سورہ بقرہ آیت نمبر 7

سورہ بقرہ آیت نمبر 7

خوشنویسی سورہ بقرہ آیت:7
آیت کی خصوصیات
سورہ	سورہ بقرہ
آیت نمبر	7
پارہ	1
محل نزول	مدینہ
موضوع	کفّار کی ہدایت نہ ہونے کی وجہ
مضمون	اللہ تعالی نے جو مُہر کفار کے دلوں پر لگایا ہے اور کان اور آنکھ پر جو پردہ ہے۔
مربوط آیات	سورہ جاثیہ آیت نمبر 23

سورہ بقرہ کی آیت نمبر 7 کافروں کی تعصب اور ہٹ دھرمی اور ان کی راہنمائی سے محرومی کو خدا کی طرف سے ان کے دلوں پر مہر لگانے کا سبب قرار دیتی ہے۔ اس میں یہ بھی بتایا گیا ہے کہ خدا نے ان کے کانوں اور آنکھوں پر پردہ ڈال دیا ہے اور یہ ان کے لیے بہت بڑا عذاب ہوگا۔

مفسرین نے یہ سمجھا ہے کہ کافروں کے دلوں پر مہر لگانے کا مطلب حق اور باطل میں تمیز کرنے کی صلاحیت کا فقدان ہے اور ان کی سماعت و بصارت میں "عشاوہ" (پردہ) کے معنی حق کا نہ سننا اور حقائق کے دریافت کرنے میں بصیرت کا فقدان ہے اور وہ سمجھتے ہیں کہ یہ عذاب ان کے نامناسب اعمال کا نتیجہ ہے اور انہوں نے یہ عذاب اپنی مرضی سے بھگتنا ہے۔

متن اور ترجمہ

خَتَمَ اللَّهُ عَلَىٰ قُلُوبِهِمْ وَعَلَىٰ سَمْعِهِمْ ۖ وَعَلَىٰ أَبْصَارِهِمْ غِشَاوَةٌ ۖ وَلَهُمْ عَذَابٌ عَظِيمٌ

---

خدا نے ان کے دلوں اور ان کے کانوں پر مہر لگا دی ہے اور ان کی آنکھوں پر پردہ پڑ گیا ہے۔ اور (آخرت میں) ان کے لیے بڑا عذاب ہے۔» (سورہ بقرہ، آیت7)

محتوا

سورہ بقرہ کی آیت ساتویں آیت کافروں کے تعصب اور ہٹ دھرمی کو خدا کی طرف سے ان کے دلوں پر لگائے جانے والے مُہر کے باعث سمجھتی ہے جسے اللہ تعالی نے ان کے دلوں پر لگایا ہے اور ان کی آنکھوں اور کانوں پر ایک پردہ ڈال دیا ہے اور اس کو ان کے لیے دردناک عذاب کے طور پر متعارف کرایا ہے۔

شیعہ مفسر اور فقیہ ناصر مکارم شیرازی نے اس آیت کی تفسیر میں سورہ ق کی آیت نمبر 37 کو ملحوظ خاطر رکھتے ہوئے اس میں قلب سے مراد عقل اور درک لیا ہے۔ 13ویں اور 14ویں صدی ہجری کے صوفی اور مفسر سلطان محمد گنابادی قلب کو انسان کی حقیقت کا ایک مرتبہ سمجھتا ہے جس میں علوم کے حقائق اور اعمال کے ثمرات اس مرتبے میں انسان درک کرتا ہے اور ان کا یہ بھی کہنا ہے کہ دل کو قلب اس لئے کہا گیا ہے کہ وہ عالَمِ فرشتوں کی طرف متوجہ ہوتا ہے اور پھر کبھی منقلب ہوکر عالَمِ شیاطین کی طرف جھکاؤ دکھاتا ہے۔

مفسرین نے کفار کی آنکھوں پر پردہ ڈالنے سے مراد حق بات کا نہ سننا اور حقیقت سمجھنے کے لئے بصیرت کا فقدان قرار دیا ہے۔ اس آیت میں «قلب» اور «بصر» کو جمع اور «سمع» کو واحد لانے کے بارے میں مکارم شیرازی نے تین وجوہات بیان کی ہیں:

