ویکی شیعہ:ہفتہ وار منتخب مقالے/2019/21
حسن بن علی بن ابی طالب (3-50 ھ)، امام حسن مجتبیؑ کے نام سے مشہور، شیعوں کے دوسرے امام، حضرت علیؑ و حضرت زہرا (س) کے پہلے فرزند اور پیغمبر اکرمؐ کے بڑے نواسے ہیں۔ آپ کا دور امامت دس سال (40-50 ھ) پر محیط ہے نیز آپ تقریبا 7 مہینے تک خلافت کے عہدے پر بھی فائز رہے۔ اہل سنت آپ کو خلفائے راشدین میں سے آخری خلیفہ مانتے ہیں۔
تاریخی شواہد کی بنا پر آپ کا اسم گرامی حسن پیغمبر اکرمؐ نے رکھا تھا اور حضورؐ آپ سے بے انتہا محبت کرتے تھے۔ آپ نے اپنی عمر کے 7 سال اپنے نانا رسول خداؐ کے ساتھ گزارے، بیعت رضوان و نجران کے عیسائیوں کے ساتھ مباہلہ میں اپنے نانا کے ہمراہ شریک ہوئے۔
خلیفہ دوم کی طرف سے ان کے بعد خلیفہ کے انتخاب کیلئے بنائی گئی چھ رکنی کمیٹی میں بطور گواہ حاضر تھے۔ اس کے علاوہ خلیفہ اول اور دوم کے زمانے میں آپ کی زندگی کے بارے میں کوئی خاص بات تاریخ میں ثبت نہیں ہوئی۔ اسی طرح خلیفہ سوم کے دور میں ہونے والی بعض جنگوں میں بھی آپ کی شرکت کے حوالے سے تاریخ میں بعض شواہد ملتے ہیں۔ حضرت عثمان کے خلاف لوگوں کی بغاوت کے دوران امام علیؑ کے حکم سے آپ عثمان کے گھر کی حفاظت پر مأمور ہوئے یہاں تک کہا جاتا ہے کہ اس واقعے میں آپ زخمی بھی ہوئے تھے۔ امام علیؑ کی خلافت کے دوران آپ اپنے والد گرامی کے ساتھ کوفہ تشریف لائے۔ جنگ جمل و جنگ صفین میں اسلامی فوج کے سپہ سالاروں میں سے تھے۔