الناس نیام فاذا ماتوا انتبہوا

النَّاسُ نِیَامٌ فَإِذَا مَاتُوا انْتَبَهُوا (لوگ سوئے ہوئے ہیں جب مر جائیں گے تو بیدار ہونگے) ایک مشہور حدیث ہے جو پیغمبر اکرمؐ اور امام علیؑ سے نقل ہوئی ہے۔ اس حدیث کی تشریح میں کہا گیا ہے کہ بہت سے لوگوں کا خیال ہے کہ وہ اس دنیا میں مال و متاع کے مالک ہیں لیکن جب ان کو موت آتی ہے تو انہیں احساس ہوتا ہے کہ ان کے پاس کچھ بھی نہیں ہے۔

نہج البلاغہ میں امام علیؑ کا کلام «اہل دنیا اس کاروان کی مانند ہیں جنہیں لے جایا جا رہا ہے حالانکہ وہ سوئے ہوئے ہیں» کو حدیث «النَّاسُ نِیَامٌ ...» کے ساتھ ہم‌ معنی اور مترادف جانا گیا ہے۔ لفظ «اِنْتِباہ» اصل میں کسی کو آگاہ کرنے کے معنی میں آتا ہے لیکن اس حدیث میں بیدار ہونے کے معنی میں آیا ہے۔ اسلامی عرفان کی منظوم کتاب گلشن راز میں مِصرَع «تو در خوابی و این دیدن خیال است» یعنی تم سوئے ہوئے ہو اور یہ جو تمہیں نظر آرہا ہے یہ صرف خواب و خیال کے سوا کچھ نہیں ہے، کو اس حدیث کا اقتباس شمار کیا جاتا ہے۔

جامی (وفات 817ھ)

قال خَیْرُ الْوَرَی عَلَیْہِ سَلَام‏ // إِنَّمَا النَّاس ہِجْعٌ و نِیام
فإذا جائہم و إن کَرِہُوا // سَکْرَۃُ الْمَوْت بعدہا انْتَبَہُوا
آدمی‌زادہ در مَبادی حال// پی نفس و ہوا رود ہمہ سال

بعض محققین اس بات کے معتقد ہیں کہ حدیث «النَّاسُ نِیَامٌ ...» جس طرح مادی بدن کی موت کی طرف اشارہ ہے اسی طرح روحانی و عرفانی موت کی طرف بھی اشارہ ہے جو انسان کو اس مادی زندگی کے دوران حاصل ہوتی ہے۔ اسی بنا پر بعض لوگ اس بات کے معتقد ہیں کہ اس حدیث میں یہ وصیت کی گئی ہے کہ ہوشیار رہیں یہ بیداری کہیں تمہیں حقیقی موت کے بعد نصیب نہ ہو۔ شیعہ عالم دین اور فلسفی ملا صدرا موت کو عدم اور نیستی سے تعبیر کرنے کے ادعا کو اس حدیث کے ذریعے رد کرتے ہوئے کہتے ہیں کہ یہ حدیث اس بات کی گواہی دیتی ہے کہ موت ایک قسم کی بیداری ہے نہ عدم اور نیستی۔‏

مسلمان متکلم اور عارف غزالی (450 ـ 505ھ) ایک مثال کے ضمن میں اس حدیث کی تشریح کرتے ہیں: ایک بچہ ماں کے پیٹ سے ایک نئے عالم اور نئی جگہ پر آتا ہے۔ جب یہ بچہ ماں کے پیٹ سے خارج ہوتا ہے اور دنیا کی وسعت کا مشاہدہ کرتا ہے تو کیا یہ شائستہ ہے کہ یہ بچہ دوبارہ ماں کے پیٹ میں واپس جانے کی تمنا کرے؟ غزالی اس بات کے معتقد ہیں کہ دنیا اور آخرت کی مثال بھی اسی طرح ہے۔ جو شخص اس دنیا سے آخرت کی طرف چلا جاتا ہے اور جب آخر کی وسعت کا مشاہدہ کرتا ہے تو پھر اس دنیا میں واپس آنے کی تمنا کرنا سزاوار نہیں ہے۔

جرمنی قبرستان بُن میں جرمن خاتون مستشرق این میری شمل کی قبر پر حدیث «النَّاسُ نِیَامٌ ...»

تفسیر حدیث

شیعہ مجتہد آیت اللہ جوادی آملی حدیث «النَّاسُ نِیَامٌ ...» کی وضاحت کرتے ہوئے کہتے ہیں کہ بہت سارے لوگ یہ خیال کرتے ہیں کہ وہ اس دنیا میں مال و متاع کے مالک ہیں؛ لیکن یہ لوگ موت کے وقت سمجھ جاتے ہیں کہ وہ تو کسی چیز کے مالک نہیں تھے۔ جس طرح سویا ہوا انسان خواب میں بہت کچھ دیکھتا ہے اور جب بیدار ہوتا ہے تو ان میں سے کسی چیز کو بھی نہیں دیکھتا۔

ساتویں صدی ہجری کے مسلمان عارف نَسَفی اپنی کتاب انسان کامل میں اس حدیث سے استناد کرتے ہوئے لکھتے ہیں کہ جس طرح خواب میں دیکھنے والی چیزوں کی کوئی حقیقت نہیں اسی طرح اس دنیا میں موجود چیزوں میں بھی کوئی پائیداری اور ثبات نہیں نہیں ہے۔ بعض محققین اس نکتے کی طرف توجہ دلاتے ہیں کہ انسان اس دنیا میں انجام دئے گئے اعمال کی حقیقت سے واقف نہیں ہیں اور موت کے بعد جب «اشیاء کی اصل حقیقت» آشکار ہو جاتی ہے تو لوگ اس وقت اپنے اعمال کی حقیقت سے آگاہ ہو جاتے ہیں۔

ملاصدرا معتقد ہیں کہ جو کچھ انسان خواب میں دیکھتا ہے وہ اس دنیا میں موجود اشیاء کی مثالیں ہیں۔ اسی طرح جو کچھ انسان اس دنیا میں دیکھتا ہے وہ آخرت میں موجود حقائق کی مثالیں ہیں۔ آخرت کے حقائق انسان پر آشکار اور نمایاں نہیں ہوتے سوائے مثالوں کے ضمن میں جن کی تعبیر اور تشریح کی ضرورت ہوتی ہے۔ کتاب تفسیر مخزن العرفان کے مصنف کا بھی عقیدہ ہے کہ جو کچھ اس دنیا میں دیکھتے ہیں وہ ان حقائق کے چھلکے یا خول ہیں اور انسان موت کے بعد ان حقائق کی حقیقت سے واقف ہوتے ہیں۔