللهِ وَالِدُهُ *** أمْسَتْ بِنُورِ هُدَاهُ تَهْتَدِی الامَمُ	یہ علیؑ ہیں اور رسول اللہ صلی اللہ علیہ و آلہ و سلم ان کے والد ہیں۔ ان کی ہدایات سے امتیں ہدایت یافتہ ہوتی ہیں۔
7 هَذَا الَّذِی عَمُّهُ الطَّیَّارُ جَعْفَرٌ *** وَ الْمَقْتُولُ حَمْزَةُ لَیْثٌ حُبُّهُ قَسَمُ	جناب جعفر طیار اور جناب سید الشہداء حمزہ ان کے چچا ہیں۔ یہ وہ شیر الٰہی ہیں کہ بہادر اور دلیر جن کی قسم کھاتے ہیں۔
8 هَذَا ابْنُ سَیِّدَةِ النِّسْوَانِ فَاطِمَةِ *** وَ ابْنُ الْوَصِیِّ الَّذِی فِی سَیْفِهِ نِقَمُ	یہ عورتوں کی سردار فاطمہ زہرا کے فرزند ہیں اور وصی پیغمبر کے فرزند ہیں جن کی تلوار میں (مشرکین و کافرین کی) موت چھپی ہوتی ہے۔
9 إذَا رَأتْهُ قُرَیْشٌ قَالَ قَائلُهَا *** إلَی مَکَارِمِ هَذَا یَنْتَهِی الْکَرَمُ	جب ان کو قبیلہ قریش کے لوگ دیکھتے ہیں تو ان کو دیکھ کر اعتراف کرتے ہیں کہ شرافتیں اور بزرگیاں ان کی ذات پر ختم ہوتی ہیں۔
10 یَکَادُ یُمْسِکُهُ عِرْفَانَ رَاحَتِهِ *** رُکْنُ الْحَطِیمِ إذَا مَا جَاءَ یَسْتَلِمُ	جب وہ حجر اسود کو بوسہ دینے کے لئے آتے ہیں تو ایسا لگتا ہے کہ حجر اسود ان کی خوش بو پہچان کر ان کا ہاتھ پکڑ لے گا۔
11 وَ لَیْسَ قَوْلُکَ: مَنْ هَذَا؟ بِضَائِرِهِ *** الْعُرْبُ تَعْرِفُ مَنْ أنْکَرْتَ وَ الْعَجَمُ	(اے ہشام) تیرا یہ کہنا کہ ’یہ کون ہیں‘ اس سے ان کا کوئی نقصان نہیں ہے۔ جس کو تو نہیں پہچانتا اس کو عرب و عجم پہچانتے ہیں۔
12 یُنْمَی إلَی ذُرْوَةِ الْعِزِّ الَّتِی قَصُرَتْ *** عَنْ نَیْلِهَا عَرَبُ الإسْلَامِ وَ الْعَجَمُ	یہ عزت و بزرگ کے اس اوجِ کمال پر فائز ہیں جس کے حصول سے اسلام کے عرب و عجم قاصر ہیں۔
13 یُغْضِی حَیَاءً وَ یُغْضَی مِنْ مَهَابَتِهِ *** فَمَا یُکَلَّمُ إلَّا حِینَ یَبْتَسِمُ	وہ حیا سے آنکھیں جھکائے رکھتے ہیں، لوگ ان کی ہیبت سے نظر اٹھاکر انہیں دیکھ نہیں سکتے۔ ان سے گفتگو بس اس وقت ممکن ہے جب ان کے لبوں پر مسکراہٹ ہو۔
14 یَنْجَابُ نُورُ الدُّجَی عَنْ نُورِ غُرَّتِهِ *** کَالشَّمْسِ یَنْجَابُ عَنْ إشْرَاقِهَا الظُّلَمُ	ان کی پیشانی کے نور سے تاریکیاں کافور ہو جاتی ہیں۔ جس طرح آفتاب اندھیروں کو دور کر دیتا ہے۔
15 بِکَفِّهِ خَیْزُرَانٌ رِیحُهُ عَبِقٌ *** مِنْ کَفِّ أرْوَعَ فِی عِرْنِینِهِ شَمَمُ	ان کے ہاتھ میں ایک عصا ہے جو عمدہ خوشبو والا ہے، یہ عصا ایسے عمدہ اور بہترین شخص کے ہاتھ میں ہے جو بلند ناک والا ہے۔(یعنی عزت و شرف والا ہے)
16 مَا قَالَ: لَا، قَطُّ إلَّا فِی تَشَهُّدِهِ *** لَوْلَا التَّشَهُّدُ کَانَتْ لَاؤهُ نَعَمُ	وہ اس قدر سخی ہیں اگر تشہد میں ’لا‘ (نہیں) ہوتا تو ان کی زبان مبارک سے کبھی ’لا‘ نہ جاری نہ ہوتا۔
