سورہ آل عمران آیت نمبر 139

سورہ آل عمران آیت 139

آیت کی خصوصیات
سورہ	آل عمران
آیت نمبر	139
پارہ	4
موضوع	وعده پیروزی به مؤمنان
مربوط آیات	سورہ محمد آیت نمبر 35

سورہ آلِ عمران کی آیت 139 مومنین کو کافروں پر فتح اور غلبہ کی بشارت دیتی ہے اور انہیں کافروں کے خلاف پایداری اختیار کرنے کی ترغیب دیتی ہے۔

وَلَا تَہِنُوا وَلَا تَحْزَنُوا وَأَنْتُمُ الْأَعْلَوْنَ إِنْ كُنْتُمْ مُؤْمِنِينَ

---

اے مسلمانو! کمزوری نہ دکھاؤ اور غمگین نہ ہو اگر تم مؤمن ہو تو تم ہی غالب و برتر ہوگے۔

---

سورہ آل عمران: آیت 139

آیت کے آغاز میں، مسلمانوں کو خبردار کیا گیا ہے کہ وہ جنگ میں شکست سے سستی اور اداسی کا شکار نہ ہوں۔ چھٹی صدی ہجری کے شیعہ مفسر فضل بن حسن طبرسی نے اپنی تفسیر مجمع البیان میں لکھا ہے کہ اس آیت کے نزول کا سبب جنگ احد کے بعد مسلمانوں کو تسلی اور امید دینا تھا، جس میں انہیں جانی نقصان ہوا تھا۔ ایک اور حدیث کے مطابق جنگ احد کے اگلے دن، پیغمبرِ اسلامؐ زخمیوں کے ایک گروہ کے ساتھ، مکہ کے لشکر کی طرف سے مدینہ پر دوبارہ حملے کو روکنے کے لیے، حمراء الاسد کی طرف تشریف لے گئے اور اللہ تعالیٰ نے وہیں یہ آیت نازل فرمائی۔ کہا گیا ہے کہ یہ آیت مومنین کو مشرکوں کے خلاف مزاحمت اختیار کرنے کی ترغیب دیتی ہے۔

شیعہ مفسر اور فلسفی سید محمد حسین طباطبائی نے “تَہِنُوا” (سستی کرنا) کی تعبیر، جس سے اللہ نے منع کیا ہے، کو جہاد کے عزم میں کمزوری اور دین کے قیام کی اہمیت سے غفلت برتنے کے معنی میں بیان کیا ہے۔ “وَأَنْتُمُ الْأَعْلَوْنَ” (اور تم ہی غالب ہو) کے حوالے سے کہتے ہیں کہ آخر کار مومنین ہی فتح یاب ہوں گے۔ محمد جواد مغنیہ نے اس آیت کی تفسیر میں پیغمبرِ اسلامؐ کی حدیثِ اعتلا (برتری کی حدیث) کا حوالہ دیا ہے، جس کے مطابق اسلام برتر ہے اور کوئی چیز اس پر غلبہ نہیں پا سکتی۔ نیز، “إِنْ كُنْتُمْ مُؤْمِنِينَ” (اگر تم مومن ہو) میں ایمان سے مراد اللہ پر اور الٰہی وعدوں پر اعتماد ہے۔ ایران کے سپریم لیڈر آیت اللہ خامنہ ای نے اسرائیل کے ایران پر حملے اور اس کے کئی فوجی کمانڈروں کی شہادت کے بعد ایرانی عوام کے نام اپنے ایک پیغام میں اس آیت کی تلاوت کی۔ انہوں نے اس آیت سے استناد کرتے ہوئے کہا ہے کہ اگر ہم مومن ہیں، تو دشمن حقیقی میدان میں کچھ کرنے کی صلاحیت نہیں رکھتا۔

سید محمد تقی مدرسی بھی اس آیت کے ذیل میں الٰہی سنت کی طرف اشارہ کرتے ہیں کہ جس کے مطابق برتری اور فتح اچانک یا بغیر کسی قربانی کے نہیں ملتی، بلکہ اس کے لیے سختیاں جھیلنا پڑتا ہے، کیونکہ دشمن بھی مقابلے کے لیے تیار ہے۔

سورہ محمد آیت نمبر 35 میں بھی ایسا ہی مفہوم بیان کیا گیا ہے: “پس تم کمزور نہ پڑو (اور ہمت نہ ہارو) اور (دشمن کو) صلح کی دعوت نہ دو حالانکہ تم ہی غالب رہو گے اور اللہ تمہارے اعمال (کے ثوا ب) میں ہرگز کمی نہیں کرے گا۔”