سیرہ متشرعہ

سیرہ مُتَشَرِّعہ، کسی خاص عمل پر کسی دین کے تمام یا اکثر پیروکاروں کی عملی پابندی کو کہا جاتا ہے۔ دوسرے لفظوں میں مسلمانوں کا مسلمان ہونے اور شریعت پر عمل پیرا ہونے کے ناطے انجام دینے والے عمل کو سیرہ متشرعہ کہا جاتا ہے۔ سیرہ متشرعہ ان مسائل میں سے ہے جس کی حجیت کے بارے میں علم اصول فقہ میں بحث کی جاتی ہے۔ خبر واحد اور ظواہر کی حجیت کا مسئلہ حکم شرعی کے استنباط کے راستے میں پیش آنے والے اہم اور بینادی مسائل میں سے ہیں جن کی اثبات کے لئے سیرہ متشرعہ سے بھی استناد کیا جاتا ہے۔ اسی طرح فقہاء بعض دیگر فقہی مسائل کو ثابت کرنے کے لئے بھی سیرہ متشرعہ سے مدد لیتے ہیں۔

بعض اصولیوں کا کہنا ہے کہ سیرہ متشرعہ‌ جو عصر معصومؑ میں قائم ہو اور معصوم خود بھی اس پر عمل کرنے والوں میں سے ہو یا معصوم کے نظروں اور سماعتوں سے گزرنے کے باوجود اس سے منع نہ کیا ہو تو حجت ہے۔ علمائے اصول اس قسم کی سیرتوں کو رائ معصوم یا بیان شارع کو کشف کرنے والی اجماع سے تعبیر کرتے ہیں۔

علمائے اصول کہتے ہیں کہ سیرہ متشرعہ صرف متعلقہ عمل کی مشروعیت اور عدم حرمت یا مشروعیت ترک اور عدم وجوب پر دلالت کرتی ہے اور واجب، مستحب، حرام اور مکروہ جیسے احکام کو سیرت متشرعہ کے ذریعے اثبات نہیں کیا جا سکتا ہے۔

تعریف اور اہمیت

سیرہ مُتَشَرِّعہ، کسی خاص عمل پر کسی دین کے تمام یا اکثر پیروکاروں کی عملی پابندی کو کہا جاتا ہے۔ دوسرے لفظوں میں کسی خاص عمل کی انجام دینے یا ترک کرنے کے سلسلے میں کسی دین یا مذہب کے پیروکاوں کے مستقل عملی طریقہ کار کو سیرہ متشرعہ کہا جاتا ہے۔ میرزائے نائینی کی طرف سے پیش کئے جانے والی تعریف کی بنا پر سیرہ متشرعہ مسلمانوں کا مسلمان ہونے اور شریعت پر عمل پیرا ہونے کے اعتبار سے انجام دینے والے عمل کو کہا جاتا ہے۔

فقہ اور اصول فقہ میں سیرہ متشرعہ سے بہت زیادہ استناد کیا گیا ہے اور اس کی حجیت کی بحث علم اصول فقہ کے اہم مسائل میں شمار ہوتی ہے یہاں تک کہ بعض اصولیوں کے قلمی آثار میں اس کے بارے میں بحث کی گئی ہے۔

سیرہ متشرعہ کی دلالت کے دائرہ کار کے بارے میں کہا گیا ہے کہ یہ صرف کسی عمل کی مشروعیت اور عدم حرمت یا مشروعیت ترک اور عدم وجوب پر دلالت کرتی ہے اور وجوب، استحباب، حرمت اور کراہت جیسے احکام کی اثبات میں سیرہ متشرعہ کا کوئی کردار نہیں ہے۔