17 مُشْتَقَّةٌ مِنْ رَسُولِ اللهِ نَبْعَتُهُ *** طَابَتْ عَنَاصِرُهُ وَ الْخِیمُ وَ الشِّیَمُ	ان کی اصل رسول اللہ صلی اللہ علیہ و آلہ و سلم کی ذات اقدس ہے۔ پاک و پاکیزہ اخلاق و کردار اور بہترین عادات و اطوار۔
18 حَمَّالُ أثْقَالِ أقْوَامٍ إذَا فُدِحُوا *** حُلْوُ الشَّمَائلِ تَحْلُو عِنْدَهُ نَعَمُ	قوم کی ہدایت کا بار گراں کاندھے پر اٹھائے ہوئے ہیں، جس کو اٹھانے سے پہاڑ انکار کرتے ہیں۔
19 إنْ قَالَ قَالَ بِمَا یَهْوَی جَمِیعُهُمُ *** وَ إنْ تَکَلَّمَ یَوْماً زَانَهُ الْکَلِمُ	اگر وہ لبوں کو جنبش دیں تو سب ان کی بات کو تسلیم کرتے ہیں۔ ان کی گفتگو فصاحت و بلاغت کی زینت ہے۔
20 هَذَا ابْنُ فَاطِمَةٍ إنْ کُنْتَ جَاهِلَهُ *** بِجَدِّهِ أنْبِیَاءُ اللهِ قَدْ خُتِمُوا	اگر تو انہیں نہیں جانتا تو جان لو یہ فرزند فاطمہؑ ہیں۔ انہیں کے جد پر نبوت و رسالت کا اختتام ہوا۔
21 اللهُ فَضَّلَهُ قِدْماً وَ شَرَّفَهُ *** جَرَى بِذَاكَ لَهُ فِى لَوْحِهِ الْقَلَمُ	خدا نے ان کو اولین و آخرین پر فضیلت و شرف عطا کیا ہے۔ لوح محفوظ کے قلم نے ان کے بارے میں یہی تحریر کیا ہے۔
22 مَنْ جَدُّهُ دَانَ فَضْلُ الانْبِيَاءِ لَهُ * وَ فَضْلُ امَّتِهِ دَانَتْ لَهَا الامَمُ	یہ وہ ہیں جن کے جد کے فضائل کے سامنے تمام انبیاء علیہم السلام کے فضائل ہیچ ہیں۔ ان کے جد کی امت کو بھی تمام انبیاء علیہم السلام کی امت پر فضیلت حاصل ہے۔
23 عَمَّ الْبَرِيَّةَ بِالإحْسَانِ وَ انْقَشَعَتْ *** عَنْهَا الْعِمَايَةُ وَ الإمْلَاقُ وَ الظُّلَمُ	ان کی بخشش و عطا ساری مخلوقات کا احاطہ کئے ہوئے ہیں۔ ضلالت، گرسنگی اور تاریکی ان سے کوسوں دور ہے۔
24 كِلْتَا يَدَيْهِ غِيَاثٌ عَمَّ نَفْعُهُمَا *** يُسْتَوْكَفَانِ وَ لَا يَعْرُوهُمَا عَدَمُ	ان کے دونوں ہاتھ خدا کے ابر رحمت کی طرح ہیں جس سے ہر ایک فیضیاب ہو رہا ہے۔ عدم و محرومی کا یہاں گذر نہیں ہے۔
25 سَهْلُ الْخَلِيقَةِ لَا تُخْشَى بَوَادِرُهُ *** يَزِينُهُ خَصْلَتَانِ: الْحِلْمُ وَ الْكَرَمُ	ایسے نرم و نیک ہیں کہ سختی کا گذر نہیں ہے۔ انہوں نے بردباری اور شرافت کو زینت دی ہے۔
26 لَا يُخْلِفُ الْوَعْدَ مَيْمُوناً نَقِيبَتُهُ *** رَحْبُ الْفِنَاءِ أرِيبٌ حِينَ يُعْتَرَمُ	یہ اس قدر با برکت ہیں کہ کبھی وعدہ خلافی نہیں کرتے ہیں۔ ان کی بارگاہ ہر ایک کے لئے پناہ گاہ ہے۔
27 مِنْ مَعْشَرٍ حَبُّهُمْ دِينٌ وَ بُغْضُهُمُ *** كُفْرٌ وَ قُرْبُهُمُ مَنْجًى وَ مُعْتَصَمُ	یہ اس بزرگ خاندان کے فرزند ہیں جن کی محبت دین، جن کی دشمنی کفر اور جن سے قربت نجات اور سعادت کا سبب ہے۔