1. «سمع» کبھی جمع استعمال ہوتا ہے اس کو الگ سے جمع لانے کی ضرورت نہیں ہے۔
2. «سمع» مصدر کے معنی میں آسکتا ہے اور مصدر زیادہ اور کم دونوں پر دلالت کرتا ہے۔
3. تجربی علوم کے مطابق قلبی ادراکات اور آنکھ کے مشاہدات، مسموعات سے زیادہ ہوتے ہیں اس لئے قلوب اور ابصار کو جمع لے آیا ہے اور سمع کو واحد ذکر کیا ہے۔

کافر کے دل پر اللہ کا مہر لگانے کے معنی

شیعہ نامور مفسر فضل بن حسن طَبْرِسی نے تفسیر جوامع الجامع میں اللہ کی طرف سے قلب اور دل پر مُہر لگانے کو استعارہ یا تمثیل قرار دیتے ہوئے اسے مجاز پر حمل کیا ہے. اور یہ کہ کفار کے دل پر کیسے مُہر لگتی ہے اس بارے میں چند احتمال ذکر کیا ہے:

1. اللہ تعالی کی طرف سے اس کے دل میں ایک سیاہ نقطہ ایجاد ہوتا ہے تاکہ فرشتوں کو یہ معلوم ہوجائے کہ اب اس نے ایمان نہیں لانا ہے اور اس پر نفرین کریں۔
2. اللہ تعالی کی گواہی کہ ایہ لوگ پھر حق کو قبول نہیں کریں گے۔
3. ان کا دل ایمان لانے سے بند ہوجانا۔
4. کوتاہ فکری اور کوتاہ نظری کی وجہ سے حق اور باطل کی پہچان کھو جاتے ہیں

لبنان کے شیعہ مفسر اور عالم دین محمد جواد مغنیہ کا کہنا ہے کہ قلب اور دل کو خلق کرنے کا مقصد درست دلائل کے ذریعے ہدایت پانا ہے، اگر انسان ہٹ دھرمی اور اصرار کی وجہ سے ضلالت اور گمراہی پر باقی رہا ہے اور حقیقت سے منہ پھیر لیا ہے تو درحقیقت اس کا کوئی دل نہیں ہے۔ آیت میں اللہ کا مہر لگانا کے مطلب بھی یہی ہے۔ آپ تفسیر مبین میں قلب پر مہر لگانے (ختم قلب) کو نہایت دشمنی اور کافروں کے استکبار سے کنایہ سمجھتے ہیں گویا ان کا دل پر تالا لگا ہے اور اس میں کسی چیز کا داخل ہونا ممکن نہیں ہے۔

امام حسن عسکریؑ سے منقول ایک روایت میں دل پر مُہر لگانے سے مراد اللہ کی طرف سے کفار کے دل پر ایک نشانی اور علامت لگانے سے تفسیر کیا ہے تاکہ اس طرح سے فرشتوں کو پتہ چلے کہ یہ شخص کبھی ایمان لانے والا نہیں ہے۔

دل پر مہر لگانے کو اللہ کی طرف نسبت دینا

شیعہ مفسر اور فیلسوف علامہ طباطبایی کا کہنا ہے کہ دل پر مُہر لگانے کی نسبت اللہ کی طرف دینا اور آنکھوں اور کان پر پردہ لگانے کی نسبت کفار کی طرف دینا اس سے یہ معلوم ہوتا ہے کہ کفر کا ایک درجہ کفار ہی کی طرف سے ہے اور اس کی مقدار یہی ہے کہ وہ حق کو قبول نہیں کرتے تھے (وَعَلَىٰ أَبْصَارِهِمْ غِشَاوَةٌ)، اور اس سے شدید درجہ اللہ کی طرف سے سزا کے طور پر ان کے دلوں پر پردہ ڈالا ہے(خَتَمَ اللَّهُ عَلَىٰ قُلُوبِهِمْ وَعَلَىٰ سَمْعِهِمْ)، اس کے نتیجے میں ان کے اعمال دو حجاب کے درمیان واقع ہوئے ہیں، ایک حجاب وہ خود ہیں کہ ان کا کفر ایمان کے لئے رکاوٹ بنتا ہے اور دوسرا حجاب اللہ کی طرف سے ہے ان کے کفر اور فسق کے بعد اللہ نے ان کے لئے مختص کیا ہے۔ علامہ طباطبایی سورہ بقرہ کی آیت نمبر 26 إِنَّ اللَّهَ لَا يَسْتَحْيِي أَنْ يَضْرِبَ مَثَلًا مَا بَعُوضَةً فَمَا فَوْقَهَا کے ذیل میں اس بات کو تکمیل کرتے ہوئے کہتے ہیں

