مسودہ:سورہ لقمان آیت نمبر 19

سورۂ لقمان آیت نمبر 19 میں لقمان کی اپنے بیٹے کو کی گئی نصیحتوں میں سے دو نصیحتیں بیان ہوئی ہیں: چلنے میں میانہ روی اختیار کرنا اور گفتگو کے دوران آواز دھیمی رکھنا۔

وَاقْصِدْ فِي مَشْيِكَ وَاغْضُضْ مِن صَوْتِكَ ۚ إِنَّ أَنكَرَ الْأَصْوَاتِ لَصَوْتُ الْحَمِيرِ ‎﴿١٩﴾‏‏‏
اور اپنی چال میں میانہ روی اختیار کرو اور اپنی آواز پست رکھو۔ بے شک سب آوازوں میں سب سے ناگوار آواز گدھوں کی ہے۔

---

سورۂ لقمان، آیت 19

پہلی نصیحت میں لقمان اپنے بیٹے کو چلنے میں اعتدال اختیار کرنے کی تلقین کرتے ہیں؛ یعنی نہ بہت تیز چلے اور نہ اس قدر آہستہ کہ سستی کا شکار ہو۔ بعض مفسرین نے اس نصیحت کا مفہوم چلنے میں تواضع اختیار کرنا اور تکبر سے بچنا بیان کیا ہے۔ بعض دوسرے مفسرین کے نزدیک یہ ہدایت صرف چلنے تک محدود نہیں، بلکہ زندگی کے تمام معاملات میں اعتدال اختیار کرنے کے ایک عمومی اصول کی طرف اشارہ کرتی ہے۔ اس لحاظ سے چلنے میں میانہ روی، اعتدال کے مظاہر میں سے ایک ہے۔

دوسری نصیحت گفتگو کے دوران آواز دھیمی رکھنے سے متعلق ہے۔ اس آیت میں گدھوں کی آواز کو سب سے ناگوار آواز قرار دیا گیا ہے۔ بعض مفسرین کے مطابق اس تعبیر سے اس تصور کی تردید ہوتی ہے جس کے مطابق بلند آواز کو انسان کی عظمت اور بلند مرتبے کی علامت سمجھا جاتا تھا۔ تفسیر المراغی میں بھی ذکر ہوا ہے کہ عربوں میں بلند آواز سے بولنے کو فخر اور برتری کا اظہار سمجھا جاتا تھا۔

امام صادقؑ سے منقول ایک روایت میں بلند اور ناگوار آواز کے ساتھ چھینکنے کو بھی اس آیت کے مصادیق میں شمار کیا گیا ہے۔ ایک دوسری روایت میں آپؑ نے دعا اور تلاوت قرآن کے دوران آواز بلند کرنے کو جائز قرار دیا ہے۔