28 يُسْتَدْفَعُ السُّوءُ وَ الْبَلْوَى بِحُبِّهِمُ *** وَ يُسْتَزَادُ بِهِ الإحْسَانُ وَ النِّعَمُ	ان کی محبت و ولایت سے ہر فتنہ و شر دور ہوتا ہے۔ اور ان کے ذریعے احسان و کرم میں اضافہ ہوتا ہے۔
29 مُقَدَّمٌ بَعْدَ ذِكْرِ اللهِ ذِكْرُهُمْ *** فِى كُلِّ فَرْضٍ وَ مَخْتُومٌ بِهِ الْكَلِمُ	خدا کے ذکر کے بعد انہی کا ذکر سب سے مقدم ہے، اسی کے ذریعے آغاز ہوتا ہے اور اسی پر گفتگو ختم ہوتی ہے۔
30 إنْ عُدَّ أهْلُ التُّقَى كَانُوا أئمَّتَهُم *** أوْ قِيلَ: مَنْ خَيْرُ أهْلِ الارْضِ قِيلَ: هُمُ	اگر پرہیزگاروں کا تذکرہ ہو تو یہ پرہیزگاروں کے سردار ہیں۔ اگر دریافت کیا جائے ساری دنیا میں سب سے بہترین کون تو بس ان کا نام لیا جائیگا۔
31 لَا يَسْتَطِيعُ جَوَادٌ بُعْدَ غَايَتِهِمْ *** وَ لَا يُدَانِيهِمُ قَوْمٌ وَ إنْ كَرُمُوا	ان کی سخاوت کے بعد کسی سخی کی سخاوت کا ذکر نہیں ہو سکتا۔ کسی بھی قوم کے شریف اور بزرگ ان کے ہم رتبہ نہیں ہیں۔
32 هُمُ الْغُيُوثُ إذَا مَا أزْمَةٌ أزَمَتْ *** وَالاسْدُ اسْدُ الشَّرَى وَ الْبَأسُ مُحْتَدِمُ	قحط کے زمانہ میں یہ باران رحمت ہیں۔ اور جب جنگ کی آگ بھڑک اٹھے تو یہ مرد میدان ہیں۔
33 يَأبَى لَهُمْ أنْ يَحِلَّ الذَّمُّ سَاحَتَهُمْ *** خِيمٌ كَرِيمٌ وَ أيْدٍ بِالنَّدَى هُضُمُ	پستیاں ان کی بارگاہ میں قدم نہیں رکھ سکتیں۔ ایسے بزرگ ہیں جن کا دست کرم بارش کی طرح ہمیشہ فیض پہنچاتا رہتا ہے۔
34 لَا يَقْبِضُ الْعُسْرُ بَسْطاً مِنْ أكُفِّهِمُ *** سِيَّانِ ذَلِكَ إنْ أثْرَوْا وَ إنْ عَدِمُوا	تنگدستی نے کبھی بھی ان کے وجود کو متاثر نہیں کیا۔ مال کا ہونا یا نہ ہونا ان کے لئے برابر ہے۔ (یعنی ان کے پاس مال ہو یا نہ ہو اس سے ان کے سخاوت پر کوئی فرق نہیں پڑتا)
35 أىُّ الْقَبَائلِ لَيْسَتْ فِى رِقَابِهِمُ *** لِاوَّلِيَّةِ هَذَا أوْ لَهُ نِعَمُ	وہ کون سا خاندان اور قبیلہ ہے جو ان کی غلامی میں نہیں ہے اور ان کی اولیت اور تقدم کی وجہ سے یا پھر ان کے احسانات کی وجہ سے۔
36 مَنْ يَعْرِفِ اللهَ يَعْرِفْ أوَّلِيَّةَ ذَا *** فَالدِّينُ مِنْ بَيْتِ هَذَا نَالَهُ الامَمُ	جو خدا کو پہچانتا ہے وہ ان کی اولیت اور تقدیم کو بھی جانتا ہے۔ لوگوں نے انہیں کے بیت الشرف سے دین اور ہدایت حاصل کی ہے۔
37 بُيُوتُهُمْ مِنْ قُرَيْشٍ يُسْتَضَاءُ بِهَا *** فِى النَّائبَاتِ وَ عِنْد الْحُكْمِ إنْ حَكَمُوا	قریش میں صرف ان کا گھرانہ ہے جہاں لوگوں کی مشکلات حل ہوتی ہیں۔ اسی گھر میں صحیح اور حقیقی فیصلے کئے جاتے ہیں۔
38 فَجَدُّهُ مِنْ قُرَيْشٍ فِى ارُومَتِهَا *** مُحَمَّدٌ وَ عَلِىٌّ بَعْدَهُ عَلَمُ	ان کے جد بزرگوار حضرت محمدصلی اللہ علیہ و آلہ و سلم اور ان کے بعد دوسرے جد بزرگوار حضرت امیر المومنین علی علیہ السلام ہیں جو امام اور پرچم ہدایت ہیں۔