جس طرح متقی لوگوں کے لیے ہدایت کے دو راستے ہیں؛ فطری ہدایت اور قرآن نازل ہونے اور دین حق قبول کرنے کے بعد کی ہدایت، اسی طرح کافروں اور منافقوں کے لئے بھی دو گمراہی اور آندھا پن ہیں، پہلی گمراہی اور آندھاپنی جو کفر اور نفاق جیسی بری صفات کو ایجاد کرتی ہے اور دوسری ضلالت اور گمراہی جو پہلی گمراہی کو مزید تقویت دیتی ہے، پہلی گمراہی کی نسبت خود ان کی طرف دیا ہے اور دوسری گمراہی کی نسبت اپنی طرف دیا ہے جس کو ان کی گمراہی کی سزا کے طور پر اس گمراہی میں مزید اضافہ کیا اور کفار کے بارے میں فرمایا: ﴿وَعَلَىٰ أَبْصَارِهِمْ غِشَاوَةٌ﴾ غشاوہ کی نسبت خود ان کی طرف دیا ہے اور دلوں پر مہر لگانے کی نسبت اللہ نے اپنی طرف دیا ہے۔(خَتَمَ اللَّهُ عَلى قُلُوبِهِمْ، وَ عَلى سَمْعِهِمْ)۔

فضل بن حسن طَبْرِسی کا کہنا ہے کہ چونکہ یہ خصوصیت اللہ کی نافرمانی کی وجہ سے وجود میں آئی ہے اس لئے اس کی نسبت اللہ کی طرف دی گئی ہے جیسا کہ کہا جاتا ہے کہ فلاں کو پیسوں نے ہلاک کیا ہے، اس کا مطلب یہ ہے کہ پیسوں کے حصول کے راستے میں ہلاک ہوا ہے وگرنہ تو پیسوں نے کچھ نہیں کیا ہے۔

شیعہ فلسفی اور مفسر ملا صدرا نے اپنی تفسیر میں کہا ہے کہ کفار کے دلوں پر مہر لگانا ان کی فطرت اور ان کی ذات کی وجہ سے ہے اور وہ اسے اصلاح اور دنیاوی نظام میں عدم توازن کو روکنے کے لیے ضروری سمجھتے ہیں۔

ناصر مکارم شیرازی کا خیال ہے کہ مُہر اور غشاوہ کی نسبت اللہ تعالیٰ کی طرف اس لئے دی گئی ہے کہ اللہ تعالی نے ان خصوصیات کو غیر مناسب اعمال کی انجام دھی میں رکھا ہے جو بالآخر دل، آنکھوں اور کانوں پر مہر لگانے کا باعث بنتی ہیں۔

قوتِ ادراک سے محرومی کی صورت میں جبر کا مسئلہ

دل پر مہر لگانے کی نسبت اللہ کی طرف دینے سے یہ سوال اٹھتا ہے کہ کیا کفار کی قوتِ ادراک سے محرومی اور ضلالت و گمراہی پر باقی رہنے کا لازمہ جبر نہیں ہے؟ ناصر مکارم شیرازی اس حوالے سے تین آیتیں ذکر کر کے کہتا ہے کہ ان سے معلوم ہوتا ہے کہ یہ ان کے کفر، تکبر، ظلم و ستم اور حق کے مقابلے میں سرکش ہٹ دھرم اور سرسخت خواہشات کا نتیجہ ہیں۔

ان کا یہ ماننا ہے کہ غلط کام شروع میں ایک «حالت» ہے پھر یہ «عادت» میں بدل جاتا ہے اور آخر میں «ملکہ» میں تبدیل ہو جاتا ہے تو پھر اس سے واپسی ممکن نہیں رہتی ہے۔

شیعہ معاصر مفسر علی رضا مرزا خسروانی، ( 1310-1386ھ) کا کہنا ہے کہ کفار اپنے نامناسب اعمال کی وجہ سے ہدایت سے محروم ہوئے ہیں اور خدا کی رحمت سے ان کو سوائے مصائب کے کچھ حاصل نہیں ہوتا ہے کیونکہ خدا کا عمل سورج کی کرنوں کی طرح ہے جو قمیص کو سفید اور چہرے کو سیاہ کر دیتی ہیں۔