سیرہ متشرعہ اور سیرہ عقلاء میں فرق

مقالهٔ اصلی: سیرہ عقلاء

سیرہ متشرعہ سیرہ عقلاء کی نسبت خاص ہے اور کسی خاص عمل کی انجام دہی یا ترک کے بارے میں صرف مسلمانوں یا کسی خاص دین یا مذہب کے پیروکاروں کی سیرت کو کہا جاتا ہے؛ جبکہ سیرہ عقلاء کسی کام کی انجام دہی یا ترک پر تمام عقلاء کے اتفاق اور توافق کو کہا جاتا ہے۔ ان دونوں کے معتبر ہونے اور حجت ہونے کے بارے میں بھی کہا گیا ہے کہ سیرہ متشرعہ اگر ثابت ہو جائے تو یہ حکم شرعی پر دلیل بھی بن جاتی ہے؛ لیکن سیرہ عقلاء حجت ہی نہیں جب تک معصوم کی طرف سے اس کی تائید اور تصدیق نہ ہو یعنی شارع کی طرف سے اس سے منع یا ممانعت نہیں کی گئی ہو۔

کہا جاتا ہے کہ سیرہ متشرعہ میں یہ صلاحیت بھی موجود ہے کہ یہ کسی حکم شرعی کے اثبات میں سیرہ عقلاء کو مؤثر ہونے سے منع بھی کر سکتی ہے؛ لیکن سیرہ عقلاء میں سیرہ متشرعہ کی نسبت ایسی صلاحیت موجود نہیں ہے۔

سیرہ متشرعہ اور اجماع کے درمیان نسبت

بعض اصولیوں کے مطابق سیرہ متشرعہ ایک طرح کا اجماع ہے۔ شیعہ عالم دین محمد رضا مظفر سیرہ متشرعہ کو اجماع کا سب سے اعلی مرتبہ قرار دیتے ہیں؛ کیونکہ یہ ایک طرح سے کسی کام کی انجام دہی یا ترک پر علماء اور غیر علماء سب کا عملی اجماع ہے، جبکہ اجماع کے دیگر اقسام سب کے سب کلامی اجماع ہیں اور وہ بھی صرف علماء کے ساتھ مختص ہے۔

سیرہ متشرعہ کے اقسام اور ان کی حجیت

علم اصول فقہ میں سیرہ متشرعہ کے کچھ اقسام کا ذکر ملتا ہے جو درج ذیل ہے:

• عصر معصومؑ میں قائم سیرت جس پر معصوم نے بھی عمل کیا ہو؛ جیسے مسلمانوں کی یہ سیرت تھی کہ وہ باوثوق راویوں کے ذریعے معصومینؑ سے نقل ہونے والی احادیث پر اعتماد کرتے تھے اور ان راویوں کو معصومین اور لوگوں کے درمیان رابط کے طور پر قبول کرتے تھے۔ اصولیوں کے مطابق اس طرح کی سیرت کے حجت ہونے میں کوئی شک و تردید نہیں ہے اور یہ سیرت حکم شرعی پر دلیل بھی ہے؛ کیونکہ یہ اجماع کی مانند شرعی حکم اور معصوم کے رائ کو کشف کرتی ہے۔
• عصر معصومؑ میں قائم سیرت جس پر خود معصوم نے عمل تو نہیں کیا، تاہم اسے معصوم کی تائید اور رضایت حاصل ہو۔ مثلا شیخ انصاری سیرت متشرعہ کی اس قسم سے استناد کرتے ہوئے کہتے ہیں کہ شریعت کی ابتداء سے مسلمانوں یا دوسرے ادیان کے پیروکاروں کی یہ سیرت رہی ہے کہ جب کسی کام کے بارے میں شارع کی طرف سے ممانعت ثابت نہ ہو تو اس کام کو ترک کرنا ضروری نہیں سمجھتے تھے۔ سیرہ متشرعہ کی اس قسم کو بھی حجت اور اجماع کی طرح اسے بھی کاشف قول معصوم سمجھتے ہیں۔
• سیرہ مستحدثہ جس کے بارے میں یقین ہو کہ عصر معصومؑ میں یہ سیرت قائم نہیں تھی اور نہ عصر معصوم سے متصل ہو: بعض اصولی اس قسم کی سیرت کو حجت نہیں سمجھتے ہیں۔
• جس سیرت کے بارے میں عصر معصوم سے متصل ہونے اور نہ ہونے یا معصوم کی طرف سے تائید ہونے یا نہ ہونے میں شک ہو۔ بعض اصولی اس قسم کی سیرت کو بھی حجت نہیں سمجھتے ہیں۔