39 بَدْرٌ لَهُ شَاهِدٌ وَ الشِّعْبُ مِنْ احُدٍ *** وَ الْخَنْدَقَانِ وَ يَوْمُ الْفَتْحِ قَدْ عَلِمُوا	ان کی بہادری، قربانی اور خلوص پر جنگ بدر، احد کی گھاٹی، جنگ خندق، فتح مکہ سب گواہ ہیں۔
40 وَ خَيْبَرٌ وَ حُنَيْنٌ يَشْهَدَانِ لَهُ *** وَ فِى قُرَيْضَةَ يَوْمٌ صَيْلَمٌ قَتَمُ	خیبر و حنین ان کی عظمتوں کا قصیدہ پڑھتے ہیں۔ جنگ بنی قریض اور جنگ تبوک ان کے مدح خواں ہیں۔
41 مَوَاطِنٌ قَدْ عَلَتْ فِى كُلِّ نَائِبَةٍ *** عَلَى الصَّحَابَةِ لَمْ أكْتُمْ كَمَا كَتَمُوا.	یہ عہدے اور منصب ایسے دلخراش اور خوفناک مناظر تھے جنہیں کھولنے اور فتح کا راستہ تلاش کرنے میں صحابہ ناکام رہے اور یہ ایک حقیقت ہے جس کو میں چھپا نہیں رہا، جس طرح سے انہوں نے چھپایا تھا۔

ترجمہ و شروحات

قصیدہ میمیہ کے مختلف ترجمے اور شروحات لکھی گئی ہیں؛ ان میں عبدالرحمن بن احمد جامی (نویں صدی ہجری کے مشہور شاعر)، سید ظفرخان جوہری استروشنی، ابوالقاسم وفا (وفات: 1261ھ)، عبدالکریم محرابی ایروانی (1310-1382ش) ہیں اور نور اللہ شاہ آبادی نے اس کا فارسی میں منظوم ترجمہ کیا ہے۔ نیز جامی، استرآبادی (گیارہویں اور بارہویں صدی ہجری)، محمد بن سلیمان تنکبانی (1234-1302ھ)، محمد بن ابراہیم بن علی بن یوسف السبیتی العاملی (تیرہویں صدی ہجری)، عبد الحسین فاضل گروسی (1295-1324 ہجری)، مصطفی بن محمد خوئی (13ویں صدی)، ابوالحسن تنکابانی (14ویں صدی)، صابر شوشتری، اور گودینی نے اس قصیدے پر مستقل شرحیں لکھی ہے۔ بعض شارحین نے ایک کتاب میں فرزادق کے بعض مصرعوں کو ذکر کیا ہے؛ مثال کے طور پر، مرزوقی (متوفی: 421 ہجری) نے دیوان الحماسہ طائی پر شرح لکھتے ہوئے قصیدہ میمیہ کے بعض مصرعوں کی بھی تشریح کی ہے۔

طباعت و نشر

قصیدہ میمیہ مختلف ادوار میں بغیر ترجمہ یا ترجمہ و تشریح کے ساتھ شائع ہوا ہے جن میں سے چند درج ذیل ہیں:

• القصیدة المیمیہ فی مدح علی بن الحسین(ع)، تصحیح ابوالحسن تبریزی زنوزی و علی اصغر بن عبدالجبار اصفہانی سمیرمی، بی نا، تہران، 1272ق
• اصفہانی سمیرمی، علی اصغر بن عبدالجبار، القصیدة المیمیہ فی مدح علی بن الحسین (ع)، نشر کارخانہ اللہ قلی خان، تہران، 1273ھ۔
• القصیدة المیمیہ فی مدح علی بن الحسین (ع)، بی نا، ایران، 1274ھ۔
• القصیدة المیمیہ فی مدح علی بن الحسین(ع)، بی نا، تہران، 1282ھ۔
• القصیدة المیمیہ فی مدح علی بن الحسین (ع)، بی نا، تہران، 1315ھ۔
• محلاتی حائری، علی، القصیدة المیمیہ فی مدح علی بن الحسین(ع)، بی نا، بمبئی، 1318ھ۔
• القصیدة المیمیہ فی مدح علی بن الحسین (ع)، نشر کریمی، لاہور، 1339-1340ھ۔