انبوہ تباہی ہتھیار

انبوہ تباہی ہتھیار، سے مراد ایسے ہتھیار ہیں جن کا استعمال عام شہریوں کی ہلاکت اور ماحولیات کی ناقابل تلافی تباہی کا سبب بنتا ہے۔ شیعہ فقہا کے مطابق ان ہتھیاروں کا ابتدائی استعمال، یعنی اس سے پہلے کہ دشمن ان کا استعمال کرے، حرام ہے؛ لیکن اضطراری حالات میں، یعنی جب دشمن پر فتح ان کے استعمال پر موقوف ہو، ان کے استعمال کے بارے میں مختلف آراء موجود ہیں۔ کچھ فقہا کے نزدیک ان کا استعمال اس صورت میں جائز ہے جبکہ دوسرے فقہاء نے اس عمل کو اس مورد میں بھی حرام قرار دیا ہے۔

نئے اقسام کے اجتماعی تباہی کے ہتھیار، جیسے کہ جوہری اور کیمیائی ہتھیار، کے بارے میں فقہا نے فتوے دیے ہیں۔ ایران کے رہبرِ اعلیٰ اور شیعہ مرجع تقلید، سید علی خامنہ ای، نے جوہری ہتھیاروں کی تیاری اور استعمال کی حرمت کا فتویٰ دیتے ہوئے ان ہتھیاروں کو انسانیت کے لیے خطرہ قرار دیا ہے اور ان کی تیاری اور ذخیرہ کو حرام قرار دیا ہے۔

تعریف اور اہمیت

انبوہ تباہی ہتھیار ایسے ہتھیار ہیں جن کا استعمال اگرچہ عسکری مقاصد کے لیے ہوں لیکن عام شہریوں کی ہلاکت اور ماحولیات کی ناقابل تلافی تباہی کا باعث بنتا ہے۔

اسلام کے ابتدائی دور اور نبی اکرمؐ کے زمانے میں بھی ایسے ہتھیاروں کا مسئلہ موجود تھا جن کے استعمال سے بچوں، عورتوں، بوڑھوں اور مسلمان قیدیوں کی ہلاکت کا امکان ہو سکتا تھا۔ یہ مسئلہ شیعہ روایات میں بھی زیرِ بحث رہا ہے۔ حوزہ علمیہ قم میں فقہ اور اصول فقہ میں درس خارج کے استاد ابوالقاسم علی دوست، بیان کرتے ہیں کہ شیعہ فقہا کم از کم دس صدیوں سے اس مسئلے پر بحث کر رہے ہیں۔

چودھویں اور پندرہویں صدی ہجری شمسی میں اجتماعی تباہی کے ہتھیاروں، جیسے کہ جوہری اور کیمیائی ہتھیاروں، کی نئی مثالیں سامنے آئیں جن کے اثرات ماضی میں موجود نہیں تھے۔ اسی وجہ سے ان مسائل کو جدید فقہی مسائل میں شمار کیا جاتا ہے۔

شرعی حکم

شیعہ فقہاء نے انبوہ تباہی ہتھیاروں کے مسئلے کا مختلف پہلوؤں سے جائزہ لیا ہے:

• ابتدائی طور پر (دشمن کے اقدام سے پہلے)، تیاری، ذخیرہ اور ہنگامی حالت میں ان کا استعمال:
  • ابتدائی استعمال: تمام شیعہ فقہا کے مطابق ان ہتھیاروں کا ابتدائی استعمال حرام ہے۔ ابوالقاسم علی دوست کا کہنا ہے کہ شیعہ فقہا نے کم از کم دس صدیوں پہلے ایسے ہتھیاروں اور اوزاروں کے استعمال کی حرمت کا فتویٰ دیا ہے جو انسانوں کی وسیع پیمانے پر ہلاکت، جانداروں کی تباہی اور ماحولیات کی بربادی کا سبب بنتے ہیں۔
  • تیاری اور ذخیرہ: فقہا نے نئی قسم کے انبوہ تباہی ہتھیاروں کی تیاری اور انہیں محفوظ رکھنے کے بارے میں بھی فتویٰ دیا ہے۔ آیت اللہ خامنہ ای نے جوہری اور انبوہ تباہی کے ہتھیاروں کی تیاری اور استعمال کو حرام قرار دیا ہے اور انہیں انسانیت کے لیے سنگین خطرہ قرار دیا ہے۔ بعض دیگر مراجع تقلید، جیسے آیت اللہ مکارم شیرازی، آیت اللہ نوری ہمدانی، آیت اللہ جعفر سبحانی اور آیت اللہ جوادی آملی نے بھی اس فقہی رائے کی تائید کی ہے۔ آیت اللہ مکارم شیرازی کے نزدیک ان ہتھیاروں کی تیاری اور ذخیرہ انسانی فطرت کے خلاف ہے۔
• اضطراری حالات میں: جب مسلمانوں کی فتح ان ہتھیاروں کے استعمال پر موقوف ہو تو اس صورت میں فقہا کے درمیان اختلاف پایا جاتا ہے۔ بعض فقہا، جیسے محقق حلی (602-676ھ)، شیخ طوسی (385-460ھ) اور شہید ثانی (911-955یا965ھ) کے نزدیک ایسی صورت میں ان ہتھیاروں کا استعمال جائز ہے۔ جبکہ آقا ضیاء عراقی (1278-1361ھ) کے نزدیک زہر کا استعمال، جو اس وقت انبوہ تباہی ہتھیار سمجھا جاتا تھا، حتیٰ کہ اگر فتح اس پر موقوف ہو، تب بھی ممنوع ہے۔