شیطان بزرگ

شیطان بزرگ کا کارٹون، بزریلی کارٹونسٹ کارلوس لاتوف کے قلم سے

تہران میں ایرانی اسلامی انقلاب کی سالگرہ کے موقع پر نکالی گئی ریلی میں امریکی پرچم کے ساتھ بنائی گئی شیطان پرستی کی علامت کو نذر آتش کرنا

شیطان بزرگ امام خمینی کی ایک مشہور تعبیر ہے جسے انہوں نے تہران میں امریکی سفارت خانے پر قبضہ کے بعد کی گئی تقریر میں امریکہ کے لئے استعمال کیا۔ انہوں نے اپنی تقریر میں اس تمثیل کو ایک حدیث سے اخذ کیا ہے ان کے مطابق جس طرح شیاطین کا سرغنہ (ابلیس) نے پیغمبر اسلام کی بعثت کے بعد اپنے کارندوں کو جمع کر کے انسانوں کو گمراہ میں ان کے لئے پیش آنے والی سختی کی طرف اشارہ کیا تھا۔ اسی طرح امام خمینی کی تعبیر کے مطابق ایران کے اسلامی انقلاب کی کامیابی کے بعد اس دور کے شیاطین کا سرغنہ امریکہ بھی اپنے چھوٹے بڑے داخلی اور خارجی کارندوں کو جمع کرکے شور و غل مچا رہا ہے۔

کہا جاتا ہے کہ یہ توصیف قرآن میں مذکور شیطانی صفات سے مأخوذ ہے؛ کیونکہ قرآن میں شیطان کو کافر، انسان کا دشمن، متکبر، تفرقہ‌ باز، غیر قابل‌ اعتماد، فاسق و فاجر، پارٹی باز اور برے اعمال کو زینت‌ دینے والا قرار دیا گیا ہے اور امام خمینی کی نگاہ میں یہ تمام صفات امریکہ کے حکمرانوں میں بھی پائی جاتی ہیں۔

امام خمینی نے بارہا «شیطان بزرگ» کی تعبیر استعمال کیا۔ اس تعبیر سے ان کی مراد اخلاقی، قرآنی اور اعتقادی مباحث میں ابلیس یا نفس امارہ جبکہ سیاسی مسائل میں امریکہ ہے۔ اسی طرح انہوں نے اسلامی ممالک کے حکمرانوں کی اسرائیلی غلامی پر اعتراض کرتے ہوئے اس رجیم کو چھوٹے شیطان سے تعبیر کیا ہے۔

شیطان بزرگ کا لقب مختلف مواقع پر ایران کے موجودہ سپریم لیڈر سید علی خامنہ‌ای نے بھی استعمال کیا ہے۔ ان کے مطابق ابلیس اگرچہ تمام شیاطین کا سرغنہ ہے، لیکن وہ انسانوں میں صرف وسوسہ ایجاد کر سکتا ہے؛ لیکن امریکہ نہ صرف بے گناہ انسانوں کو اغوا کرتا ہے بلکہ قتل و غارت اور فتنہ‌ انگیزی میں بھی پیش پیش ہے۔ اسی طرح یہ نعرہ امریکہ کے خلاف نکالی جانے والی ریلیوں میں بھی امریکہ سے اظہار نفرت اور برأت کے لئے لگایا جاتا ہے۔