ابن ابی الخطاب

ابن ابی الخطاب

معلومات اصحاب امام(ع)
مکمل نام	محمد بن حسین بن ابی الخطاب زید زَیّات ہمدانی کوفی
کنیت	ابن ابی الخطاب
نسب	ہمدانی
صحابی	امام محمد تقی،امام علی نقی،امام حسن عسکری
کارہائے نمایاں	محدث، مؤلف
تالیفات	کتاب التوحید، کتاب المعرفة و البداء، کتاب الامامة،..

محمد بن حسین بن ابی الخطاب زید زَیّات ہمدانی کوفی (متوفی 262 ھ) ابن ابی الخطاب کے نام سے معروف ہیں۔ ان کا شمار شیعہ محدثین اور تین اماموں امام محمد تقی علیہ السلام، امام علی نقی علیہ السلام اور امام حسن عسکری علیہ السلام کے اصحاب میں ہوتا ہے۔

نام و نسب

کلینی (متوفی 328 یا 329 ھ) نے اصول کافی میں مختلف مقامات پر محمد بن الحسین اور ابن قولویہ نے محمد بن الحسین بن ابی الخطاب کے نام سے ان کا ذکر کیا ہے۔

نجاشی نے ان کا نام، کنیت اور ان کے والد کا نام یوں ذکر کیا ہے: محمد بن الحسین بن ابی الخطاب ابو جعفر الزَّیات الہمدانی

علامہ حلّی نے بھی اسی صورت میں ذکر کیا ہے البتہ ظاہر ہوتا ہے کہ الحسین کے بجائے ابی الحسین ذکر کیا ہے۔

تین اماموں کی مصاحبت

مامقانی نے انہیں امام محمد تقی (ع)، امام علی نقی (ع) اور امام حسن عسکری (ع) کے اصحاب میں شمار کیا ہے۔ ان سے منقول روایات کا سلسلہ کبھی تین اور چھ واسطوں کے ذریعے ائمہ سے متصل ہو کر امیرالمومنین علی (ع) پر منتہی ہوتا ہے۔

وثاقت

نجاشی نے ان کی روایات کو مورد اطمینان قرار دیا ہے اور انہیں اجلّہ محدثین شیعہ، کثیر الروایہ، ثقہ، شناختہ شدہ اور صاحب تصنیف کے الفاظ سے یاد کیا ہے۔

طول عمر

کثرت روایات، ان کی احادیث اور تین اماموں کے زمانے کو درک کرنے کی وجہ سے بعض مآخذ میں ان کا شمار ان افراد میں سے کیا ہے جو بچپن میں ائمہ کی خدمت میں رہے ہیں۔ آقا بزرگ تہرانی نے ان کی عمر تقریبا سو سال ذکر کی ہے۔

آثار

نجاشی نے درج ذیل آثار کو ان سے منسوب کیا ہے:

1. کتاب التوحید
2. کتاب المعرفة و البداء
3. کتاب الرد علی اہل القدر
4. کتاب الامامة
5. کتاب اللؤلؤة
6. کتاب وصایا الائمة علیہم السّلام
7. کتاب النّوادر۔

خود ابن ابی الخطاب سے اس سے زیادہ تالیفات کی روایت مروی ہے۔

بیرونی ربط

• مآخذ مقالہ: دائرہ المعارف بزرگ اسلامی