فقہی مسائل میں سیرہ متشرعہ کا استعمال

فقہی مسائل میں سیرہ متشرعہ کے بعض استعمالات درج ذیل ہیں:

• فقہاء کے مطابق سیرہ متشرعہ قائم ہے کہ اگر کوئی شخص کسی منقول اور مباح چیز کو حیازت یعنی جمع کرے تو یہ اس کا مالک بن جاتا ہے۔ یہ سیرت معصوم کی نظروں یا سماعتوں سے گزری ہے اس کے باوجود معصوم کی طرف سے اس سے ممانعت نہیں کی گئی ہے۔
• امام خمینی بیع معاطاتی میں سیرہ متشرعہ کے ذریعے ملکیت کو ثابت کرتے ہوئے کہتے ہیں کہ علماء اور صلحا سے لے کر عام عوام تک کی یہ سیرت رہی ہے کہ جب ایجاب و قبول کے بغیر بازار سے روٹی یا گوشت وغیرہ کی خرید و فروخت ہوتی ہے تو ان کے مطابق یہاں صرف اباحہ تصرف نہیں بلکہ ملکیت بھی آتی ہے۔
• فقہاء کے مطابق مُطہِّرات کی ایک قسم حیوان کے بدن سے عین نجاست کا ازالۂ ہے۔آقا رضا ہمدانی کے مطابق اس فتوا کی ایک دلیل حیوانات کے حوالے سے سیرہ اور بنائے متشرعہ ہے، باوجود اس کے کہ جانتے تھے کہ حیوان کا بدن ولادت کے وقت خون سے نجس ہوا ہے لیکن جیسے ہی عین نجاست کا ازالہ ہو جائے تو اسے پاک سمجھتے ہیں۔
• آیت اللہ جعفر سبحانی میت کی تقلید پر باقی رہنے کے فتوا کی ایک دلیل سیرہ متشرعہ کو قرار دیتے ہیں اور کہتے ہیں کہ ان تمام شہروں خاص کر جن شہروں کے مواصلاتی نظام کمزور ہو میں یہ سیرہ متشرعہ قائم تھی کہ جس مجتہد کی زندگی میں اس کی تقلید کی جاتی تھی وفات کے بعد بھی اس کی تقلید کرتے تھے یہاں تک کہ ان کی طرح یا ان سے افضل کوئی دوسرا مجتہد پیدا نہ ہو۔

علم اصول فقہ میں سیرہ متشرعہ کا استعمال

علم اصول فقہ میں اس کے دو بنیادی مسائل یعنی حجیت خبر واحد اور حجیت ظواہر کی بحث میں سیرہ متشرعہ سے استدلال کرتے ہیں۔ مثلا کہا گیا ہے کہ مسلمانوں اور ہر زمانے کے متشرعین حتی پیغمبر اکرمؐ اور ائمہ معصومینؑ کے زمانے میں بھی ان کے اصحاب کے درمیان خبر ثقہ پر اعتماد کرنے کی سیرت چلی آرہی ہے اور پیغمبر اکرمؐ اور ائمہ معصومینؑ میں سے کسی کی طرف سے بھی اس سے منع کرنے کے حوالے سے کوئی حدیث ہم تک نہیں پہنچی ہے۔ اسی طرح ظواہر کی حجیت کے بارے میں کہا گیا ہے کہ تمام مسلمانوں یہاں تک کہ ائمہ معصومینؑ کے اصحاب تک میں یہ سیرت جاری تھی کہ وہ متکلم کے مقصود اور مراد تک رسائی حاصل کرنے کے لئے اس کے کلام کے ظواہر پر اعتماد کرتے تھے اور کسی معصوم کی طرف سے اس سے منع کئے جانے کی کوئی چیز ہم تک نہیں پہنچی ہے۔

متعلقہ مضامین

• سیرہ عقلاء
• عرف